Magpakita sing Patugsiling sa Iban—Bahin 2
1 Kon mahimo, luyag naton huptan ang maayo nga mga kaangtanan sa mga tawo sa aton komunidad. Nagakinahanglan ini nga magpakita kita sing patugsiling kag pagtahod sa ila mga kinamatarong kag mga balatyagon.
2 Ang mga Saksi ni Jehova nakilal-an tungod sang maayo nga mga batasan. Ang aton mga talaksan sang pagginawi sa kasilingan, sa eskwelahan, sa trabaho, kag sa aton mga asambleya, nangin tema sang madamong maayong mga komento.—Tan-awa ang Hunyo 15, 1989, Lalantawan, pahina 20.
3 Ang maayo nga paggawi nagalakip sang pagkabunayag, pagkamapisan, kag maayong mga moral. Nagalakip man ini sang pagtahod sa mga pumuluyo nga nagapuyo sa palibot sang aton Kingdom Hall. Mahimo malimtan ang aton diosnon nga paggawi sa iban nga mga butang kon indi kita magmangin mapatugsilingon sa aton mga kaingod. Si Pablo naglaygay sa aton nga “maggawi sing takus sa maayong balita.”—Filip. 1:27.
4 Kon kaisa, ang mga pumuluyo nga nagapuyo malapit sa pila ka Kingdom Hall nagareklamo bangod sang ginahunahuna nila nga kakulang sing patugsiling sadtong nagatambong sa mga miting. Ang mga kauturan dapat maglikaw sa pagtipon sa higad-dalan sa atubangan sang Kingdom Hall kag sa pagsugilanon sing magahod nga mabatian sa kaingod nga mga balay. Ang kabataan indi dapat pagtugutan nga magdalagan paguwa-pasulod sang Kingdom Hall. Ang pataka nga pagsira sang ganhaan sang salakyan ukon pagbusina makatublag sa kasilingan. Ini nga sahi sang paggawi nagapabanaag sing dimaayo sa kongregasyon.
5 Ginreport ang kaanggid nga mga problema may kaangtanan sa pagparking sang mga salakyan. Ang mga salakyan indi dapat iparking sa pribado nga propiedad ukon sa mga lugar nga nagatublag sang trapiko ukon nagabalabag sang mga alagyan. Ang mga lugar nga palarkingan sa malapit nga mga negosyo indi dapat paggamiton luwas kon naghatag sila sing pahanugot. Subong man, importante nga sundon naton ang tanan nga regulasyon sa trapiko kon nagamaneho sa lugar.—Roma 13:1, 2, 5.
6 Ang Biblia nagalaygay sa aton nga “himuon ang tanan nga butang sa himaya sang Dios,” kag nagalakip ina sang pagpakita sing patugsiling sa mga tagaguwa. (1 Cor. 10:31-33) Kon aton ‘ginatuon ang mata sa personal nga mga interes sang iban,’ indi kita pataka nga magapasilabot sa ila propiedad. (Filip. 2:4) Likawan man naton ang pagtublag sa mga buhat sa negosyo sang lokal nga mga negosyante.
7 Ang pagpakita sing patugsiling sa iban—sa sulod kag sa guwa sang kongregasyon—isa ka naguwa nga pagpahayag kon ano ang aton ginabatyag sa aton tagipusuon. Ang ginahimo kag ginasiling naton dapat magpakita nga ‘ginahigugma naton ang aton mga isigkatawo subong sang aton kaugalingon.’—Mat. 7:12; 22:39.