Kon Ini Epektibo, Gamita!
1 Ang Aton Ministeryo sa Ginharian padayon nga nagahatag sa aton sing nanuhaytuhay nga ginapanugda nga mga presentasyon para magamit sa ministeryo. Nagahatag ini sa aton sing bag-ong mga ideya sa kon paano pukawon ang interes sa mensahe sang Ginharian. Ayhan ginapanikasugan mo nga tun-an ang isa ukon kapin pa sini nga mga presentasyon kada bulan. Apang, nakita sang iban nga mga manugbantala nga pila pa lang gani ka beses nila nagamit ang isa sini, ang isa pa ka guwa sang Ang Aton Ministeryo sa Ginharian nagahatag sing bag-o naman nga mga presentasyon. Sing maathag, indi posible nga matun-an sang tanan ang bag-o nga presentasyon kon indi nila anay mahibaluan ang nauna.
2 Sa pagkamatuod, linibo ka payunir kag iban pa nga manugbantala ang nagahinguyang sing madamo nga oras sa pag-alagad sa latagon. Dugang pa, madamo nga kongregasyon ang nagatuptop sang ila bug-os nga teritoryo kada pila ka semana. Sa sining mga sirkunstansia, ginaapresyar sang mga manugbantala ang bag-ong mga paagi kag mga ideya sa pagpresentar sa mensahe. Nagabulig ini sa ila nga mapauswag ang ila mga ikasarang. Nagahimo man ini nga mangin mas makawiwili kag mabungahon ang ila ministeryo kag nagabulig sa ila nga maatubang ang mga hangkat.
3 Ano man ang kahimtangan, kon may nahanda ikaw nga isa ka presentasyon nga epektibo sa pagpalambo sing interes, padayon ini nga gamita! Indi kinahanglan nga untatan nimo ang paggamit sing epektibo nga presentasyon kon ini madinalag-on. Ibagay lamang ini sa tanyag nga literatura para sa karon nga bulan. Samtang ginarepaso mo ang mga panugda nga ginahatag sa Ang Aton Ministeryo sa Ginharian, pangitaa ang makawiwili nga mga punto nga luyag mo ilakip sa imo presentasyon.
4 Gani kon mabaton mo ang bag-o nga guwa sang Ang Aton Ministeryo sa Ginharian, dumduma nga ang mga presentasyon nga makita sa sini mga panugda lamang. Kon magamit mo ini, maayo. Apang kon may nakita na ikaw nga isa ka presentasyon nga epektibo sa inyo teritoryo, gamita ini! Ang importante nga butang amo nga ‘ginahimo mo sing bug-os ang imo ministeryo’ sa maayo nga paagi, nagapangita sa mga takus kag nagabulig sa ila nga mangin mga disipulo.—2 Tim. 4:5.