“Puntariya sang Pagdumot sang Tanan nga mga Pungsod”

¹ Sining karon nga mga tinuig nagkasadya kita tanan sa makalilipay nga mga pagpakamaayo nga naeksperiensiahan sang katawhan ni Jehova sa palibot sang kalibutan. Ang paghimo nga legal sa hilikuton sa Malawi pagkatapos sang 26 ka tuig sang mapintas nga pagpigos nagpahibi sa aton sa kalipay. Nakaginhawa kita sing halog sang napukan ang Komunismo sa Sidlangan nga Europa nga nagresulta sa paghilway sa linibo ka kauturan naton. Nagbantay kita nga may kabalaka samtang ang aton kahilwayan sa pagsimba ginhangkat sa Gresya; nalipay kita nga nagdaug kita sa pinakamataas nga hukmanan sa Europa. Nalipay kita makabati nahanungod sa pagpasangkad sa mga sanga sang Sosiedad nga nagpaposible nga maimprinta ang madamo nga mga literatura para sa mga nagapangita sing kamatuoran. Nagdayaw kita sang nabatian naton nga kapin sa 7,400 ang ginbawtismuhan sa kombension sa Kiev, Ukraine. Huo, ining dramatiko nga mga pag-uswag sa hilikuton sang Ginharian nagpahalipay gid sa aton sing daku!

² Samtang may daku kita nga rason sa pagkasadya, dapat kita mag-andam batok sa sobra nga pagkalipay. Ang pila ka maayong mga report mahimo nga magapahunahuna sa aton nga ang pagpamatok nagadiutay kag nga ang katawhan ni Jehova nagatigayon sing kahamuot sa palibot sang kalibutan. Ina nga panghunahuna mahimo makadalaya. Bisan pa natigayon naton ang pila ka kadalag-an kag nagmadinalag-on sa pagdula sang mga sablag sa maayong balita sa pila ka kadutaan, indi naton dapat pagkalimtan nga ang aton kaangtanan sa kalibutan wala magbalhin. “Indi [kita] bahin sang kalibutan.” Bangod sina, pat-od gid nga mangin “puntariya [kita] sang mga pagdumot sang tanan nga mga pungsod.” (Juan 15:19; Mat. 24:9) Tubtob nagapabilin ining sistema sang mga butang, wala sing makabalhin sa pagsulundan nga “ang tanan nga nagahandom nga magkabuhi nga may diosnon nga debosyon may kaangtanan kay Cristo Jesus pagahingabuton man.”​—2 Tim. 3:12.

³ Ginapamatud-an sang maragtas ang kamatuoran sini nga paandam. Bisan naghatag si Jesus sing makatilingala nga panaksi sa atubangan sang mga gumalahom kag sa ila mga sakop, nag-antos sia sing adlaw-adlaw nga pag-abuso kag yara pirme sa katalagman nga pagapatyon. Bisan nga ang iya mga apostoles nakahimo sing madamong disipulo, nakigbahin sa pagsulat sa Cristianong Griegong Kasulatan, kag nagpakita sing milagruso nga mga dulot sang espiritu, gindumtan man sila kag ginsakit. Walay sapayan sang ila maayo nga paggawi kag gugma sa isigkatawo, ang mga Cristiano gintamod subong talamayon nga “sekta” nga ‘bisan diin ginapakamalain.’ (Binu. 28:22) Bisan ginagamit karon ni Jehova ang Cristianong kongregasyon sa makatilingala nga paagi sa paghimo sang iya kabubut-on, padayon ini nga ginapamatukan sang tanan nga elemento sining malauton nga sistema sang mga butang. Wala sing rason ang magpaabot nga madula ang pagpamatok.

⁴ Sang unang siglo, ginhingabot ni Satanas ang mga disipulo ni Jesus sa lainlain nga mga paagi. Ang mga manugpamatok nagsugid sing hayag nga mga kabutigan tuhoy sa ila. (Binu. 14:2) Ginpahog nila sila. (Binu. 4:​17, 18) Gintinguhaan sila nga pahipuson sang akig nga mga kadam-an. (Binu. 19:​29-34) Ginbilanggo sila sa walay kabangdanan. (Binu. 12:​4, 5) Gingamit sa masami sang mga manughingabot ang pisikal nga kasingki. (Binu. 14:19) Sa pila ka kaso ginpatay ang mga walay sala. (Binu. 7:​54-60) Personal nga ginbatas ni apostol Pablo ang kalabanan sining mga abuso. (2 Cor. 11:​23-27) Gingamit sang mga manugpamatok ang tanan nga kahigayunan nga upangan ang pagbantala nga hilikuton kag paantuson ining matutom nga mga manugpangabudlay.

⁵ Ginagamit man sa karon ni Satanas ang kaanggid nga mga taktika. Ang hayag nga mga kabutigan nagalaragway sa aton sing sayop subong wala matuytuyi sing maayo nga sekta ukon kulto. Sa iban nga mga kadutaan, gindumilian sang mga awtoridad ang aton literatura. Ginmulay sing dayag ang aton pagtahod sa pagkabalaan sang dugo. Sang katuigan 1940, ginsalakay sang akig nga mga kadam-an ang aton mga kauturan kag ginpierde ang ila propiedad bangod sang pagsaludo sa bandera nga hulusayon. Linibo ang ginbilanggo bangod sang neutralidad nga hulusayon. Sa totalitaryan nga mga kadutaan ang aton mga kauturan ginsumbong sing sayop subong mga subersibo, nga nagresulta sa pagsakit kag pagpatay sa ginatos sa mga bilangguan kag mga kampo konsentrasyon. Ginapakita sing maathag sining pag-ipit nga mga puntariya kita sang pagdumot sa dimakatarunganon nga kabangdanan.​—Tan-awa ang Proclaimers, kapitulo 29.

⁶ Ano ang Nagahulat sa Palaabuton? Bisan natigayon sang katawhan ni Jehova ang paumpaw sa tion kag tion sa iban nga bahin sang kalibutan, ang kabilugan nga kahimtangan nagapabilin nga amo gihapon. Ang Yawa akig gihapon bangod sang pagtagbong sa iya sang 1914. Nakahibalo sia nga malip-ot na lamang ang iya tion. Ang iya kaalipungot pat-od gid nga magadugang samtang nagahilapit ang dakung kapipit-an. Magapakig-away sia sing bug-os batok sa nagalingkod sa trono nga Hari, nga si Cristo Jesus, kag determinado sia nga makig-away tubtob sa katapusan. Mapaupok lamang niya kag sang iya mga demonyo ang ila kaakig sa katawhan ni Jehova diri sa duta, nga matutom nga “nagatuman sang mga sugo sang Dios kag may hilikuton sa pagpanaksi nahanungod kay Jesus.”​—Bug. 12:​12, 17.

⁷ Gani samtang nagatan-aw kita sa unahan, dapat kita magmangin realistiko. Wala sing rason sa paghunahuna nga ang Yawa magaisol ukon magauntat. Ang pagdumot batok sa aton sa sining kalibutan magautwas sa bisan ano nga tion kag sa bisan diin nga lugar. Sa madamong kadutaan ang aton kahilwayan sa pagbantala natigayon lamang pagkatapos sang malawig nga pagpakig-away. Ina nga kahilwayan mahimo nga maluya katama. Ang dramatiko nga mga kagamo mahimo mahanabo sa isa ka gab-i, nagadala sing kinagubot kag mga abuso sa tawhanon nga mga kinamatarong.

⁸ Ang karon nga kabuganaan kag kahilwayan nga ginaagom naton sa pila ka kadutaan mahimo nga matapos sing hinali, nga nagatuga sing kaanggid nga mga abuso nga gin-antos sang aton mga kauturan sang nagligad. Indi naton pagtugutan ang aton kaugalingon nga mahulog sa espiritu sang dipagsapak, nagahunahuna nga ang aton mga kaaway nalupig na. Ang pagdumot sining kalibutan indi pirme madayag sing bug-os, apang nagapabilin ini nga daku. Ginapakita sang Pulong sang Dios nga ang pagpamatok sang kalibutan magadugang samtang nagahilapit ang katapusan. Gani dapat kita magbantay, nagapakita sang aton kaugalingon nga “maalam subong sang mga man-ug apang inosente subong sang mga salampati.” (Mat. 10:16) Dapat naton mahantop nga ‘magapakig-away kita sing lakas’ tubtob sa katapusan, kag ang pagbatas amo ang yabi sa aton kaluwasan.​—Jud. 3; Mat. 24:13.

⁹ Sa aton pungsod, ang pagbantala nga hilikuton mahimo nagauswag nga wala ginaupangan sang mga manugpamatok. Mahimo ini magapahunahuna sa aton nga wala gid sing rason nga magkabalaka. Apang, kinahanglan ang pagbantay. Ang mga sirkunstansia madasig nga nagabalhin. Ang mga manugpamatok mahimo magapautwas sing pila ka hulusayon kag magagamit sini batok sa aton nga wala sing pasidaan. Ang mga apostata padayon nga nagapangita sing rason sa pagyamo. Ang akig nga mga klerigo dayag nga nagapakamalaut sa aton. Ang aton mga plano sa pagpatindog sing Kingdom Hall mahimo tunaan sing kontrobersiya sa bug-os nga kasilingan. Ang negatibo nga mga hambal batok sa aton mahimo himuon sa mga pamantalaan. Ang prominente nga mga tawo sa inyo lugar mahimo nga matinuyuon nga magahatag sing sayop nga laragway nahanungod sa aton, nga mangin kabangdanan nga maakig sa aton ang aton mga kaingod kon magduaw kita. Bisan ang aton mga katapo sa panimalay mahimo magahingabot sa aton. Gani kinahanglan ang pagbantay, nakahibalo nga ang kaawayon sang kalibutan buhi gid, kag mahimo ini magalutaw sa bisan ano nga tion.

¹⁰ Paano Kita Dapat Maapektuhan Sini? Ini tanan nagaapektar sang aton panimuot para sa palaabuton. Sa anong paagi? Dapat bala kita mahadlok sa kon ano ang mahimo nga batason naton? Dapat bala kita maghinay sa aton pagbantala nga hilikuton bangod nadisturbo sa sini ang iban sa aton komunidad? May rason bala nga magkaakig kon kita ginapasipalahan? Ang mapintas nga pagtratar nagadula bala sang aton kalipay sa pag-alagad kay Jehova? Indi bala matuod nga walay kapat-uran ang resulta? Indi, indi gid! Ngaa indi?

¹¹ Indi gid naton dapat pagkalimtan nga ang mensahe nga ginabantala naton nagahalin, indi sa aton, kundi kay Jehova. (Jer. 1:9) Obligado kita nga pamatian ang laygay: “Magpanawag sa iya ngalan. Ipahayag ang iya mga binuhatan sa katawhan . . . sa bug-os nga duta.” (Isa. 12:​4, 5) Gintugutan niya ang malain nga pagtratar sa iya katawhan tungod sa espesipiko nga katuyuan, nga amo, ‘ipahayag ang iya ngalan sa bug-os nga duta.’ (Ex. 9:16) Nagahimo kita sing hilikuton nga ginsugo ni Jehova, kag ginahatagan niya kita sing kaisog nga magpamulong nga may kasidla. (Binu. 4:​29-31) Amo ini ang labing importante nga hilikuton nga ginahimo sa sining ulihi nga mga adlaw sang daan nga sistema.

¹² Ini nga ihibalo nagahatag sa aton sing kaisog sa pagtindog nga malig-on sa pagpamatok ni Satanas kag sining kalibutan. (1 Ped. 5:​8, 9) Sa pagkahibalo nga si Jehova kaupod naton nagahimo sa aton nga ‘maisog kag mabakod,’ nagadula sang bisan anong kabangdanan nga magkahadlok. (Deut. 31:6; Heb. 13:6) Bisan pa pirme naton tinguhaan nga magmataktikanhon kag rasonable kon ginapahog sang mga manugpamatok, pagaathagon naton nga determinado kita sa ‘pagtuman sa Dios subong gumalahom sangsa mga tawo’ kon ang aton pagsimba ginahangkat. (Binu. 5:29) Kon may kahigayunan sa pagpamulong sa aton pagpangapin, himuon naton ini. (1 Ped. 3:15) Apang, indi naton pagausikan ang aton tion sa pagpakigbais sa matig-a nga mga manugpamatok nga interesado lamang nga pakahuy-an kita. Sa baylo nga magbalos kon isumbong nila kita sing butig, ‘pabay-an’ na lamang naton sila.​—Mat. 15:14.

¹³ Ang aton pagbatas sa mga pagtilaw nagapahalipay kay Jehova. (1 Ped. 2:19) Ano nga bili ang ginabayad naton tungod sina nga kahamuot? Dapat bala kita mag-alagad nga wala sing kasadya bangod ginadumtan kag ginapamatukan kita? Indi gid! Si Jehova nagasaad nga padyaan niya ang aton pagkamatinumanon sing “kalipay kag paghingabot.” (Roma 15:13) Walay sapayan sang daku nga pag-antos, si Jesus nagpabilin nga malipayon bangod sang “kalipay nga ginbutang sa iya atubang.” (Heb. 12:2) Amo man sa aton. Bangod kay ang padya para sa pagbatas daku katama, ginapahulag kita nga “magkalipay kag magkasadya” bisan pa nagaantos kita sing masakit nga mga pagtilaw. (Mat. 5:​11, 12) Bisan sa mga panahon sang kabudlayan, ini nga kalipay, sa iya kaugalingon, isa ka kabangdanan nga hatagan sing pagdayaw si Jehova.

¹⁴ Indi bala matuod nga walay kapat-uran ang tuhoy sa katapusan nga resulta, nga sa amo mabalaka kita? Indi, ang resulta sa inaway sa ulot sang organisasyon ni Jehova kag sang kalibutan ni Satanas madugay na napamat-uran. (1 Juan 2:​15-17) Ano man ka daku ang pagpamatok, si Jehova magahatag sa aton sing kadalag-an. (Isa. 54:17; Roma 8:​31, 37) Bisan pa ginatilawan gid kita, wala sing makapugong sa aton sa pagbaton sing padya. Wala kita sing rason nga ‘magkabalaka sa bisan ano nga butang,’ bangod ginhatagan kita ni Jehova sing paghidait bilang sabat sa aton mga pag-ampo.​—Filip. 4:​6, 7.

¹⁵ Gani ginapasalamatan naton si Jehova kada mabatian naton nga ang aton mga kauturan ginluwas sa paghingabot ukon ginhatagan sing kahilwayan sa pagbantala sa anay ginadumilian nga mga lugar. Nagakasadya kita kon ginabuksan ang bag-ong mga kahigayunan sa linibo ka sinsero nga katawhan nga makabati sang mensahe sang Ginharian. Ginapasalamatan naton si Jehova nga ginhatagan niya kita sing kadalag-an sa mga komprontasyon sa mga manugpamatok. Nahibaluan naton nga pakamaayuhon niya ang aton hilikuton sa bisan anong paagi nga kinahanglanon agod pakataason ang iya matuod nga pagsimba kag kuhaon ang mga “bilidhon” gikan sa tanan nga pungsod.​—Hag. 2:7; Isa. 2:​2-4.

¹⁶ Sa amo man nga tion, nahibaluan naton nga ang aton kaaway, nga si Satanas, tuman ka gamhanan, kag pamatukan gid niya kita tubtob sa katapusan. Ang iya mga pagsalakay mahimo nga hayag kag mainit, ukon mahimo nga malimbungon kag madayaon. Ang paghingabot mahimo magalutaw sing hinali sa anay malinong nga mga lugar. Ang mga manugpamatok mahimo nga mapintas sa mga panikasog sa pagpigos sa aton. Sa gintalana nga tion mangin maathag sa ila tanan nga sila “nagapakig-away gid sa Dios,” kag laglagon niya sila. (Binu. 5:​38, 39; 2 Tes. 1:​6-9) Samtang, ano man ang aton ginabatas, determinado kita sa pagpabilin nga dimationg sa pag-alagad kay Jehova kag sa pagbantala sang mensahe sang Ginharian. Kita ang pinakamalipayon nga katawhan sa nawong sang duta, nakahibalo nga ‘subong nahamut-an magabaton kita sang purongpurong sang kabuhi.’​—Sant. 1:12.