Hupti ang Positibo nga Panimuot

¹ Daw ano gid ang aton kalipay nga makabasa nahanungod sa dalayawon nga mga pag-uswag sa madamong kadutaan! Apang, nahibaluan naton nga sa iban nga mga lugar ang mga manugbantala sang Ginharian masunson nga nakasumalang sing dipagsapak ukon sing pagpamatok pa gani sa aton pagbantala nga hilikuton. Paano naton mahuptan ang positibo nga panimuot kon amo ini ang kahimtangan sa aton teritoryo? Paano naton mapunggan ang negatibo nga panimuot nga mahimo magadula sang aton kalipay ukon magabuhin sang aton kakugi para sa hilikuton nga paghimo sing mga disipulo?

² Ang positibo nga panimuot magabulig sa aton sa paghupot sang aton pagkatimbang. Bisan sa idalom sang mabudlay nga mga kahimtangan, indi naton dapat pagtugutan ang negatibo nga mga panghunahuna nga magakontrol sang aton pagtamod. Nagpahamtang si Jesus sing himpit nga halimbawa para sa aton. Diutay lamang ang nagbaton sa iya. Madamo ang nasandad sa iya panudlo. Ang relihiosong mga lider nagbuko sa pagpatay sa iya. Ginduplaan sia, ginyaguta, ginsakit, kag sang ulihi ginpatay. Apang, nakasapo sia sing kalipay sa iya hilikuton. Ngaa? Ginkilala niya ang importansia sang paghimo sang kabubut-on sang Dios, kag wala sia mag-untat.​—Juan 4:34; 13:17; Heb. 12:2.

³ Hupti ang Nagakaigo nga Pagtamod sa Aton Ministeryo: Agod mahimo ini, dapat naton dumdumon nga ang kalabanan nga mga tawo wala nagasapak ukon nagapamatok sa aton mensahe. (Mat. 13:​14, 15) Bisan nga ang mga apostoles opisyal nga ginmanduan nga mag-untat sa pagpanudlo sa sadsaran sang ngalan ni Jesus, nagpadayon sila sa pagbantala, kag ang alanyon padayon nga nagdamo. (Binu. 5:​28, 29; 6:7) Nahibaluan naton nga daan nga, sa iban nga mga teritoryo, pila lamang ang magapamati. (Mat. 7:14) Hanti, may rason kita sa pagkalipay kon isa lamang ka tawo sa aton teritoryo ang nagapamati sa aton mensahe. Dumduma, man, nga bisan yadtong nagapamatok dapat hatagan sing kahigayunan nga makabati. (Ezeq. 33:8) Ang iban nga mga nagapamatok nagbalhin sang ulihi kag nangin mga sumilimba ni Jehova. Kon tamdon sing nagakaigo, nian, ang aton ministeryo nagahatag sa aton sing kaayawan, bisan pa nga pila lamang ang nagapamati. Ang aton mismo pagduaw sa mga ganhaan nga dala ang mensahe sang Ginharian isa ka panaksi.​—Ezeq. 2:​4, 5.

⁴ May yara kita maayo nga rason sa pagtigayon sing positibo nga panimuot. Ang pag-uswag sang bug-os kalibutan nga hilikuton kag ang paghilapit sang dakung kapipit-an dapat magpahulag sa aton nga himuon ang aton bug-os nga masarangan. (2 Ped. 3:​11, 14) Luyag man naton nga ang bag-ong mga nakig-upod mangin positibo sa paggamit sang kon ano ang ila natun-an. Kon ang pila sang aton mga estudyante sa Biblia nag-uswag tubtob sa punto nga mangin dibawtismado nga mga manugbantala, ang Agosto mahimo nga mangin isa ka maayo nga tion agod makasugod sila.

⁵ Nagaalagad man subong mga manugbantala ukon subong mga payunir, maayo pirme dumdumon nga indi mabug-at ang ginapangayo ni Jehova sa aton. (1 Juan 5:3) Nagasaad sia sa pagsakdag sa aton. (Heb. 13:5b, 6) Walay sapayan sang dipagsapak sang mga tawo, dapat kita mangin positibo kag magpadayon sa pagbantala bangod kabubut-on sang Dios nga himuon naton ini.​—1 Tim. 2:​3, 4.