Ang Pagtinuon sa Libro sang Kongregasyon Nagapasanyog sang mga Hilikuton sa Pagtudlo
1 Daku ang papel sang Pagtinuon sa Libro sang Kongregasyon sa programa sa pagtudlo sang organisasyon ni Jehova. Ang mga grupo sang pagtinuon sa libro ginahiwat sa kombeniente nga mga lugar. Sanglit ang pagtinuon ginahiwat malapit sa ila lugar, ang mga interesado mas mahapos nga makatambong.
2 Ginapanikasugan nga huptan nga diutay ang tagsa ka grupo. Nagatugot ini sa konduktor sa paghatag sing personal nga bulig sa kada isa. Kon may nabudlayan sa paghangop sa isa ka punto, mahimo ini ipaathag sing dugang sang konduktor pagkatapos sang pagtuon. Isa pa, sa diutay nga grupo, mas madamo ang makakomento kag makabasa sa mga kasulatan. Nagakomento bala kamo sing regular? Ginatinguhaan bala ninyo nga makasabat sa inyo kaugalingon nga mga tinaga? Samtang nagahanda kamo, gamita ang inyo mga ikasarang sa paghantop sa paghibalo kon paano ninyo personal nga maaplikar ang pila ka punto sa leksion.—Heb. 5:14.
3 Paagi sa pagpanilag sa mga paagi sa pagtudlo nga ginagamit sang konduktor sa pagtinuon, matun-an ninyo kon paano dumalahan ang mga pagtuon sa Biblia sa paagi nga labi nga nagatudlo. Pagkatapos mabasa sang isa ka sangkol nga utod nga lalaki ang mga parapo, ginahambalan ang mga pamangkot. Ginatinguhaan sang konduktor sa pagtinuon nga pakumentuhan ang mga kasulatan agod buligan kita sa paghangop kon paano ini iaplikar. (Ipaanggid ang Nehemias 8:8.) Kon kaisa mahimo sia magdugang sing malip-ot nga komento ukon maggamit sing dugang nga mga pamangkot agod mapaguwa ang panguna nga punto. Ang isa ka ilustrasyon mahimo makabulig sa aton sa paghangop kon paano ang leksion nagahilabot sa aton kabuhi.
4 Diutay lamang ang nagatambong sa pila ka Pagtinuon sa Libro sang Kongregasyon. Nagatambong bala kamo sing regular? Ang kahimusan sa pagtinuon sa libro isa sa mga paagi nga ginapakita ni Jehova ang iya pag-ulikid sa aton. (1 Ped. 5:7) Luyag niya nga mag-uswag kita sa kaalam agod mangin mabakod kita sa espirituwal. Sa pihak nga bahin, luyag ni Satanas pahinayon ang aton espirituwal nga pagtubo agod mangin kubos kita ka mapuslanon kay Jehova kag sa Iya organisasyon. Indi ninyo pagtuguti nga matabo ini! Tuguti ang mainit kag mahigugmaon nga palibot sa sining suod nga grupo sa pagtandog sang inyo tagipusuon kag sa pagpahulag sa inyo nga dayawon sing padayon si Jehova.—Ipaanggid ang Salmo 111:1.
5 Ang mga miting sa pag-alagad ginahimos sa kalabanan nga mga lugar sang pagtinuon sa libro. Ginapat-od sang konduktor sang pagtinuon sa libro nga may yara bastante nga teritoryo kag nga may isa nga manguna sa latagon. Ang mga miting antes magguwa sa latagon dapat maglawig sing 10-15 minutos lamang. Mahimo binagbinagon sing malip-ot sang konduktor ang adlaw-adlaw nga teksto kon nagakabagay ini sa aton pagbantala nga hilikuton kag maghatag sing isa ukon duha ka panugda sa pag-alagad sa latagon ukon magpresentar sing isa ka malip-ot nga pasundayag sa karon nga tanyag.
6 Ang konduktor nagapanikasog sa pagpangabudlay upod sa kada isa sa iya grupo, nagahatag sing pagpalig-on kag paghanas.—Ipaanggid ang Marcos 3:14; Lucas 8:1.