Mga Manugtatap nga Nagapanguna—Ang Konduktor sa Pagtinuon sa Lalantawan

¹ Ang Lalantawan Nagabantala Sang Ginharian ni Jehova amo ang panguna nga aman sang “matutom kag mainandamon nga ulipon” sa paghatag sing espirituwal nga pagkaon sa aton “sa nagakaigo nga tion.” (Mat. 24:45) Ang gulang nga nagadumala sing Pagtinuon sa Lalantawan may daku nga responsabilidad subong sangkol nga manunudlo nga nagapahamtang sing maayo nga halimbawa sa Cristianong pagkabuhi.​—⁠Roma 12:​7; Sant. 3:⁠1.

² Agod makapanudlo sing epektibo, ang konduktor sa Pagtinuon sa Lalantawan dapat gid manikasog sa paghanda kada semana. Ginahimo niya ini sing mapinangamuyuon kag sing maayo. Ang iya hanuot nga interes sa kongregasyon mabanaag sa matuod nga panikasog nga malab-ot ang aton tagipusuon paagi sa materyal nga ginatun-an. Nagakonsentrar sia sa panguna nga mga punto sang leksion kag nagabulig sa aton nga mahangpan kon ano ang kaangtanan sini sa tema sang artikulo.

³ Ang iya maid-id nga paghanda nagalakip sang pagtan-aw sa mga kasulatan sing abanse agod hibaluon kon paano ini maaplikar. Ginapatalupangod niya ang Pulong sang Dios paagi sa pagpalig-on sa kongregasyon nga gamiton ang Biblia sa tion sang pagtuon. Kon ang isa ka importante nga punto wala makomentuhan sa kongregasyon ukon kon ang pag-aplikar sa panguna nga teksto wala mahatag, nagapamangkot pa sia sing espesipiko agod mapaguwa ang impormasyon. Sa sining paagi, ginabuligan niya kita nga matigayon ang husto nga paghangop kag mahibaluan kon paano iaplikar sa aton kabuhi ang aton ginatun-an.

⁴ Ang konduktor sa Pagtinuon sa Lalantawan nagapanikasog sing progresibo nga mapauswag ang iya mismo ikasarang sa pagpanudlo. Wala sia nagakomento sing madamo kundi nagapalig-on sa aton nga magkomento​—⁠sa aton kaugalingon nga mga tinaga, sa malip-ot, kag direkta sa punto. Sa pulupanag-on, mahimo niya kita pahanumdumon nga ang nahauna nga magakomento sa parapo dapat maghatag sing malip-ot, direkta nga sabat sa naimprinta nga pamangkot. Ang dugang pa nga mga komento gikan sa tumalambong mahimo magapatalupangod sa pagpadapat sa kasulatan, sa nagasuporta nga mga argumento, ukon sa praktikal nga aplikasyon sang materyal. Paagi sa pagpalig-on sang paghanda sing personal kag subong pamilya, ang konduktor sa Pagtinuon sa Lalantawan nagapanikasog nga mapukaw ang handum sang tanan nga makigbahin.

⁵ Subong “mga tawo nga gintudluan ni Jehova,” ginapabaloran naton ang “dulot nga mga tawo,” subong sang mga konduktor sa Pagtinuon sa Lalantawan, nga “nagapangabudlay sing lakas . . . sa pagpanudlo.”​—⁠Isa. 54:​13; Efe. 4:​8, 11; 1 Tim. 5:⁠17.