Makabantala Ka Bala Kon Domingo?
1. Ano ang matun-an naton sa ginhimo ni Pablo kag sang iya mga kaupod sa Filipos?
1 Adlaw nga Inugpahuway sadto, ang adlaw nga nagapahuway ang kalabanan nga Judiyo sa Filipos. Nagbisita si Pablo kag ang iya mga kaupod sa sini nga siudad sa isa nila ka paglakbay subong misyonero. Kon magpahuway sila sa ila pagbantala sa sina nga adlaw, wala gid sing may makuwestion sa ila. Apang, nahibaluan nila nga nagatilipon ang mga Judiyo sa gua sang siudad para mangamuyo, gani gingamit nila ini nga kahigayunan para magbantala sa ila. Nalipay gid si Pablo kag ang iya mga kaupod sang namati si Lidia kag nabawtismuhan, pati na ang iya bug-os nga panimalay! (Binu. 16:13-15) Madamo man sa karon ang nagapahuway kon Domingo, gani ngaa indi ka magpain sing tion para mabantalaan sila?
2. Ano nga mga kabudlayan ang nalandas sang katawhan ni Jehova para makabantala sing hilway kon Domingo?
2 Mga Panikasog nga Makabantala Kon Domingo: Sang 1927, ginpalig-on ang katawhan ni Jehova nga magpain sing tion sa pagbantala kon Domingo. Apang, ginpamatukan ini gilayon. Madamo ang gin-aresto sa Estados Unidos bangod sa pagsupak sa kasuguan sang Domingo nga Adlaw nga Inugpahuway, pag-isturbo sa kalinong, kag pagbaligya bisan wala sing lisensia. Apang wala nag-untat ang katawhan ni Jehova. Sang katuigan 1930, nag-organisar sila sing mga grupo, nga ang mga manugbantala sa lainlain nga kongregasyon nagtipon para kobrehan ang isa ka teritoryo. Sang gin-aresto ang mga manugbantala, nangampo ang mga awtoridad kay tuman sa ila kadamo. Wala ka bala nagapasalamat sa sakripisyo sadto nga mga utod kay bangod sa ila wala na kita ginahingabot sa pagbantala kon Domingo?
3. Ngaa maayo nga adlaw ang Domingo para sa pagbantala?
3 Pinakamaayo nga Adlaw sa Pagbantala: Madamo nga tawo ang ara lang sa balay kon Domingo kag nagarelaks. May mga nagsimba sina nga adlaw nga mahimo manamian mag-istorya parte sa Dios. Kon Domingo ang aton miting, pormal na ang aton bayo, gani ngaa indi naton pagplanuhon nga magbantala antes ukon pagkatapos sang miting? Kon kinahanglanon, magdala lang kita sing diutay nga merienda.
4. Ano ang mabatyagan naton kon magpain kita sing tion sa pagbantala kon Domingo?
4 Kon magpain kita sing tion sa pagbantala kon Domingo, may tion pa kita para magpahuway. Kon magpahuway gid man kita, may upod ini nga kalipay kay nakapakigbahin na kita sa sagrado nga pag-alagad. (Hulu. 19:23) Mas labi pa gid ang aton kalipay kon makasapo kita sing kaangay ni Lidia!