Dapat ‘Batunon Sang Tanan ang Pulong Sing Tinagipusuon’!
1 Minilyon ka tawo ang nagatuon sing Biblia upod sa mga Saksi ni Jehova. Agod mangin kalipikado para sa kabuhi nga walay katapusan, dapat nila ‘batunon sing tinagipusuon ang pulong,’ kaangay sa ginhimo sang 3,000 nga naghinulsol kag ginbawtismuhan sang adlaw sang Pentecostes 33 C.E. (Binu. 2:41) Ano nga salabton ang ginahatag sini sa aton karon?
2 Dapat naton buligan ang aton mga estudyante sang Biblia nga palambuon ang debosyon kay Jehova. (1 Tim. 4:7-10) Bangod sina, ang suplemento sang Hunyo 1996 nga Ang Aton Ministeryo sa Ginharian, parapo 20, nagapanugda: “Sa bug-os nga kurso sang pagtuon, mangita sing mga kahigayunan nga mapabakod ang apresasyon para sa mga kinaiya ni Jehova. Ipabutyag ang imo kaugalingon tudok nga mga balatyagon para sa Dios. Buligi ang estudyante sa paghunahuna may kaangtanan sa pagpalambo sing mainit, personal nga kaangtanan kay Jehova.”
3 Ang Hangkat nga Aton Ginaatubang: Bangod naimpluwensiahan sang butig nga relihion, ang kalabanan nga mga tawo kontento na sa porma sang pagsimba nga nagakinahanglan sing pinakadiutay lamang nga tion kag panikasog, nga wala nagakinahanglan sing bisan anong daku nga pagbalhin sa ila dalanon sang kabuhi. (2 Tim. 3:5) Ang hangkat nga aton ginaatubang amo ang pagpahangop sa aton mga estudyante sang Biblia nga indi lamang mangin mga tagpalamati sang pulong sang Dios ang kinahanglan sa matuod nga pagsimba. Dapat nila iaplikar sa ila kabuhi ang ila natun-an. (Sant. 1:22-25) Kon ang ila personal nga paggawi indi kalahamut-an sa Dios, dapat nila kilalahon ang ila obligasyon nga “magliso” kag himuon ang husto agod pahamut-an sia. (Binu. 3:19) Agod maagom ang kabuhi nga dayon, dapat sila ‘manikasog sing lakas’ kag magtindog sing malig-on para sa kamatuoran.—Luc. 13:24, 25.
4 Kon ginahambalan ang lainlain nga mga aspekto sang moralidad, pamangkuta ang imo estudyante sang Biblia kon ano ang iya pagtamod sa sining mga butang kag kon ano ang iya himuon kon nakita niya ang kinahanglanon nga maghimo sing mga pagbag-o sa iya kabuhi. Ipatuhoy ang iya igtalupangod sa organisasyon nga paagi sini ginatun-an niya ang kamatuoran, kag palig-una sia nga tambungan sing tayuyon ang mga miting sa kongregasyon.—Heb. 10:25.
5 Himuon naton nga aton tulumuron nga malab-ot ang tagipusuon sang estudyante paagi sa aton ginatudlo. Malipay kita samtang ginapahulag naton ang mga bag-uhan nga batunon ang pulong sang Dios sing tinagipusuon kag magpabawtismo!—1 Tes. 2:13.