Kinahanglan Mangamuyo sang Cristianong mga Ministro
1. Ano ang dapat naton himuon para matuman ang aton ministeryo?
1 Indi naton matuman ang aton ministeryo sa aton kaugalingon lamang. Ginahatagan kita ni Jehova sing kusog agod matuman ini. (Fil. 4:13) Ginagamit niya ang iya mga anghel sa pagbulig sa aton para masapwan ang tulad karnero nga mga tawo. (Bug. 14:6, 7) Si Jehova amo ang nagapatubo sang mga binhi sang kamatuoran nga aton gintanom kag ginbunyagan. (1 Cor. 3:6, 9) Importante gid para sa nga Cristianong mga ministro nga mangamuyo sa aton langitnon nga Amay!
2. Ano ang pila ka butang nga mahimo naton ipangamuyo?
2 Para sa Aton Kaugalingon: Dapat kita mangamuyo sa tion sang aton pagbantala. (Efe. 6:18) Ano nga mga butang ang mahimo naton mapangamuyo? Mahimo naton ipangamuyo ang positibo nga panimuot tuhoy sa aton teritoryo kag mangayo sing kaisog. (Binu. 4:29) Dapat naton pangabayon si Jehova nga tuytuyan kita sa mga interesado para matun-an sila sa Biblia. Kon mamangkot ang tagbalay, mahimo kita makapangamuyo sing makadali, nga indi matalupangdan sang tagbalay, sa pagpangabay kay Jehova nga buligan kita nga makasabat sing nagakaigo. (Neh. 2:4) Mahimo man kita makapangayo sing kaalam agod mangin prioridad naton ang ministeryo. (Sant. 1:5) Dugang pa, nalipay si Jehova kon ginalakip naton sa pangamuyo ang pagpasalamat sa aton pribilehiyo sa pag-alagad sa iya.—Col. 3:15.
3. Paano ang pangamuyo para sa iban makabulig sa pagpasangkad sang pagbantala?
3 Para sa Iban: Dapat man naton ‘ipangamuyo ang isa kag isa,’ kag sambiton pa gani ang ila ngalan kon nagakaigo. (Sant. 5:16; Binu. 12:5) Nalimitehan bala sang balatian ang imo mahimo sa pagbantala? Nian ipangamuyo ang imo masigkaministro nga may maayong panglawas. Indi pagpakadiutaya ang mahimo sang imo pangamuyo para sa iban! Nagakaigo man nga ipangamuyo naton ang mga opisyal sang gobierno nga mangin paborable ang ila pagtamod sa aton pagbantala, para ang aton mga kauturan ‘magkabuhi sing matawhay kag malinong.’—1 Tim. 2:1, 2.
4. Ngaa dapat kita magpadayon sa pangamuyo?
4 Ang pagbantala sang maayong balita sa bilog nga duta isa ka daku nga asaynment. Kon “magpadayon [kita] sa pagpangamuyo,” matuman naton ang buluhaton sa bulig ni Jehova.—Roma 12:12.