The Bible—Mankind’s Oldest Modern Book

¹ Sanglit ang Biblia Pulong sang Dios, makasalig kita nga nagahatag ini sing praktikal nga mga sabat sa modernong-adlaw nga mga problema. Kag ang organisasyon ni Jehova nagahatag sing praktikal nga bulig agod makita ina nga mga sabat sa mga publikasyon subong man sa mga video. Busa, nalipay kami sa pagpahibalo nga ang Ingles nga bersion sang The Bible​—Mankind’s Oldest Modern Book, ang ikaduha sa tatlo ka video nga nagapakita nga ang Biblia inspirado, matigayon na karon sa Pilipinas. May kalawigon ini nga 40 minutos.

² Kaangay sang nahauna nga video sini nga mga serye, ining ikaduha nagapalig-on man sing pagsalig sa Biblia subong tuytoy sang Dios. Nagagamit ini sang mga larawan nga ginkuha sa mga kadutaan sa Biblia kag sa mga museo sa palibot sang kalibutan agod buligan kita sa paghangop kon paano gintipigan ni Jehova ang Biblia sa bug-os nga mga siglo tubtob sa aton adlaw. Makita ninyo kon paano ang pagkahusto sang Biblia nahuptan walay sapayan sang liwat-liwat nga pagkopya kag pagbadbad. Makita ninyo kon paano ini gintipigan walay sapayan sang daku nga pagpamatok. Makita man ninyo ang buhi nga pamatuod kon paano ginbag-o sang Biblia ang mga kabuhi sang mga tawo para sa maayo pa.

³ Ini nga video mapuslanon para sa paghinun-anon sang pamilya sa Biblia kag para sa mga estudyante sang Biblia​—kaangay gid sang nahauna. Napat-od namon nga pakamaayuhon ni Jehova ang paggamit sa sini. Mahimo na ini karon maorder paagi sa inyo departamento sang literatura sa kongregasyon subong sang ginsambit sa ubos sang Mga Pahibalo. Ang video nga Jehovah’s Witnesses​—The Organization Behind the Name matigayon man liwat karon. Ining mga video magamit lamang para sa mga VHS recorder kag indi magamit sa mga Betamax recorder.