Malantipon nga Paggamit sing Biblia
1. Ngaa mapuslanon gid ang Biblia?
1 Ang malantipon nga paggamit sang inspirado nga Pulong sang Dios, nagabulig sa aton nga mabantala kag matudlo sing maathag ang kamatuoran kag mabuyagyag ang butig nga mga panudlo kag tradisyon sang mga tawo.—2 Tim. 2:15; 1 Ped. 3:15.
2. Ano ang makabulig sa aton agod mangin malantipon kita sa pagpangita sang mga teksto?
2 Mangin Pamilyar Pa Gid sa Biblia: Mangin lantip pa gid kita sa paggamit sang bisan ano nga kagamitan kon pamilyar na kita sa sini. Ang pagbasa sang bug-os nga Biblia nagahatag sa imo sang paghangop parte sa tema sang Biblia. Magabulig man ini sa imo nga madumduman ang mga teksto kag mas mahapos mo ini makit-an. Kon pamilyar ka sa Kasulatan, mangin mas makugi ka kag may kompiansa sa pagpanaksi sa iban sing di-pormal kag sa ministeryo sa latagon.—1 Tes. 1:5.
3, 4. (a) Ano ang pila ka paagi agod mangin pamilyar pa gid kita sa Biblia? (b) Natilawan mo na bala ang iban nga pamaagi agod mangin pamilyar ka pa gid sa Kasulatan?
3 Himua nga kinabatasan ang pagbukas sang imo Biblia kag sundan ang pagbasa sini sa tion sang mga miting. Kon nagatuon sing personal kag nagahanda para sa mga miting sang kongregasyon, pangitaa ang ginasambit nga mga teksto sa Kasulatan kag pamalandungi kon ano ang aplikasyon sini. Nasapwan sang madamo nga ang pagbasa sing direkta sa Biblia sa baylo nga sa kompyuter ukon sa gin-imprinta nakabulig sa ila nga makita sing mas madali ang mga teksto sa tion nga kinahanglan nila ini sa ministeryo.—Juan 14:26.
4 Nagaiskedyul sing tion ang pila ka pamilya agod magsaulo sang mga teksto sa Biblia. Mahimo ini paagi sa paggamit sang mga kard nga nasulatan sang kaundan sang teksto sa atubang kag sa likod amo ang teksto. Ginagamit nila ini agod mahibaluan kon madumduman pa nila ang kaundan sang teksto ukon kon sa diin ini nga teksto. Mangin lantip pa gid kita kon ginaensayo naton ang mga presentasyon para sa pag-alagad sa latagon kag ginahandaan ang pagsabat sa mga pagpamatok ukon pamangkot paagi sa Biblia.
5. Ngaa luyag naton pauswagon ang aton kalantip sa paggamit sing Biblia?
5 Wala na sang iban pa nga libro nga mas mapuslanon sangsa Biblia. Nagaunod ini sing mga sinulatan nga ‘nagapaalam sa mga tawo sa ila kaluwasan.’ (2 Tim. 3:15) Sanglit ang kalabanan sang mga tawo sa aton teritoryo indi pamilyar sa hamili nga bahandi nga masapwan sa Biblia, may maayo kita nga rason nga pauswagon ang aton kalantip sa pagsugid sa ila kon ano gid ang ginatanyag sang Biblia.—Hulu. 2:1-5.