Ang Pinakamalipayon nga mga Tawo sa Duta
1 “Malipayon ang katawhan nga ang ila Dios amo si Jehova!” (Sal. 144:15) Ginalaragway sining mga pulong ang mga Saksi ni Jehova subong amo ang pinakamalipayon nga mga tawo sa duta. Wala na sing mas daku pa nga kalipay sangsa kalipay nga maagom sa pag-alagad sa lamang matuod kag buhi nga Dios, si Jehova. Bangod sia ang “malipayon nga Dios,” ang mga nagasimba sa iya nagapabanaag sang iya kalipay. (1 Tim. 1:11) Ano ang pila ka aspekto sang aton pagsimba nga nagahimo sa aton nga malipayon katama?
2 Mga Rason sa Pagkalipay: Ginpasalig kita ni Jesus nga ang kalipay matigayon naton kon ‘mahunahunaon kita sang aton espirituwal nga kinahanglanon.’ (Mat. 5:3) Ang padayon nga pagtuon sa Biblia kag pagtambong sa tanan naton nga Cristianong mga miting amo ang nagapaayaw sining pagkinahanglan. Ang pagtuon sa kamatuoran sang Pulong sang Dios naghilway sa aton gikan sa relihiosong kabutigan kag kasaypanan. (Juan 8:32) Gintudluan man kita sang Kasulatan sang pinakamaayo nga paagi sang pagkabuhi. (Isa. 48:17) Bangod sini, naagom naton ang makapalig-on nga Cristianong paghiliupod sa sulod sang malipayon nga katilingban sang mga kauturan.—1 Tes. 2:19, 20; 1 Ped. 2:17.
3 Matigayon naton ang daku nga pagkakontento paagi sa pagtuman sang mataas nga talaksan sang Dios sa moral, kay nakahibalo kita nga nagaamlig ini sa aton kag nagapahalipay kay Jehova. (Hulu. 27:11) Ang isa ka reporter sang pamantalaan nagsiling: “Walay sapayan sang ila estrikto nga mga talaksan, indi gid makita sa mga Saksi ni Jehova ang kasubo. Sa kabaliskaran, makita sa [ila] mga pamatan-on subong man sa mga tigulang ang pinasahi nga kalipay kag pagkatimbang.” Paano naton mabuligan ang iban nga maeksperiensiahan ang aton makalilipay nga paagi sang pagkabuhi?
4 Buligi ang Iban nga Masapwan ang Kalipay: Ang kalibutan puno sing kasubo, kag ang mga tawo sa kabilugan may yara madulom nga panan-aw sa palaabuton. Apang, may masanag kita nga panan-aw, nakahibalo nga sa pila ka adlaw wala na sing magbatyag pa sing kasubo. (Bug. 21:3, 4) Busa, makugi kita nga nagapakigbahin sa ministeryo, nagapangita sang mga bunayag sing tagipusuon nga mga tawo nga mapaambitan naton sing aton paglaum kag sang aton pagtuluuhan tuhoy kay Jehova.—Ezeq. 9:4.
5 Ang isa ka payunir nga utod nga babayi nagsiling: “Wala na sing makaalayaw pa sangsa magbulig sa mga tawo nga makilala si Jehova kag mahibaluan ang kamatuoran.” Himuon naton ang aton tanan nga masarangan sa pagpalig-on sa madamo pa nga batunon ang mga pagtuon sa Biblia sa puluy-an. Ang pag-alagad kay Jehova kag pagbulig sa iban nga alagaron sia nagahatag sing labing daku nga kalipay.—Binu. 20:35.