Pagpalig-on sa mga Payunir

¹ Kita tanan nagakinahanglan sing pagpalig-on, kag ang mga payunir ilabi na nga nagapasalamat sa sini kon ang mga gulang magpakita sing interes sa ila. Ang isa ka payunir nga utod nga babayi nagsulat: “Luyag ko ipahibalo sa inyo ang akon daku gid nga pagpasalamat sa ‘mga gulang’ sa akon kongregasyon. . . . Daw subong bala nga sa tion nga kinahanglan ko gid ang ila pagsakdag kag pagpalig-on, si Jehova naghatag sa ila sang mga pulong sang kaalam nga kinahanglan ko mabatian.”

² Sa Enero, ang duha ka katapo sang Komite sa Pag-alagad makigsapol sa tanan nga payunir, kag isa ka balayan ang gin-aman para sa sining miting. Sa sini nga miting, maayo nga hibaluon kon ano ang sarang himuon agod malab-ot ang mga oras sang mga payunir, kay ang promedyo sa pungsod sang nagligad nga tuig sang pag-alagad 54.1 lamang. Sa Disiembre 31, ang mga regular payunir dapat nga nakareport na sing di-magkubos 280 ka oras. Yadtong wala pa makalab-ot sini dapat palig-unon nga bag-uhon ang ila mga iskedyul sa masunod nga walo ka bulan agod malab-ot ang ila tuigan nga tulumuron nga 840 ka oras. Yadtong maayo ang nahimo sa paglab-ot sa tulumuron nga oras dapat hatagan sing komendasyon.

³ Kon ang ila oras manubo, ang mga payunir madali nga maluyahan sing buot. Amo sina kon ngaa ginpanugda sa Ang Aton Ministeryo sa Ginharian sang Oktubre 1998, pahina 7, nga regular nga repasuhon sang Sekretaryo ang hilikuton sang mga payunir kag pahibaluon ang mga gulang, ilabi na ang Manugtatap sa Pag-alagad, agod mabuligan ang mga payunir sa bisan ano man nga problema antes ini magbug-at na kaayo amo nga mahimo sila mag-untat sa pagpayunir.

⁴ Pat-od gid nga ining tuigan nga miting upod sa mga payunir mangin pagpalig-on kag pagpapagsik sa ila, ‘nagapaambit sang pila ka espirituwal nga hiyas’ sa ila agod “mapalig-on” sila sa ila pagpayunir.​—⁠Roma 1:⁠11.