The Wonders of Creation Reveal God’s Glory
Madamo ang nanamian sa pagtan-aw sa mga tinuga. Pero madamo ang wala nakahibalo nga ang mga tinuga nagasugid sa aton sang panghunahuna kag balatyagon sang aton Dakung Manunuga. (Roma 1:20) Si David nakatuon sadto parte kay Jehova paagi sa Iya inspirado nga Pulong. Pero paagi sa iya “pagpamalandong” sa mga tinuga nangin suod sia sa Dios. (Sal. 8:3, 4) Ang video nga The Wonders of Creation Reveal God’s Glory makabulig sa aton, sa aton kabataan, kag sa aton mga estudyante sa Biblia nga maapresyar ang pila sang mga tinuga ni Jehova, matun-an ang mga kinaiya kag personalidad sang aton Dakung Manunuga, kag mangin suod pa gid sa iya. Pagkatapos mo ini matan-aw, tilawi nga sabton ang masunod nga mga pamangkot.
(1) Paano ang kadakuon kag ang pagkaorganisado sang aton uniberso magapahulag sa imo nga dayawon pa gid si Jehova? (Isa. 40:26) (2) Kon usisaon naton ang tubig, ano ang matun-an naton parte sa Dios? (Bug. 14:7) (3) Paano ang kadakuon sang duta kag ang distansia sini sa adlaw nagapakita sang kaalam ni Jehova? (4) Ano ang katuyuan sang bulan? (Sal. 89:37) (5) Paano gindesinyo ni Jehova ang mga tawo para mangin malipayon? (6) Ano ang DNA? (Sal. 139:16) (7) Sa tanan nga tinuga ni Jehova sa duta, ngaa lain gid ang tawo? (Gen. 1:26) (8) Ano gid ang ginakalangkagan mo sa bag-o nga kalibutan?
Iban nga Bahin: (9) Diin naghalin ang mga kolor? (10) Paano ang tubig makalab-ot sa ibabaw sang kahoy bisan pa may grabidad? (11) Ano ang mahimo sang tubig sa aton lawas? (12) Maghatag sing mga halimbawa sang paghiusa sa tunga sang buhi nga mga butang. (13) Paano ang mga tinuga nakatuon sa pagbuligay? (14) Ano ang “golden angle,” kag paano ini ginpakita sa mga tinuga?
“Tan-awa sing Maayo” ang mga Tinuga ni Jehova: Ginapalig-on kita ni Jesus nga ‘tan-awon sing maayo ang mga pispis sa langit’ kag ‘magtuon gikan sa mga liryo sa latagon.’ (Mat. 6:26, 28) Kon himuon naton ini, magabakod ang aton pagtuo kag pagsalig sa Manunuga, kag maapresyar pa gid ang kaalam, gahom sa pagluwas, kag gugma ni Jehova. Sa baylo nga magpaimpluwensia sa mga hilikuton sang kalibutan, talupangda ang mga tinuga ni Jehova, kag pamalandungi ang ginasugid sini parte sa aton Dios.—Sal. 19:1.