Paggamit sang Bag-ong Brosyur sing Epektibo
1 Sa aton ulihi nga distrito nga kombension, nalipay kita nga makabaton sing bag-ong brosyur nga Kon ang Isa nga Ginahigugma Mo Mapatay. Makagalanyat ini sa tanan nga sahi sang mga tawo, kay madamo katama ang ginlisdan bangod sang pagkapatay sang isa nga ginahigugma. Mahapos ini ipahamtang bangod sang matahom nga mga ilustrasyon sini. Sa pahina 29 ang dramatiko nga drowing tuhoy kay Lasaro nga ginbanhaw gikan sa minatay nagapakita sang “daku nga handom [ni Jesus] nga dulaon ang mga halit sang kamatayon.” Ang masunod nga bug-os pahina nga larawan nagalaragway sang isa ka makalilipay nga danyag sang pagkabanhaw sa bag-ong kalibutan. Nagapahalipay gid ini sa tagipusuon sang mga nalisdan!
2 Ining brosyur gindesinyo agod gamiton sa paghambalanay. Makita ang mga pamangkot sa isa ka kahon sa katapusan sang tagsa ka seksion sa baylo nga sa ubos nga bahin sang tagsa ka pahina. Sarang ninyo magamit ining “Mga Pamangkot nga Binagbinagon” sa bisan anong paagi nga sa banta ninyo labing mabuligon sa inyo estudyante.
3 Kon nagaduaw, ayhan luyag ninyo ipakita ang mga kaundan sa pahina 2 kag pamangkuton ang tagbalay kon ano ang nagawili sa iya. Tuguti sia sa pagpabutyag sang iya mga balatyagon, kag nian ipakita kon paano ang brosyur nagahatag sing lugpay. Ang tagsa ka seksion nagagamit sing madamong teksto sa Biblia nga nagapakita sing sadsaran para sa aton paglaum.
4 Ang subtitulo sa pahina 5, “May Isa ka Tunay nga Paglaum,” nagapadaku sang makalulugpay nga paglaum sa Biblia para sa mga patay. Dapat ini magpukaw sang gana para sa “Isa ka Pat-od nga Paglaum Para sa mga Patay,” nga masapwan sa pahina 26-31. Ang kahon sa pahina 27 nagahatag sang “Mga Teksto nga Nagalugpay.” Mahapos makita sang ginalisdan nga tagbalay nga si Jehova amo sa pagkamatuod “ang Dios sang tanan nga kalugpayan.”—2 Cor. 1:3-7.
5 Sa isa ka sensitibo nga paagi, ginapakita sang brosyur kon paano atubangon ang kasubo sa pagkapatay sang isa nga ginahigugma kag kon paano ang iban makabulig sa sinang malisod nga mga tion. May isa ka kahon sa pahina 25 nga natig-uluhan “Pagbulig sa Kabataan sa Pag-atubang sa Kamatayon.” Magabulig gid ini sa mga ginikanan nga nagaatubang sini nga problema.
6 Magtago sing ekstra nga kopya kag gamita ini sa dipormal nga pagpanaksi. Ayhan luyag mo duawon ang lokal nga mga punerarya sa inyo teritoryo agod tan-awon kon luyag nila magtigayon sing mga kopya sa paglugpay sa namatyan nga mga pamilya.
7 Ginakabig naton nga isa ka pribilehiyo ang paggamit sining bag-ong brosyur sa “paglugpay sa tanan nga nagalalaw.”—Isa.61:2.