Hatagi sing Igtalupangod ang Matagnaon nga Pulong

¹ “Napalig-on pa sa amon ang matagnaon nga pulong.” (2 Ped. 1:19) Ngaa nasiling ini ni Pedro? Ang mga tagna sang Ginharian sa Hebreong Kasulatan subong man yadtong naghalin mismo kay Jesucristo napamatud-an, ukon “napalig-on,” paagi sa nakita kag nabatian ni Pedro kag sang duha pa ka disipulo sadtong pagbaylo-dagway nga hitabo mga 32 ka tuig ang nakaligad. Ining dramatiko nga palanan-awon nagpasalig liwat sa ila nga si Jesucristo magakari nga may kagamhanan sa Ginharian upod ang lubos nga pagsakdag sang iya Amay. Ang mga Cristiano sadtong unang siglo ‘naghimo sing maayo sa paghatag sing igtalupangod sa sadtong matagnaon nga pulong subong suga nga nagasiga.’ Ang paghatag sing igtalupangod sa matagnaon nga pulong naghupot sa ila nga alisto sa pamanagbanag sang bag-ong adlaw, kon ang “kabugwason”, nga si Cristo, magasubang sa kahimayaan sang Ginharian.​—2 Ped. 1:​16-19; Mat. 17:​1-9.

² Wala naton makita ang mahimayaon nga pagbaylo-dagway kaupod ni Pedro. Apang, ang mga Cristiano sa sining kaliwatan nga naghatag sing igtalupangod sa matagnaon nga pulong may pribilehiyo nga makita ang daku nga ebidensia nga ang mahimayaon nga Hari nagagahom sa katunayan! Kada tuig sugod sang 1914, ang matagnaon nga pulong napalig-on samtang nasaksihan naton ang katumanan sang madamo nga bahin sang “tanda” nga ginhatag ni Jesus nahanungod sa iya harianon nga “presensia.” Ang importante nga bahin sina nga tanda amo nga ang pahibalo tuhoy sa iya panguluhan igahatag sa tanan nga kapungsuran antes laglagon sang Hari ining sistema sang mga butang. Sa idalom sang panuytoy ni Cristo, ang hilikuton nga pagbantala sang Ginharian ginahimo na karon sa 231 ka kadutaan. (Mat. 24:​3-14) Dugang pa, samtang nagahilapit ang “dakung kapipit-an,” ginatipon sang nagalingkod sa trono nga Hari ang “dakung kadam-an” nga nakahantop man sang iya presensia.​—Bug. 7:​9, 10, 14.

³ Sanglit ang “kabugwason” nagsubang, kon sayuron, si Cristo naggahom na sa Ginharian, may rason pa bala agod hatagan sing igtalupangod ang matagnaon nga pulong? Huo! Ang ginhimaya nga si Jesucristo naghatag kay apostol Juan sing serye sang mga palanan-awon nga nagahuman sang tulun-an sang Bugna. May pinasahi ini nga kabilihanan sa aton nga nagakabuhi sa “adlaw sang Ginuo.” (Bug. 1:10) Amo ina kon ngaa sa dili madugay tun-an sing dugang pa sang tanan nga katawhan ni Jehova ang Revelation nga libro.

⁴ “Malipayon ang nagabasa sing mabaskog kag ang mga nagapamati sang mga pulong sining tagna, kag nagatuman sang mga butang nga nasulat sa sini; kay ang gintangdo nga tion malapit na.” (Bug. 1:3) Agod mangin malipayon kita, dapat naton mahangpan ang kahulugan, ukon, ang matuod nga kahulugan, sining matagnaon nga mga palanan-awon. Ano ang ginakinahanglan sini? Ang pagsulit kinahanglanon agod mapatudok sa aton tagipusuon ang pagkaimportante sang kasaysayan sang Bugna. Si apostol Pedro, nga katapo sang unang-siglo nga nagadumala nga hubon, nagkilala sang kabilihanan sang pagsulit sang sadsaran nga mga kamatuoran agod ‘pukawon’ ang iya mga kauturan sa espirituwal. (2 Ped. 1:​12, 13) Ang modernong-adlaw nga “matutom kag mainandamon nga ulipon” magabulig man sa aton paagi sa sulit-sulit nga pagpatalupangod sa aton sang matagnaon nga pulong.​—Mat. 24:​45-47.

⁵ Kon Paano Maghatag sing Igtalupangod: Ano nga sahi sang igtalupangod ang nagakaigo sa matagnaon nga pulong sang Bugna? Si apostol Pablo nagapahanumdom sa aton nga ang Dios wala maghambal sa mga Cristiano paagi sa mga anghel ukon sa mga manalagna kaangay sang ginhimo niya sa wala pa si Cristo. Sa baylo, si Jehova naghambal sa aton paagi sa iya labing pinalangga nga Anak, nga ginhimo niya nga “manunubli sang tanan nga butang.” (Heb. 1:​1, 2) “Amo ina kon ngaa kinahanglan naton hatagan sing labi pa sangsa kinaandan nga igtalupangod ang mga butang nga nabatian naton, agod indi gid kita maanod palayo.” (Heb. 2:1) Huo, dapat naton hatagan sing igtalupangod ilabi na ang matagnaon nga pulong nga nagaabot paagi kay Jesucristo. Paano naton mahatagan sing pinasahi nga igtalupangod ang aton pagtuon sa Bugna?

⁶ Una, importante nga magtambong kita kada semana sa Pagtinuon sa Libro sang Kongregasyon. Matuod, para sa madamo sa aton, mangin ikatlo nga tion ini nga matun-an naton ang Revelation nga libro. Busa, mahimo nga pasapayanan sang iban ang pagtambong sa pagtinuon sa libro, nagahunahuna nga bisan kon magapalya sila sa miting, nahibaluan na nila ang materyal. Apang, sa pagligad sang tagsa ka tuig, ining matagnaon nga impormasyon nangin labi pa nga suno-sa-tion sangsa gintun-an naton primero ang Revelation nga libro sadtong 1989. Kita tanan dapat mangin alisto sa karon nga mga hitabo nga madasig nga nagatudlo sa katumanan sang mga tagna sa Bugna. Himua nga imo personal nga tulumuron ang indi magpalya sa isa ka pagtinuon sa libro, kon mahimo, sa tion sining importante nga pagbinagbinag sa Bugna.

⁷ Ikaduha, handai sing maayo ang imo leksion. Tan-awa ang ginsitar nga mga kasulatan kag binagbinaga kon paano ini nagasakdag sa paathag sang mga bersikulo sa Bugna nga ginatun-an. Sa sining paagi matigayon mo ang labi pa sangsa mga sabat lamang sa mga pamangkot. Panikasugi nga matigayon indi lamang ang ihibalo kundi ang kaalam kag paghangop. (Hulu. 4:7) Ikatlo, makigbahin sing aktibo paagi sa pagkomento kag pagbasa sa mga kasulatan. Himua nga tulumuron ang makasabat sing dimagkubos isa ka bes kag ayhan mga pila ka bes sa tagsa ka pagtuon. Magabulig ini sa imo nga huptan ang imo hunahuna nga nakonsentrar sa leksion.

⁸ Ang paghatag sing labi pa sangsa kinaandan nga igtalupangod sa matagnaon nga pulong nagalakip sing kapin pa sangsa paghanda, pagtambong, kag pagpakigbahin. Nagakahulugan man ini nga bisan pagkatapos sang pagtuon, padayon naton nga ‘ginabinagbinag ining mga butang, nagaukod sa sini.’ (1 Tim. 4:15) Agod ang matagnaon nga pulong mangin subong sang suga nga nagasiga sa aton tagipusuon, dapat ini mag-apektar sing madalom sang aton nasulod nga persona​—sang aton mga panghunahuna, handum, emosyon, motibasyon, kag mga tulumuron. (2 Ped. 1:19) Busa, dapat naton pamangkuton ang aton kaugalingon: Ano ang kahulugan sini nga impormasyon sa akon sing personal? Ano ang natun-an ko nahanungod kay Jehova kag sa iya Anak, si Jesucristo? Nahangpan ko bala ang kahulugan sang pagtuon sa akon tagipusuon? Paano ko maaplikar ining mga kamatuoran sa akon kabuhi? Sa akon pamilya? Sa kongregasyon? Paagi sa pag-aplikar sing praktikal sa natun-an naton, masiling naton ang kaangay sa ginsiling sang salmista: “Ang imo pulong suga sa akon tiil, kag kapawa sa akon banas.”​—Sal. 119:105; Job 29:​3, 4.

⁹ Magpabilin nga Nagamata sa Ital-ital nga mga Tion: Sang tuig 33 C.E., ginpaandaman ni Jesus ang iya mga disipulo tuhoy sa nagapakari nga kalaglagan sang Jerusalem kag sang sinyales kon san-o sila dapat magpalagyo pakadto sa duog nga wala sing peligro. (Luc. 19:​41-44; 21:​7-21) Nian, kapin sa 30 ka tuig ang nagligad. Mahimo nga para sa iban nga taga-Judea nga mga Cristiano daw diutay lamang ang magabalhin sa malapit nga palaabuton. Nagakaigo gid sa tion ang laygay gikan kay apostol Pedro sa iya ikaduha nga sulat, nga ginsulat sang mga 64 C.E., nga ‘hatagan sing igtalupangod ang matagnaon nga pulong’! (2 Ped. 1:19) Wala madugay pagkatapos sadto, sang 66 C.E., ang Jerusalem ginpalibutan sang Romanong mga hangaway. Sang ang puwersa sang Roma hinali nga nag-isol, gintuman sang nagamata nga taga-Judea nga mga Cristiano ang paandam ni Jesus kag nagpalagyo. Nian, sang 70 C.E., ang Romanong hangaway nagbalik kag naglaglag sing bug-os sa Jerusalem. Daw ano gid ka malipayon ang mga Cristiano nga ginhatagan nila sing suod nga igtalupangod ang matagnaon nga pulong ni Jesus!

¹⁰ Ano ang ginabantayan naton subong modernong-adlaw nga mga Cristiano? Sa mga palanan-awon sa Bugna, ginpaalisto ni Jesus ang mga Cristiano nga nagakabuhi sa adlaw sang Ginuo sa madamong hitabo nga mahanabo sa dili madugay. Sang nagligad nga 80 ka tuig, madamo sining mga hitabo ang natabo na: ang pagkabun-ag sang Ginharian; ang inaway sa langit, nga ginsundan sang paglatid kay Satanas kag sang iya mga demonyo sa palibot sang duta; ang pagkapukan sang Babilonia nga Daku; kag ang pagtigayon sing kabantugan sang mapula sing duag nga sapat nga mapintas, ang ikawalo nga kagamhanan sa kalibutan. Ang katumanan sining mga bahin sang matagnaon nga pulong sa Bugna nagapat-od sing labi nga sa dili madugay makita naton ining nabilin nga dramatikong mga hitabo: ang pagtanda sa katapusan nga mga katapo sang 144,000, ang kompleto nga pagtipon sa dakung kadam-an, ang kalaglagan sang Babilonia nga Daku, ang inaway sa Armagedon, ang pagtagbong kay Satanas sa kadadalman, kag ang Isa ka Libo ka Tuig nga Paggahom ni Cristo. Daw ano ka importante nga hatagan naton sing igtalupangod ang paandam ni Jesus: “Yari karon! nagakari ako subong sang makawat. Malipayon ang isa nga nagapabilin nga nagamata kag nagatipig sang iya mga panapton.”​—Bug. 16:15.

¹¹ Nagapabilin bala kita nga nagamata? Daw ano ka serioso naton nga ginatamod ang matagnaon nga pulong? Nagdedikar man kita sang aton kabuhi kay Jehova sang nagligad nga 5 ka tuig ukon 50 ka tuig, ang pinamulong ni Pablo sa taga-Roma nga mga Cristiano naaplikar sing nagakaigo sa aton: “Nahibaluan ninyo ang panag-on, nga tion na ini nga inugmata ninyo sa katulugon, kay karon ang kaluwasan labing malapit na sa aton sangsa sadtong tion nga kita nangin mga tumuluo. Ang gab-i madalom na; ang adlaw malapit na.” Nian ginlaygayan ni Pablo ang mga Cristiano nga ‘isikway ang mga buhat sang kadudulman’ kag ‘maggawi sing nagakaigo.’ (Roma 13:​11-13) Nagakabuhi kita sa kalibutan nga nadulman katama sa moral. Ang tuman kalain nga buhat sadtong nagligad lamang nga 30 ukon 40 ka tuig normal sa madamong kalibutanon sa sining katapusan nga dekada sang ika-20 nga siglo. Mag-andam, mga kauturan, nga wala gid ninyo ginatugutan ang inyo kaugalingon nga madaldal pakadto sa kadudulman sang kalibutan kag mangin natuyo sa moral. Kon tugutan ninyo ang inyo kaugalingon nga mangin matinuguton sa manubo nga dalanon sang pagkabuhi sining kalibutan, mawasi ninyo ang dalagku nga mga hulusayon nga dapat lubaron sing dayon: ang pagbindikar sa soberanya ni Jehova kag ang pagpakabalaan sang iya ngalan. Ang espirituwal nga pagkatuyo nagabutang sa katalagman sang aton kaluwasan, nga malapit na katama karon.

¹² Magtubo sa Tinagipusuon nga Pag-apresyar Para sa Matagnaon nga Pulong: Ang dumaan nga mga Hebreong manalagna interesado katama sa katumanan sang ila mga tagna nahanungod sa Mesias. Naghimo sila sing “makugi nga pag-usisa kag mahalungon nga pagpanalawsaw” tuhoy sa katumanan sang katuyuan sang Dios. (1 Ped. 1:​10, 11) Subong man, samtang ginahatagan ninyo sing igtalupangod ang matagnaon nga pulong sa tulun-an sang Bugna, magatubo kamo sa pag-apresyar sa espirituwal nga mga butang. Ang inyo espirituwal nga gana magadugang, agod mapahulag kamo sa pagkutkot sa “madalom nga mga butang sang Dios.” (1 Cor. 2:10) Samtang ginapun-an ninyo ang inyo tagipusuon sing apresasyon para sa matagnaon nga pulong, indi na kinahanglan nga palig-unon kamo sang iban sa pagtambong sa mga miting; mapahulag kamo sa pagtambong kag sa pagpakigbahin sing tayuyon. (Luc. 6:45) Kag kon ang ‘pulong yara sa inyo kaugalingon nga tagipusuon,’ mapahulag kamo sa ‘pagpahayag sing dayag tuhoy sini para sa kaluwasan.’​—Roma 10:​8-10.

¹³ Samtang nagahingapos ang tion sang katapusan, mas madamong mauligyaton ang magauligyat sa aton bangod sang padayon naton nga pagtuo sa matagnaon nga mga pahayag sang Dios. (2 Ped. 3:​3, 4) Apang, padayon kita nga magamata sa matagnaon nga pulong. Ginapakita sa aton sang suga sang Pulong sang Dios kon diin na kita sa lakat sang panahon. Masanag ini nga nagasulo sang katunayan nga yara na kita sa katapusan nga mga adlaw sining madulom nga kalibutan. Ang kabugwason nagsubang! Si Cristo nagagahom na sa Ginharian! Nakita na naton ang pamanagbanag sang bag-ong adlaw. Kabay nga ang ginsaad nga bag-ong kalibutan sang Dios padayon nga mangin matuod sa aton subong nga ang Ginharian matuod sa tatlo ka apostoles nga may pribilehiyo nga makita ini sing una sa milagruso nga palanan-awon sang pagbaylo-dagway ni Jesus!