Eskwelahan nga Nagabulig sa Aton sa Paghimo Sing Praktikal nga Aplikasyon
1 Samtang ginabinagbinag naton ang mga materyal sa Iskedyul Sang Teokratikong Eskwelahan Para sa Ministeryo sa 2006, ginatinguhaan gid naton nga makabenepisyo sa Makasulatanhon nga mga panudlo paagi sa pag-aplikar sini sa aton sagrado nga pag-alagad kag inadlaw nga pagkabuhi. Luyag gid naton nga iaplikar ang mga butang nga aton natun-an.—Juan 13:17; Fil. 4:9.
2 Pagkomento: Ang iskedyul sa sining tuig naghatag sing dugang nga minuto para sa pagpakigbahin sang mga tumalambong sa talalupangdon nga mga punto sa Biblia. Nagakahulugan ini nga dapat tapuson sang utod nga may bahin sa talalupangdon nga mga punto sa sulod sang lima ka minuto sa baylo nga anom. Ang mga nagakomento man nga tumalambong dapat mangin mahunahunaon sa ila tayming. Ang abanse nga pagpamensar makabulig sa magakomento nga makapabutyag sing mabuligon nga mga impormasyon sa sulod sang 30 segundo ukon kubos pa. Mga napulo ka utod ang dapat nga makakomento sa sulod sang lima ka minuto nga ginpain para sa mga tagpalamati.
3 Mga Pamulongpulong nga Makatudlo: Ang talalupangdon nga mga punto sa Biblia kag pamulongpulong sa pagtudlo dapat isentro sa kapuslanan sang materyal kag sa pag-aplikar sini sa aton ministeryo kag sa iban pa nga bahin sang aton matag-adlaw nga pagkabuhi. Indi lang kay pukawon sang may bahin ang mga tagpalamati nga handumon nga iaplikar ini. Sa baylo ihambal niya kon ano ang dapat himuon, ipakita kon paano ini mahimo, kag isugid ang kaayuhan sa paghimo sini. Ayhan isiling niya, “Amo ini ang panuytoy sang teksto sa aton,” ukon “Amo sini ang paggamit naton sang teksto sa ministeryo.” Ang mga gulang kag mga ministeryal nga alagad nga nakahibalo sang lokal nga mga kahimtangan dapat magtinguha sa paghimo sing praktikal nga aplikasyon sa materyal sing espesipiko tubtob posible.
4 Ang pagsambit sang mga halimbawa sa Biblia mahimo mangin epektibo sa paghimo sing praktikal nga aplikasyon. Pagkatapos nga masambit ang isa ka Makasulatanhon nga halimbawa, mahimo magsiling ang may bahin, “Mahimo nga amo man sini ang imo kahimtangan.” Dapat niya siguruhon nga ang bisan ano nga aplikasyon sa mga halimbawa sang Biblia nahisuno sa konteksto, kag sa Biblia sa pangkabilugan, sa mga nabalhag na sang “matutom kag mainandamon nga ulipon.”—Mat. 24:45.
5 Ang kaalam amo ang ikasarang sa paggamit sang ihibalo kag paghangop sing madinalag-on. “Ang kaalam amo ang panguna nga butang.” (Hulu. 4:7) Samtang nagakuha kita sing praktikal nga kaalam paagi sa aton pagtuon sa Teokratikong Eskwelahan Para sa Ministeryo, kabay nga pauswagon man naton ang aton ikasarang sa pagpaambit sini sa iban.