Pag-apresyar sa mga Aman ni Jehova
1 Ginaaman ni Jehova ang aton espirituwal nga mga kinahanglanon paagi sa matutom nga “ulipon.” (Mat. 24:45-47) Lakip sa sining mga aman amo ang mga libro, Biblia, mga magasin, mga video, mga audiocassette, kag mga CD sa kompyuter para sa pagpanalawsaw sa Biblia. Sa pagkamatuod makasiling kita nga ginaaman sing bugana ang aton kinahanglanon sa espirituwal nga paagi!
2 Ining mga aman ginahimo sa daku katama nga kagastuhanan. Ining galastuhan ginaabaga sang bug-os kalibutan nga paghiliutod. Matuod gid ini, ilabi na pagkatapos maorganisar ang bag-o nga kahimusan sa donasyon sang tuig 2000, ang pagtatap sa galastuhan sugod sadto nagadepende lamang sa kinabubut-on nga mga amot. Ining mahigugmaon nga kahimusan nagapaposible sa mga kauturan nga matigayon ang ila mga kinahanglanon para sa mga miting kag sa pag-alagad sa latagon bisan pigado sila katama.
3 Kon Paano Kita Makabulig: Masunod naton ang laygay ni Pablo nga magpaambit sa iban “suno sa ila mga kinahanglanon.” (Roma 12:13) Kon nagaamot kita sa bug-os kalibutan nga hilikuton, ginapaambit naton sing direkta sa mga kauturan sa bug-os nga kalibutan kon ano ang yara sa aton. Bangod sini, madamo ang namat-od nga “magpain” agod makaamot kada semana ukon kada bulan, kaangay sang ginahimo nila sa mga galastuhan sa Kingdom Hall. (1 Cor. 16:2) Sa paghimo sini, ginapakita nila nga ginakilala nila nga ining pundo wala lamang ginagamit sa paghimo sang mga literatura kundi sa tanan nga bahin sang bug-os kalibutan nga hilikuton. Sa amo ang aton mga amot indi dapat tamdon subong bayad sa mga literatura, kundi subong aton amot sa bug-os kalibutan nga hilikuton.
4 Mangin “Maalwan sa Inyo Amot”: Ginapakita sining mga pinamulong sa 2 Corinto 9:13 ang husto nga panimuot sa paghatag. Yadtong madawadawa luyag maghatag sing kapin sangsa ginahatag sang iban agod mabuligan ang mga kubos, busa nagakatabo ang “pag-alalangay.” (2 Cor. 8:14, 15) Sa tanan nga nagaamot sang ila masarangan sa bug-os kalibutan nga hilikuton, pigado man ukon manggaranon, si Jehova nagasaad nga ibubo niya “ang pagpakamaayo tubtob nga wala na sing kakulang.” (Mal. 3:10) Kabay nga mangin takus ang tagsa sa aton sa sining pagpakamaayo paagi sa indibiduwal nga pagpakita sang aton apresasyon sa tanan nga maalwan nga aman ni Jehova!