Malipayon nga Dayawon si Jehova Adlaw-adlaw!
1 Ang makahalawhaw nga mga langit nagapahayag sang himaya ni Jehova “sa adlaw-adlaw.” (Sal. 19:1-3) Kon ang wala sing tingog, wala sing kabuhi nga mga tinuga dalayon nga nagahatag sing pagdayaw kay Jehova, indi bala kita nga intelihente nga mga tawo dapat mapahulag sa pagbayaw sang aton mga tingog sa pagdayaw sa iya sa tanan nga tion tungod sang iya dimatupungan nga mga kinaiya kag mga hinimuan? Sin-o pa ang takus sa aton malipayon nga pagdayaw sangsa aton halangdon nga Manunuga?—Sal. 145:3, 7.
2 Sa Adlaw-adlaw: Ang inspirado nga salmista nagsulat: “Sa adlaw-adlaw ibantala ang maayong balita sang iya kaluwasan. Kay si Jehova daku kag takus gid dayawon.” (Sal. 96:2, 4) Naaplikar lamang bala ini sa mga payunir? Indi! Nagakahulugan bala ini nga dapat naton tanan isugid sa iban ang nahanungod kay Jehova bisan san-o kag bisan diin nga masarangan naton, bisan sa mga adlaw nga wala kita nagapakigbahin sa pamalaybalay nga ministeryo? Huo! Ang kinahanglanon nga dayawon si Jehova sa adlaw-adlaw kag ibantala sa iban ang nahanungod sa iya paagi sang kaluwasan hilingagawon. Dapat mahibaluan sang mga tawo nga si Jehova amo ang Hari nga Dayon kag ginhatagan Niya sing pagginahom sa bug-os nga kalibutan ang Iya ginhimaya nga Anak, nga si Jesucristo. Bangod sang aton gugma kay Jehova kag sa katawhan, padayon naton nga ibantala ining mensahe kag ang iya mga aman para sa kaluwasan bisan diin nga may mga tawo.—Sal. 71:15.
3 Kada adlaw sadtong nagaministeryo sia sa duta, si Jesucristo nagpahamtang sing pinakamaayo nga halimbawa subong isa ka bunayag nga dumalayaw ni Jehova. Sia nagsiling: “Ginadayaw kita sing dayag, Amay, Ginuo sang langit kag duta.” (Mat. 11:25) Nahisuno gid sa iya pinamulong, bisan diin man si Jesus, gindayaw niya sing dayag si Jehova. Kag bisan diin man nga nagatipon ang kadam-an—ayhan sa mga sinagoga, sa templo sa Jerusalem, sa putukputukan sang bukid, ukon sa higad sang baybay—gindayaw niya si Jehova. Kon sundon naton sing suod ang mga tikang ni Jesus paagi sa paghimo sang adlaw-adlaw, dalayon nga hilikuton sa pagpakataas kay Jehova sing dayag, matigayon naton ang masinadyahon; makalilipay nga mga resulta.
4 Pagsabat sa Panawagan: Sabton mo bala ang panawagan nga dayawon si Jehova sing dayag sa adlaw-adlaw? Dumduma, ang edad indi kasablagan. Ang Salmo 148:12 nagaagda sa mga pamatan-on nga lalaki, mga ulay, mga tigulang nga lalaki, kag mga bata nga lalaki sa pagdayaw kay Jehova. Mga pamatan-on, dayawon bala ninyo si Jehova sa tunga sang inyo mga kabutho kag mga manunudlo sa sining bag-ong tuig sang pag-eskwela? Mga hamtong, nakabati bala ang inyo mga kaupdanan sa trabaho nahanungod kay Jehova kag sa iya mga katuyuan, kon may nagakaigo nga tion sa paghambalanay? Dapat naton tanan himuon ang pagsugid tuhoy kay Jehova nga bahin sang aton kabuhi kaangay sang pagginhawa kag pagkaon. Bisan wala ginasapak sang mga indi interesado ang aton ginasiling, may Isa nga nagasapak, kag sia magapadya sa aton.—Mal. 3:16.
5 Samtang nagahilapit ang katapusan sang sistema, ang panawagan nagalab-ot tubtob sa mga kaukbungan sang duta: “Dayawa ninyo si Jah!” (Sal. 106:1) Kabay nga ang aton singgit sang pagdayaw labi pa nga magabaskog sa pagligad sang tagsa ka adlaw agod mahibaluan sang tanan nga ang isa nga ang ngalan amo si Jehova amo ang Labing Mataas sa bug-os nga duta.—Sal. 83:18.