Daw Ano Kaayo nga Pirme Makatambong!
1 Sa sulod sang mga dekada sa Nasidlangan nga Europa, madamo sang aton pinalangga nga mga kauturan ang ginadilian sa pagmiting sing dayag. Handurawa lamang ang ila kalipay sang ginkuha ang mga pagdumili kag sang makatipon na sila sing hilway!
2 Nahanungod sa iya pagduaw sa isa ka kongregasyon, ang manugtatap sang sirkito nagsulat: “Sang Martes sang gab-i, sa pagsugod pa lamang sang akon pagduaw, ang sistema sa pagpainit naguba. Sa guwa, ang temperatura matugnaw gid kaayo, kag sa sulod, mga 40 digri Fahrenheit lamang ini. Ang mga kauturan nagalingkod nga nagasuksok sing kunop, panwelo, guwantes, kalo, kag bota. Indi masundan ni bisan sin-o ang mga kasulatan sa Biblia, kay mabudlay buksan ang pahina. Nagatindog sa plataporma nga nakaamerikana, nagakusog ako sa katugnaw, kag sa kada hambal ko, nagasungaw ang akon ginhawa. Apang nakadayaw gid ako bangod wala ni isa ka reklamo ako nga nabatian. Ang tanan nga kauturan nagsiling nga daw ano ka makalilipay kag kaayo nga makatambong!” Wala gani ginhunahuna sang mga kauturan nga indi nila matambungan yadto nga miting!
3 Amo Bala Sina ang Balatyagon Naton? Ginapakabahandi bala naton ang higayon nga makatipon sing hilway sa aton semanal nga mga miting? Ukon ginapasapayanan lang bala naton ang mga miting kon ang mga kahimtangan maayo? Ang tayuyon nga pagtambong sa mga miting mahimo nga indi mahapos, kag may mga tion nga may nagakaigo gid nga rason nga indi kita makatambong. Apang, indi pagkalimti, nga may yara sa tunga naton nga walay sapayan sang katigulangon, balatian, sablag sa lawas, masako nga iskedyul sa trabaho, kag iban pa mabug-at nga mga responsabilidad, nakita nila ang importansia sang mga miting kag halos pirme sila nagatambong. Daw ano kaayo nga mga halimbawa para ilugon naton!—Ipaanggid ang Lucas 2:37.
4 Himuon naton nga batasan nga suportahan ang matuod nga pagsimba paagi sa pagtambong sa aton tanan Cristianong mga miting, halin sa magamay nga pagtinuon sang grupo sa libro tubtob sa dalagku nga kombension. Ngaa dapat naton tamdon sing serioso gid ining mga pagtilipon? Bangod sugo sang Dios nga magtipon kita. Apang may iban pa importante nga mga rason. Kinahanglan naton tanan ang mga benepisyo sang panudlo sang Dios kag ang bulig sang balaan nga espiritu, nga ginabaton naton sa mga miting. (Mat. 18:20) Paagi sa pagbayluhanay sing pagpalig-on kon nagapakig-upod sa aton mga kauturan nagabakod kita.—Heb. 10:24, 25.
5 Sa pagbaylo-dagway, si Pedro nagsiling, “Manunudlo, maayo sa aton nga diri kita.” (Luc. 9:33) Amo man sina dapat ang balatyagon naton tuhoy sa aton tanan Cristianong mga miting. Sa pagkamatuod, daw ano kaayo nga pirme magtambong!