Balita Gikan sa Konstruksion sa Bethel
1 Nahibaluan namon nga interesado kamo tanan nga mahibaluan ang lakat sang hilikuton sa pagpatindog nga ginahimo sa Bethel kag gani nalipay kami sa paghatag sa inyo sang pinakaulihi nga balita. Sa ubos amo ang isa ka scale model sang mga pasilidad sang Bethel nga nagapakita kon ano ang hitsura sini kon mahuman ang bug-os nga konstruksion.
2 Nagsugod ang trabaho sang Marso 1999 kag sa karon ang masunod nga mga proyekto nahuman na: Ang bag-ong waste water treatment plant ginpatindog; ang bag-ong deep well ginkutkot; ang bag-ong 240,000-litros nga tangke sang tubig ginpatindog; ang bag-ong Literature Reception gintukod; ang bag-ong mga paradahan kag naatopan nga mga pasilyo ginhimo. Ang kalabanan sining mga proyekto nahuman antes ginpatindog ang bag-ong napulo-sing-panalgan nga residence building.
3 Ang pagbalayon kag mga dingding (outer shell) sang napulo-sing-panalgan nga residence building ginpatindog sang isa ka tagaguwa nga kontratista. Ginsugdan ini sang Nobiembre, 1999 kag nahuman sang Oktubre 2000. Gani ang kontrata natapos sing wala pa isa ka tuig. Ang finishing sa sulod sang tinukod, lakip na ang tanan nga trabaho may kaangtanan sa tubo sang tubig, koryente, kag air-conditioner ginhimo sang aton mismo mga kauturan. Sa karon may yara 18 ka International Servant halin sa 10 ka pungsod nga nagatrabaho sa aton proyekto. Upod sa ila amo ang 40 ka bug-os tion nga lokal nga mga boluntaryo kag 9 ka taga-Bethel.
4 Sa pagtukod sining napulo-sing-panalgan nga tinukod, 4,254 metros kubikos nga kongkreto ang gingamit. Kon ini nga kongkreto ginhimo nga dalan nga 3 ka metro ang kalaparon kag 150 ka milimetro ang kadamulon, magalawig ini sing halos napulo ka kilometros! Dugang pa, may kabilugan nga 775 ka tonelada nga reinforcing steel kag 42 ka tonelada nga structural steel ang gingamit sa tinukod. Ang tanan nga muwebles sa 130 ka hulot ginhimo mismo sang aton mga kauturan sa aton carpentry shop.
5 Para sa ano gamiton ang bag-ong residence building? May yara ini 130 ka hulot, gani makapaigo ini sa 260 ka manugpangabudlay sa Bethel. Dugang pa, ang Bethel infirmary, laundry, hulot-klasehan sang Ministerial Training School, librarya, kag iban pa nga mga opisina sayluhon sa bag-ong tinukod. Pagkatapos sini, ang kusina kag hulot-kalan-an sa daan nga residence building padakuan agod makapaigo ini sing 600 ka tawo. Kon amo, walay sapayan nga ang bag-ong residence building ginalauman nga mahuman sa Oktubre 2001, ayhan isa pa ka tuig ang kinahanglan agod mapakay-o sing maayo ang daan nga residence building.
6 Luyag namon kamo tanan pasalamatan tungod sa pinansial nga amot nga padayon ninyo nga ginahimo para sa sining proyekto. Sanglit mahimo ini magpadayon tubtob sa tuig 2002, ginapalig-on namon kamo nga padayunon ang pagpadala sang inyo kinabubut-on nga bulig tubtob mahuman ang proyekto. Palihug padayon man ninyo nga ipangamuyo ang pagpakamaayo ni Jehova sa proyekto, kay kon wala ini, ini mangin walay pulos.—Salmo 127:1.