Himua ang Tanan Para sa Kahimayaan sang Dios
1 Daw ano ka makapapagsik ang makig-upod sa aton mga kauturan! (1 Cor. 16:17, 18) Ginahimo naton ini sa mga miting, mga asambleya, kag sa ministeryo. Nagainupdanay man kita kon may mga bisita kita nga nagaduaw sa aton puluy-an. Paagi sa sini, ginapakita naton ang pagkamaabiabihon kag nagapalig-on sa isa kag isa.—Roma 12:13; 1 Ped. 4:9.
2 Organisado nga Sosyal nga Pagtinipon: Bisan “nagakaon [man kita] ukon nagainom ukon nagahimo sing bisan ano nga butang,” dapat naton ‘himuon ang tanan nga butang para sa kahimayaan sang Dios.’ (1 Cor. 10: 31-33) Wala ginasunod sang iban ini nga laygay, gani masunson nga nagalutaw ang mga problema bangod sang dalagku nga sosyal nga pagtinipontipon diin may kalibutanon nga kalingawan. Halos kaangay ini sang kalibutanon nga mga pagtinipontipon, ang espiritu sini wala nagahisanto sa mga prinsipio sang Biblia.—Roma 13:13, 14; Efe. 5:15-20.
3 Ginareport nga madamong Saksi ang nagatipon sa gin-arkilahan nga mga pasilidad diin nagalingawlingaw sila paagi sa pag-iskeyt, pagsaot, kag pagkinaon. Bangod sang kabudlayan sa pagtatap sing nagakaigo sa subong sina kadaku nga mga grupo, ang mga problema naglutaw. Ang ginahod, pagpatuyang sa makahulubog nga mga ilimnon, kag bisan ang imoralidad nagresulta kon kaisa. (Efe. 5:3, 4) Ang subong sina nga sosyal nga pagtinipontipon wala nagapadungog kay Jehova. Sa baylo; nagapasipala ini sa kongregasyon kag nagapasandad sa iban.—1 Cor. 10:23, 24, 29.
4 Ang mga Cristiano ginapalig-on sa pagpakita sing pagkamaabiabihon, apang dapat padakuon ang espirituwal nga pagpalig-unay. (Roma 1:11, 12) Ang magagmay nga pagtinipon amo sa masami ang labing maayo. Ang Aton Ministeryo nga libro nagasiling sa pahina 135-6: “Kon kaisa, mahimo agdahon ang pila ka pamilya sa isa ka puluy-an para sa Cristiano nga pag-updanay. . . . Sing makatarunganon, ang mga nag-agda dapat magabatyag nga may personal nga salabton sa kon ano ang matabo. Nagahunahuna sini, ang mahantupon nga mga Cristiano nagakilala sa kaalam nga latiran ang kadakuon sang amo nga grupo kag ang kadugayon sang pagtinipon.” Ginpakita ni Jesus nga indi kinahanglan ang madamo nga handa kon ang aton tulumuron amo ang pagpalig-on sa aton mga abyan sa espirituwal.—Luc. 10:40-42.
5 Makalilipay magpakita sing pagkamaabiabihon sa mga masigka-Cristiano. Apang, daku ang kinatuhayan sang maugdang nga pagtinipon sa aton puluy-an kag sang magarbo nga pagtinipon nga nagapakita sang kalibutanon nga espiritu sa isa ka gin-arkilahan nga pasilidad. Kon ginaagda mo ang iban subong imo mga bisita, dapat mo huptan ang grupo nga magamay agod makontrol mo sing bug-os kon ano ang nagakatabo.
6 Paagi sa pagpakita sing kaugdang kag pagkamakatarunganon sa sosyal nga mga pagtinipontipon, ginahimaya naton ang aton Dios kag ginapalig-on ang iban.—Roma 15:2.