Repaso sa Teokratikong Eskwelahan sa Pagministro
Nakatakop-libro nga repaso sa materyal nga gintuptupan sa mga asaynment sa Teokratikong Eskwelahan sa Pagministro para sa semana sang Mayo 7 tubtob Agosto 20, 2001. Maggamit sing tuhay nga panid sang papel agod sulatan sang mga sabat sa madamong pamangkot nga masabat ninyo sa ginatugot nga tion.
[Pahibalo: Sa tion sang nasulat nga repaso, Biblia lamang ang mahimo gamiton sa pagsabat sa bisan anong pamangkot. Ang mga reperensya nga nagasunod sa pamangkot para sa imo personal nga panalawsaw. Ang pahina kag numero sang parapo mahimo nga indi makita sa tanan nga reperensya sa Ang Lalantawan.]
Sabta ang tagsa sang masunod nga mga pulong sing Husto ukon Sala:
1. Ang pangamuyo nga ginapatuhuyan sa Nehemias 2:4 isa nga may kahadlok bangod sang pagkawalay paglaum antes gid lang sang isa ka importante gid nga hitabo. [Semanal nga pagbasa sa Biblia; tan-awa ang w86 2/15 p. 25 par. 8.] Sala. Ang nahapay nga kahimtangan sang Jerusalem madugay na nga ginapangamuyo ni Nehemias sa “adlaw kag gab-i” (1:4, 6); sang ginhatagan sing pinasahi nga kahigayunan, si Nehemias nagpangamuyo liwat, sa amo ginhimo niya ang sulitsulit na niya nga ginahimo.
2. Ang tinaga nga “kongregasyon” ginabadbad gikan sa Griegong tinaga nga ek·kle·siʹa, nalakip sa sini nga termino amo ang ideya sang paghiusa kag alalangay nga pagsuporta. [w99 5/15 p. 25 par. 4] Husto.
3. Samtang ginalikawan sang mga alagad ni Jehova ang mga kinabatasan may kaangtanan sa kamatayon nga supak sa Pulong sang Dios, wala nila ginasikway ang tanan nga kinabatasan may kaangtanan sa kamatayon. (Juan 19:40) [rs-E p. 102 par. 4] Husto.
4. Sang panahon nga nagakabuhi si Job, sia lamang ang tawo nga matutom kay Jehova. (Job 1:8) [Semanal nga pagbasa sa Biblia; tan-awa ang w92 8/1 p. 31 par. 3-4.] Sala. Bisan pa nga wala na sing mas tumalagsahon pa sangsa kay Job subong isa ka tawo nga matarong, si Elihu, nga nagtadlong kay Job, nagdayaw sa matuod nga Dios kag ginbaton Niya subong matutom; mahimo may yara man iban pa nga matutom.
5. Ang katunayan nga ginsuportahan ni Saulo, ukon ni Pablo, ang iya kaugalingon paagi sa paghimo sing mga layanglayang nagapakita nga may kubos sia nga ginhalinan. (Binu. 18:2, 3) [w99 5/15 p. 30 par. 2–p. 31 par. 1] Sala. Si Pablo isa nga may Romano nga banwahanon, naggamit sing maayo gid nga Griego sa iya mga sinulatan, kag nagtuon sa tiilan sang respetado kaayo nga manunudlo nga si Gamaliel. (Binu. 22:3, 27)
6. Bisan pa nga si David nakahimo sing mabug-at nga mga sala, makasiling si Jehova nga sia “naglakat sunod sa akon sa bug-os niya nga tagipusuon” bangod sang mahinulsulon nga panimuot kag maayo nga mga kinaiya ni David. (1 Hari 14:8) [w99 6/15 p. 11 par. 4] Husto.
7. Tubtob nga wala kita nagasaad sing butang nga di-makasulatanhon, dapat naton himuon ang aton masarangan nga tumanon ang aton mga saad bisan pa matukiban naton sa ulihi nga mabudlay gali ini tumanon. (Sal. 15:4) [Semanal nga pagbasa sa Biblia; tan-awa ang w89 9/15 p. 28 par. 5] Husto.
8. Ginapakita sang Salmo 22:1 nga sa idalom sang pag-ipit nadula sing umalagi ni David ang iya pagtuo. [Semanal nga pagbasa sa Biblia; tan-awa ang w86 8/15 p. 20 par. 19.] Sala. Ang tawhanon nga reaksion ni David sa iya mabudlay nga kahimtangan wala nagpakita sang kakulang sing pagtuo, kay nagpadayon sia sa pagpangamuyo sing masinaligon para sa kaluwasan. (Sal. 22:16-19)
9. Ang Cristiano mahimo “matumba” may kaangtanan sa mga kapaslawan, kabang-awan, kag legal ukon pinansial nga mga pagbaliskad sang kahimtangan, apang sa bulig sang espiritu sang Dios kag sang Iya mahigugmaon nga mga sumilimba, indi sia ‘mapukan’ sing bug-os sa espirituwal. (Sal. 37:23, 24) [Semanal nga pagbasa sa Biblia; tan-awa ang w86 11/1 p. 29 par. 14.] Husto.
10. Ang Genesis kapitulo 1 nagatudlo nga gintuga sang Dios ang tanan nga butang sa sini nga duta sa anom ka 24-oras nga adlaw. [rs-E p. 126 par. 1] Sala. Ang rekord sang Biblia wala nagasiling nga ang mga ini 24-oras nga mga adlaw; ang Biblia masunson nga nagagamit sang termino nga “adlaw” sa paglaragway sa isa ka malawig nga panag-on sang tion. (2 Ped. 3:8)
Sabta ang masunod nga mga pamangkot:
11. Paano ‘ginhatagan sing kahulugan’ ni Esdras kag sang iya mga kabulig ang Kasuguan? (Neh. 8:8) [Semanal nga pagbasa sa Biblia; tan-awa ang w86 2/15 p. 26 par. 4.] Luwas sa maayo nga pagmitlang kag pagpadaku paagi sa hambal, si Esdras kag ang iya mga kabulig nagsaysay, ukon nagpaathag, sang Kasuguan kag nag-aplikar sang mga prinsipio sini agod mas madali ini mahangpan sang mga tawo.
12. Ang “kalipay ni Jehova” resulta sang ano? (Neh. 8:10) [Semanal nga pagbasa sa Biblia; tan-awa ang w86 2/15 p. 26 par. 9.] Subong sang ginapakita sang konteksto, “ang kalipay ni Jehova” resulta sang pagkuha sing paghangop sa Pulong sang Dios, pag-aplikar sing personal, kag pagsunod sa teokratikong panuytoy.
13. Ngaa ang mga “nagboluntaryo sa pagpuyo sa Jerusalem” ginpakamaayo? (Neh. 11:2) [Semanal nga pagbasa sa Biblia; tan-awa ang w86 2/15 p. 26 par. 12.] Ang pagbilin sang ila pinanubli nga mga pagkabutang kag pagsaylo sa Jerusalem nagresulta sa pila ka kagastuhanan kag mga disbentaha; ang mga nagapuyo sa sadto nga siudad mahimo man nga nadayag sa lainlain nga katalagman; isa ini ka dalayawon nga pagsakripisyo nga tungod sini ginpakamaayo sila.
14. Ngaa ginpalantang ni Ester ang pagsugid sa hari kon ano gid ang iya tuyo? (Est. 5:6-8) [Semanal nga pagbasa sa Biblia; tan-awa ang w86 3/15 p. 24 par. 18.] Indi ini bangod sang kakulang sing kaisog, kay posible nga patyon sia bangod sa pagpalapit pa lang niya sa hari; ayhan luyag niya anay makuha ang maayo nga kabubut-on sang hari; nadalahig man ang pagtuytoy sang Dios, kay ang masunod nga mga tion nagtugot sang pila ka hitabo. (Bastante na ang ideya)
15. Anong duha ka importante nga pamangkot ang ginasabat sa tulun-an sang Job? [si-E p. 95 par. 1] Ginasabat sini nga tulun-an ang mga pamangkot: Ngaa nagaantos ang mga walay sala? Ngaa ginatugutan sang Dios ang kalautan sa duta?
16. Ngaa ang laygay ni Elifaz nagpahanusbo kay Job kag wala magpalig-on sa iya? (Job 21:34; 22:2, 3) [Semanal nga pagbasa sa Biblia; tan-awa ang w95 2/15 p. 27 par. 5-6.] Bangod ginpasad ini sa personal nga mga ideya kag indi sa diosnon nga kaalam; indi ini matuod kag ginpasad sa di-husto nga mga paghunahuna.
17. Ano ang salmo? [si-E p. 101 par. 2] Ang salmo isa ka sagrado nga ambahanon ukon binalaybay nga gingamit sa pagdayaw kag sa pagsimba sa Dios.
18. Anong “wala sing pulos nga butang” ang padayon nga “ginakumod” sang mga pungsod, subong sang narekord sa Salmo 2:1? [Semanal nga pagbasa sa Biblia; tan-awa ang w86 8/15 p. 20 par. 5.] Sugod sang 1914 ang mga pungsod padayon nga ‘nagkumod’ (ukon, nagpamalandong) tuhoy sa paghupot sa ila awtoridad kag pagkasoberano sa baylo nga batunon si Jesucristo subong ang iya ni Jehova gintangdo nga Hari.
19. Anong praktikal nga leksion tuhoy sa pagkawalay pinasulabi ang matun-an naton gikan sa ministeryo ni Felipe may kaangtanan sa mga Samaritano kag sa Etiopianhon nga opisyal? (Binu. 8:6-13, 26-39) [w99 7/15 p. 25 par. 2] Indi gid kita dapat maghaumhaum nga ang mga indibiduwal sang isa ka nasyonalidad, rasa, ukon sosyal nga tindog indi mangin interesado sa maayong balita; dapat naton ibantala ang mensahe sang Ginharian sa “tanan nga sahi sang tawo.” (1 Cor. 9:19-23)
20. Paano gin-ilustrar ni Job ang iya pagtuo nga banhawon sia sang Dios gikan sa lulubngan, nga gintamod niya subong isa ka duog nga mapanaguan gikan sa iya mga problema? (Job 14:7, 13-15) [Semanal nga pagbasa sa Biblia; tan-awa ang w00 5/15 p. 27 par. 7–p. 28 par. 1.] Si Job nagpamulong tuhoy sa isa ka kahoy (ayhan sa kahoy nga olivo) nga mahimo pudlon ukon malaya bangod sang malawig nga tigpalamangag kag sa ulihi manalingsing liwat.
Ihatag ang (mga) tinaga ukon prase nga kinahanglanon sa pagkumpleto sa tagsa ka masunod nga pinamulong:
21. Ang Ester 8:17 nagasiling nga ang mga tawo “nagapakilala nga sila mga Judiyo”; kaangay man sa karon, ang “․․․․․․․․” sang “iban nga mga karnero” nagdampig sa ․․․․․․․․. (Bug. 7:9; Juan 10:16; Zac. 8:23) [Semanal nga pagbasa sa Biblia; tan-awa ang w86 3/15 p. 25 par. 14.]
22. Subong sang ginapakita sang Binuhatan 1:7, bisan pa nga si Jehova mahunahunaon gid sa ․․․․․․․․, ang iya adlaw sang paghusay magaabot subong sang ․․․․․․․․, kon san-o wala ini ginapaabot sang mga tawo. (2 Ped. 3:10) [w99 6/1 p. 5 par. 1-2]
23. Sa 2 Pedro 3:7, 10, ang mga termino nga “mga langit” kag “duta” ginagamit sa ․․․․․․․․; subong sang ginapakita sang konteksto, ang “duta” nagapatuhoy sa ․․․․․․․․. [rs-E p. 114 par. 2-4]
24. Ang mapuslanon nga komunikasyon ginapaposible sang kompiansa, pagsalig, kag paghangpanay, kag ining mga kinaiya nagaresulta kon ang pag-asawahay ginatamod subong isa ka ․․․․․․․․ nga relasyon kag may hanuot nga ․․․․․․․․ nga himuon ini nga madinalag-on. [w99 7/15 p. 21 par. 3]
25. Ang maayo nga impluwensia sang katubotubo makabulig sa aton nga ․․․․․․․․ ang moral kag espirituwal nga mga talaksan kag sa amo nagabulig sa aton nga alagaron si Jehova sing ․․․․․․․․. [w99 8/1 p. 24 par. 3]
Pilia ang husto nga sabat sa tagsa sang masunod nga mga pinamulong:
26. Ang ‘paglingkod [ni Mardoqueo] sa gawang sang hari’ nagapakita nga sia (bantay sang hari; isa sang mga opisyales ni Hari Asuero; nagahulat nga mag-atubang sa hari). (Est. 2:19, 20) [Semanal nga pagbasa sa Biblia; tan-awa ang w86 3/15 p. 24 par. 9.]
27. Subong sang ginarekord sa Job 19:25-27, si Job nagpabutyag sing pagtuo nga “makita [niya] ang Dios” amo nga (kahamut-an sia nga makakita sing palanan-awon; banhawon sia padulong sa langitnon nga kabuhi; buksan ang iya mga mata sang paghangop sa kamatuoran tuhoy kay Jehova). [Semanal nga pagbasa sa Biblia; tan-awa ang w94 11/15 p. 19 par. 17.]
28. Si Job ginadumdom sing labi na tungod sa iya (gugma; kaayo; pagbatas). (Sant. 5:11) [si-E p. 100 par. 41]
29. Ang pagsulat sa tulun-an sang Mga Salmo naglawig sing mga (tatlo ka gatos; lima ka gatos; isa ka libo) ka tuig. [si-E p. 101 par. 4]
30. Si (David; Asaf; Esdras) maathag nga amo ang katapusan nga manugtipon sang tulun-an sang Mga Salmo. [si-E p. 102 par. 6]
Ibagay ang masunod nga mga kasulatan sa mga pinamulong nga nalista sa ubos:
Neh. 3:5; Sal. 12:2; 19:7; 2 Tim. 3:16, 17; Sant. 5:14-16
31. Dapat handa kita nga gamiton ang aton kaugalingon kag indi matinaastaason nga mag-isol, nga ginatamod ang lakas nga pagpangabudlay subong nga ubos sa aton dignidad. [Neh. 3:5] [Semanal nga pagbasa sa Biblia; tan-awa ang w86 2/15 p. 25 par. 12, 19.]
32. Ang isa ka Cristiano nga nakahimo sing mabug-at nga sala dapat magtu-ad sang iya mga sala sa mga gulang. [Sant. 5:14-16] [rs-E p. 83 par. 9]
33. Samtang gingamit sang Dios ang mga damgo sa paghatag sing mga paandam, instruksion, kag tagna sa iya katawhan sang nagligad nga mga tion, nagaaman sia karon para sa aton kaluwasan paagi sa iya inspirado nga nasulat nga Pulong. [2 Tim. 3:16, 17] [rs-E p. 106 par. 2]
34. Kon luyag naton ang pagpakig-abyan sang Dios, dapat kita mangin bunayag sa sulod, nga wala sing pagkasalimpapaw. [Sal. 12:2] [Semanal nga pagbasa sa Biblia; tan-awa ang w89 9/15 p. 27 par. 1.]
35. Ang pagkamatinumanon sa kasuguan sang Dios makapapagsik sang kalag kag nagapasanyog sang kaayuhan sang isa. [Sal. 19:7] [Semanal nga pagbasa sa Biblia; tan-awa ang w00 10/1 p. 13 par. 4.]