Ang Teokratikong Eskwelahan sa Pagministro para sa 2001

¹ May yara nagakaigo nga mga rason sa Kasulatan kon ngaa dapat kita makigbahin sing bug-os kon mahimo pa sa Teokratikong Eskwelahan sa Pagministro.​—⁠Hulu. 15:​23; Mat. 28:​19, 20; Binu. 15:​32; 1 Tim. 4:​12, 13; 2 Tim. 2:​2; 1 Ped. 3:⁠15.

² Ang programa para sa semanal nga pagbasa sa Biblia madugay na nga bahin sang eskwelahan. Katumbas ini sang pagbasa sing mga isa ka pahina sang Biblia kada adlaw. Sugod sini nga tuig, isa ka pagbasa sing Biblia ang ginatangdo man para sa tagsa ka semana sang nasulat nga repaso. Ang dugang pa nga pagbasa sa Biblia, nga gin-iskedyul sang nagligad nga tatlo ka tuig, natapos na. Apang kon luyag mo basahon ang Biblia sing labaw pa sa naiskedyul, makahimo ka sang imo kaugalingon nga programa sa pagbasa.

³ Ang Asaynment Num. 2 nagahanas sa mga utod nga lalaki para sa “dayag nga pagbasa” sang Pulong sang Dios. (1 Tim. 4:​13 ) Kon may asaynment ka sa pagbasa, ensayuha ini sing matunog sing liwat kag liwat. Mahimo nimo gamiton ang audiocassette recording sang Sosiedad sa Biblia agod mapauswag ang imo pagmitlang, pagbulubag-o sang hagyo sang tingog, kag ang iban pa nga mga aspekto sang maayo nga pagbasa.

⁴ Ang mga Asaynment Num. 3 kag Num. 4 napasad sa Reasoning nga libro, nga ginhanda para magamit sa ministeryo sa latagon. Kon ang gintangdo nga materyal mas madamo sangsa mahimo nga mabinagbinag mo sa sulod sang gintalana nga tion, pilia lamang ang labing praktikal para sa teritoryo sang inyo kongregasyon. Mahimo gamiton ang bisan ano man nga danyag nga nagakaigo sa inyo teritoryo.

⁵ Manikasog gid sing daku nga mahatag mo ang imo tanan nga asaynment sa eskwelahan. Maghinguyang sing tion sa paghanda sing maayo, kag maghambal sing tinagipusuon. Mangin tuburan ikaw sang pagpalig-on sa kongregasyon, kag makabenepisyo ka sing personal paagi sa pagpakigbahin sing bug-os tagipusuon sa Teokratikong Eskwelahan sa Pagministro sa 2001.