Ang Pulong sang Dios May Gahom
1 Ang kabuhi sang minilyon naimpluwensiahan sing daku sang Biblia. Ang ginasiling sini labi nga makapahulag sangsa bisan ano nga sarang mahimo sang tawo. (Heb. 4:12) Tan-awa ang nahimo sini para sa aton. Sa pagkamatuod, ang kabilihanan sini indi matupungan.
2 Ang mga Saksi ni Jehova amo ang labing maayo nga mga estudyante sang Biblia. Dapat naton tamdon ang pagbasa sang Biblia subong isa ka importante nga bahin sang aton regular nga iskedyul, nagahatag sa sini sing prioridad sangsa telebisyon kag sa tanan iban pa nga mga kalingawan.
3 Himua Ini nga Isa ka Tayuyon nga Kinabatasan: Ginaapresyar sang katawhan ni Jehova ang gamhanan nga impluwensia nga mahatag sang tayuyon nga pagbasa sang Biblia. Ang karatula sa isa sang aton mga tinukod sang pabrika sa Brooklyn nagalaygay sa mga tawo nga “Read God’s Word the Holy Bible Daily.” Kinahanglan nga mabasa sang bag-ong mga katapo sang pamilya Bethel ang bug-os nga Biblia sa iya nahauna nga tuig sa Bethel. Ginasundan bala ninyo ang semanal nga pagbasa sa Biblia sa Teokratikong Eskwelahan sa Pagministro?
4 Kon ginabudlayan kamo sa paghimo sini, ngaa indi ini pagtadlungon sini nga Nobiembre? Ang pagbasa sa Biblia para sa bug-os nga bulan amo ang Salmo 95-109, nga nagakahulugan sang pagbasa sing tatlo ukon apat ka pahina sa isa ka semana. Ang iban nagabasa sing tigdiutay kada adlaw, ayhan sa kaagahon ukon antes magtulog sa gab-i. Ang importante amo nga ginaani ninyo ang mga benepisyo sang tayuyon nga pagbasa sang Pulong sang Dios.
5 Itanyag ang Biblia sa Nobiembre: Ginatahod sa gihapon sang madamo nga tawo ang Biblia kag handa sila sa pagpamati sa ginasiling sini. Sa Nobiembre itanyag naton ang New World Translation kag ang libro nga The Bible—God’s Word or Man’s? Ipakita sini sa mga bunayag sing tagipusuon ang kabilihanan sang Pulong sang Dios. Mangin mapagsik sa paghimo sina.
6 Maghanda sing pila ka komento tuhoy sa tumalagsahon nga mga bahin sang New World Translation nga magapahulag sa mga tawo nga magtigayon sini. Sarang ninyo magamit ang isa sa mga topiko sa seksion nga “Bible Topics for Discussion” kag maangot ini sa libro nga The Bible—God’s Word or Man’s? Ukon mahimo ninyo mapakita ang kabilihanan sang 92-pahina nga indese sang mga tinaga sa Biblia sa pagpangita sa pamilyar nga mga teksto. Mahimo nga luyag ipatalupangod sang iban nga mga manugbantala ang “Table of the Books of the Bible” kag ipakita ang kabilihanan sini sa pagtuon sa Biblia.
7 Pat-ura nga ipakita nga ang New World Translation nasulat sa moderno nga Ingles, busa mahapos ini mahangpan. Ang pila ka makawiwili nga mga pagpaanggid sa King James Version amo ang 1 Corinto 10:25 kag 16:22. Ang New World Translation nagagamit sang balaan nga ngalan nga Jehova sing 7,210 ka beses.
8 Huo, ang Biblia amo ang Pulong sang Dios. Kon aton ini basahon kag iaplikar ang laygay sini sa aton kabuhi, pagaanihon naton ang daku nga mga benepisyo. (Roma 15:4) Kinahanglan nga basahon naton ini adlaw-adlaw kag gamiton ini sa pagtudlo sa iban.