Lima ka Paagi Para Makakita sing Pagtuon sa Biblia
1. Kon nabudlayan ka makakita sing pagtuon sa Biblia, ano ang dapat mo himuon, kag ngaa?
1 Nabudlayan ka bala makakita sing pagtuon sa Biblia? Indi mangampo kay ginapakamaayo ni Jehova ang padayon nga nagahimo sang iya kabubut-on. (Gal. 6:9) Ang masunod nga lima ka panugda makabulig sa imo.
2. Paano naton magamit ang direkta nga paagi sa pagsugod sing pagtuon sa Biblia?
2 Direkta nga Paagi: Nahibaluan sang kalabanan nga nagatanyag kita sing Ang Lalantawan kag Magmata!, pero mahimo wala sila nakahibalo parte sa pagtuon sa Biblia. Ngaa indi mo pagtilawan nga direkta nga magtanyag sing pagtuon sa Biblia kon nagapamalaybalay? Mahimo mo pamangkuton ang interesado kon luyag niya sing pagtuon sa Biblia. Kon mangindi sia, hatagi gihapon sia sing literatura kag palambua ang iya interes. Regular nga ginahatagan sing magasin sang aton brother ang isa ka mag-asawa. Pagkatapos niya mahatag ang pinakaulihi nga magasin malakat na kuntani sia. Pero nahunahunaan niya nga pamangkuton sila: “Gusto bala ninyo magtuon sa Biblia?” Nakibot sia nga nagpasugot sila. Karon bawtismado na ang mag-asawa.
3. Hunahunaon bala naton nga ang tanan nga nagatambong sa miting ginatun-an na sa Biblia?
3 Nagatambong sa Miting: Indi paghunahunaa nga ang tanan nga nagatambong sa miting ginatun-an na sa Biblia. Ang isa ka brother nagsiling: “Sobra katunga sang akon ginatun-an sa Biblia nagsugod sang gin-istorya ko ang mga bag-uhan nga nagtambong sa miting.” May isa ka mahuluy-on nga babayi nga 15 ka tuig na nga nagatambong sa Kingdom Hall upod sa iya bawtismado nga mga bata nga babayi. Sa masami, pag-abot niya nagasugod na ang miting kag nagapauli sia dayon. Sang gintanyagan sia sang pagtuon sang isa ka sister, nagbaton sia kag sang ulihi nangin Saksi. Ang sister nagsulat: “Nanugon gid ako kay ginhulat ko pa ang 15 ka tuig antes sia gintanyagan sing pagtuon!”
4. Paano kita makakita sing pagtuon sa Biblia paagi sa iban?
4 Paagi sa Iban: Ginatinguhaan sang isa ka sister nga mag-upod sa iban sa ila ginatun-an sa Biblia. Sa pahanugot sang nagatudlo, ginapamangkot sang utod ang estudyante sa Biblia kon may kilala sia nga luyag man magtuon. Kon nagatanyag sang libro nga Ginatudlo Sang Biblia, mahimo ka mamangkot: “May kilala ka bala nga gusto man sini nga libro?” Kon kaisa, may mga kahimtangan nga indi madumalahan sing pagtuon sa Biblia sang manugbantala kag payunir ang maistorya nila sa teritoryo. Gani ipahibalo sa iban nga puede ka makadumala sing pagtuon sa Biblia.
5. Ngaa maayo nga tanyagan naton sing pagtuon sa Biblia ang di-tumuluo nga mga tiayon sang aton kauturan?
5 Di-tumuluo nga mga Tiayon: May mga kauturan bala sa inyo kongregasyon nga di-tumuluo ang ila tiayon? Ang iban sa ila indi luyag mag-istorya parte sa Biblia sa ila Cristiano nga mga tiayon pero nagabaton sila sing pagtuon sa iban. Maayo nga pamangkuton anay ang ila tiayon kon paano sila palapitan.
6. Daw ano ka importante ang pangamuyo kon nagatinguha nga makakita sing pagtuon sa Biblia?
6 Pangamuyo: Indi pagpakadiutaya ang mahimo sang pangamuyo. (Sant. 5:16) Nagsiling si Jehova nga pamatian niya ang aton mga pangamuyo kon nahisuno ini sa iya kabubut-on. (1 Juan 5:14) Ang isa ka brother nga tama ka sako nangamuyo nga makakita sing pagtuon sa Biblia. Nagaduhaduha ang iya asawa kon maatipanan niya ang iya estudyante ilabi na kon may mga problema ini. Gani ginlakip niya ini sang nangamuyo sia kay Jehova nga makakita sang pagtuon sa Biblia ang iya bana. Ginsabat gid ang ila mga pangamuyo. Pagligad sang duha ka semana ang payunir sa ila kongregasyon nakakita sing lalaki nga luyag magtuon kag ginhatag ini sa bana. Ang iya asawa nagsulat: “Para sa mga nagabatyag nga indi nila masarangan ang pagdumala sing pagtuon sa Biblia, ang masiling ko: Mangin espesipiko kag ipangamuyo ini pirme. Wala gid ako maghunahuna nga mangin mas malipayon kami.” Kon maninguha ka, makakita gid ikaw sing pagtuon sa Biblia kag mangin malipayon sa pagbulig sa iban pakadto sa “dalan nga nagapadulong sa kabuhi.”—Mat. 7:13, 14.