Isa ka Pamatuod Sang Pagtuo!
1. Anong makatulublag nga mga hitabo ang gintagna ni Jesus?
1 Namati sing maayo ang mga apostoles samtang nagapamulong si Jesus tuhoy sa iya presensia kag sa konklusion sang sistema sang mga butang. Gintagna ni Jesus nga ang katawhan matublag sang inaway, kakulang sing pagkaon, linog kag epidemia sang balatian. Nian nagsiling si Jesus nga dumtan ang iya mga sumulunod, magaantos sing kapipit-an, kag pagapatyon. Magaluntad ang butig nga mga manalagna kag magapatalang sa madamo. Magaugdaw man ang gugma sang madamo.
2. Ngaa talalupangdon gid ang pagbantala sing maayong balita sa bug-os nga kalibutan?
2 Bangod sini, nakibot gid ang mga apostoles sang nagsiling si Jesus nga ibantala ang maayong balita sang Ginharian sang Dios sa bug-os nga duta. (Mat. 24:3-14) Makita naton karon ang talalupangdon nga katumanan sini nga tagna. Bisan pa mabudlay ang aton kahimtangan, makugi nga nagabantala ang mga Saksi ni Jehova sing maayong balita. Samtang nagaugdaw ang gugma sa kalibutan, nagadabdab naman ang aton gugma. Bisan pa ginadumtan kita sang “tanan nga pungsod,” ginabantalaan naton ang halos tanan nga pungsod.
3. Ano ang imo nakita nga makapalig-on sa bug-os kalibutan nga report?
3 Makapalig-on gid nga marepaso ang hilikuton sang mga Saksi ni Jehova sang nagligad nga tuig sang pag-alagad subong sang makita sa tsart sa pahina 3 tubtob 6. Sa sulod sang 16 ka pasunod nga tuig, kapin sa isa ka bilyon ka oras kada tuig ang aton ginhinguyang sa pagbantala kag paghimo sing disipulo. Isa gid ini ka pamatuod sang pagtuo! Nag-uswag man sing 5.8 porsiento ang kadamuon sang mga payunir, 3.1 porsiento sa mga manugbantala, kag 4.4 porsiento sa mga pagtinuon sing Biblia. Ang mga nabawtismuhan nag-uswag man sing 20.1 porsiento kon ipaanggid sa nagligad nga tuig sang pag-alagad. Makalilipay mahibaluan nga halos pito ka milyon na ang nagaalagad sing matutom kay Jehova. Amo ini ang pinakamadamo sa kasaysayan sang tawo! Kon usisaon mo ang tsart, ano ang imo nakita nga nagpalig-on gid sa imo?
4. Ano nga kabudlayan ang nalandas sang isa ka tawo sa iya pagpanikasog nga mabawtismuhan?
4 Bisan pa mataas ang estadistika nga imo nakita, indi naton pagkalimtan nga nagapatuhoy ini sa mga tawo nga napamatud-an nga matutom. Binagbinaga halimbawa si Guillermo nga nagdaku sa Bolivia. Natawo sia sang 1935, kag sang nuebe anyos sia, nagtrabaho na sia sa plantasyon sang coca. Bata pa lang sia, nagamama na sia sang dahon sang coca agod nga mapahaganhagan ang kakapoy sang iya pagpamug-at. Sang ulihi nangin palahubog man sia kag nagpanigarilyo. Sang natun-an niya ang mga ginapatuman ni Jehova sa iya, nag-untat si Guillermo sa pagpanigarilyo kag pagpahubog. Apang, nabudlayan gid sia mag-untat sa pagmama. Padayon sia nga nangamuyo kag nalandas niya ini. Ginbiyaan niya ang iya mga bisyo kag nabawtismuhan. “Karon,” siling niya, “matinlo na kag malipayon ang akon pagkabuhi.”
5. Ano ang imo handum?
5 Interesado gid si Jehova sa mga tawo. Handum gid niya nga maghinulsol ang tanan. (2 Ped. 3:9) Amo man sini ang aton handum. Kabay nga pahulagon kita sang aton gugma nga himuon ang aton bug-os nga masarangan agod padayon nga mabuligan ang mga bunayag sing tagipusuon nga makakilala kag mahigugma si Jehova.