Ang Tanan Nalipay sa Pagguwa sang Bag-ong Libro sa Distrito nga Kombension—Ginapadaku sang Bag-ong Libro ang Ihibalo sang Dios
1 Sa aton distrito nga kombension sang Disiembre, daw ano gid ang aton kalipay sa bug-os nga programa! Sang Sabado sang hapon daku gid ang aton kalipay sang nabatian naton ang pahibalo nahanungod sa bag-ong libro, Ang Ihibalo nga Nagadul-ong sa Kabuhi nga Walay Katapusan, kag sa nagsunod nga impormasyon may kaangtanan sini. Ang binilyon ka tawo sa duta nagakinahanglan sing ihibalo nga Dios lamang ang makahatag—ang ihibalo tuhoy sa Dios kag tuhoy sa iya Anak, si Jesucristo.—Hulu. 2:1-6; Juan 17:3.
2 Daw ano kaathag ang paglaragway sang humalambal sa kaundan sang libro! Ang makawiwili nga mga tig-ulo sang kapitulo, ang praktikal nga mga ilustrasyon, ang positibo nga pagpresentar sang kamatuoran, ang dimasibod nga mga pamangkot, kag, sa katapusan sang tagsa ka kapitulo, ang kahon nga natig-uluhan “Tilawi ang Imo Ihibalo” nalakip sa mga bahin nga magaganyat sa tanan nga makabasa sini.
3 Sa nagahinakop nga mga pamulongpulong sang Sabado kag Domingo, ang pangpamilya nga pagtuon nga nagagamit sining bag-o nga libro ginpalig-on sa aton. Sa karon, mahimo nga pamilyar na kamo sa mga kaundan sini. Walay duhaduha nga ginhambalan na ninyo ang mga punto nga dapat hinumdumon kon nagatanyag sining bag-o nga libro sa latagon.
4 Mga Punto sa Repaso: Mahimo ninyo nadumduman nga sang ginhatag ang tema nga “Kon Ngaa ang Katawhan Nagakinahanglan sing Ihibalo sang Dios,” ginpadaku sang humalambal ang madamo nga punto, lakip ang masunod: (1) Kon ginagamit ninyo ining libro sa pagdumala sing mga pagtuon, indi maalamon nga ilakip ang dugang pa nga materyal, nga mahimo makapaburon sa pangunang mga punto; magkonsentrar lamang sa pagpaalinton kon ano ang ginapamatuod sang libro sa tagsa ka kapitulo. (2) Ang mga kapitulo hustuhan sing kalabaon agod masami ninyo matuptupan ang isa sa kada pagtuon ninyo. (3) Sa katapusan sang tagsa ka kapitulo, ang mga pamangkot sa kahon nga natig-uluhan “Tilawi ang Imo Ihibalo” magahatag sing isa ka malip-ot nga repaso.
5 Magamit sa mga Pagtuon sa Biblia: Ang pila ka manugbantala namangkot kon bala maalamon nga isaylo nila ang ila mga pagtuon sa Biblia sa sining bag-ong libro. Kon madugay na ninyo ginatun-an ang libro nga ginagamit ninyo karon, praktikal nga tapuson ang pagtuon sa sina nga publikasyon. Kon bag-o pa lang, ginarekomendar nga magsaylo kamo sa Ihibalo nga libro. Kon ginagamit ninyo ang isa ka brosyur ukon tract sa pagsugod sing isa ka pagtuon sa Biblia, sa nagakaigo nga tion, ipakilala ang bag-ong libro kag gamita ini sa inyo pagtuon sa Biblia sa puluy-an. Ang dugang nga impormasyon tuhoy sa paggamit sang Ihibalo nga libro magaguwa sa Ang Aton Ministeryo sa Ginharian sa masunod nga mga bulan.
6 Gin-aman ni Jehova ining bag-ong libro agod buligan kita sa pagtudlo sa iban nahanungod sa ihibalo nga nagadul-ong sa kabuhi nga walay katapusan. Kinahanglan kita karon maghanda sing maayo kag makigbahin sing bug-os sa hilikuton nga pagahimuon.