Ang Teokratikong Eskwelahan para sa Ministeryo sa 2004
1 Ginasangkapan ni Jehova ang ordinaryo nga mga tawo agod mahimo ang hilikuton nga may bug-os kalibutan nga importansia. Ang isa ka paagi nga ginahimo niya ini amo ang paghanas nga ginaaman kada semana sa Teokratikong Eskwelahan Para sa Ministeryo. Nagapakigbahin ka bala sing bug-os tubtob ginatugot sang imo mga kahimtangan? Sa Enero ang pila ka pagbag-o himuon agod labi pa gid nga mabuligan ang mga estudyante nga makabenepisyo sa sining mga kahimusan.
2 Pagbulosbulos Sang Kabulig nga Manuglaygay: Ang mga kauturan nga lalaki nga nagahatag sing mga pamulongpulong sa pagtudlo kag sang mga dalagku nga punto sa Biblia nagapasalamat gid sa mga obserbasyon nga ginhatag sang kabulig nga manuglaygay. Kon may bastante nga kalipikado nga mga gulang, sarang mabuslan ang kabulig nga manuglaygay kada tuig. Sa sining paagi, sarang mabahinbahin ang hilikuton; apang ang mas importante, amo nga makabenepisyo ang mga gulang kag mga ministeryal nga alagad gikan sa kabug-usan nga eksperiensia sang nagkalainlain nga sangkol nga mga humalambal kag mga manunudlo.
3 Pag-iskedyul Sang Oral nga Repaso: Kon may sirkito nga asambleya ang inyo kongregasyon sa semana sang oral nga repaso, nian ang repaso (kag ang nabilin nga iskedyul sa semana) kag ang eskedyul sa masunod nga semana dapat magbuslanay. Apang, indi kinahanglan nga magbayluhanay ang bug-os nga duha ka semana nga iskedyul kon matuon ang oral nga repaso sa pagduaw sang manugtatap sa sirkito. Sa baylo, ang ambahanon, ang pamulongpulong sa kalidad sa paghambal, kag ang mga dalagku nga punto sa Biblia dapat ipresentar suno sa iskedyul. Ang nagatudlo nga pamulongpulong (ihatag pagkatapos sang pamulongpulong sa kalidad sa paghambal) dapat kuhaon sa iskedyul sang masunod nga semana. Ang mga dalagku nga punto sa Biblia sundan sang tunga sa oras nga Miting sa Serbisyo, nga sarang mapasibu agod puede nga may mga bahin nga tatlo ka tig-10 ka minuto ukon duha ka tig-15 minutos nga bahin. (Wala sing nagabukas nga pahibalo.) Ang Miting sa Serbisyo dapat sundan sang ambahanon kag tunga sa oras nga programa sang manugtatap sa sirkito. Ang Teokratikong Eskwelahan Para sa Ministeryo sa masunod nga semana himuon suno sa gin-iskedyul nga pamulongpulong sa kalidad sa paghambal kag mga dalagku nga punto sa Biblia, nga pagasundan sang oral nga repaso.
4 Himusli ang tagsa ka kahigayunan nga magtubo sa espirituwal. Samtang nagabenepisyo ka gikan sa pagpanudlo sang Teokratikong Eskwelahan Para sa Ministeryo, mapalig-on mo ang imo kongregasyon, may bahin sa pagtuman sa tagna sang Biblia, kag madayaw ang Awtor sang makatilingala nga mensahe nga dapat naton ibantala.—Isa. 32:3, 4; Bug. 9:19.