“Magpanaksi sing Maid-id”
1. Anong maayo nga halimbawa ang ginpakita ni apostol Pablo sa ministeryo?
1 “Tumana sing bug-os ang imo ministeryo.” (2 Tim. 4:5) Si apostol Pablo may kahilwayan sa paghambal sini kay Timoteo bangod halin sang 47 asta 56 C.E., natapos niya ang tatlo ka paglakbay subong misyonero. Pila ka beses nga ginsambit sa tulun-an sang Binuhatan nga ‘nagpanaksi sing maid-id’ si Pablo. (Binu. 23:11; 28:23) Paano naton sia mailog subong?
2. Paano kita makapanaksi sing maid-id kon nagapamalaybalay?
2 Sa Pamalaybalay: Para maistorya naton ang mga tawo nga wala pa makabati sang maayong balita, dapat naton sila duawon sa iban nga oras. Mahimo nga ara sa balay ang ulo sang pamilya sa gab-i ukon sa Sabado ukon Domingo. Tinguhaan gid naton nga may maistorya kita sa kada balay kag padayon nga balikan ang mga wala sing tawo. Ano abi kon kada pagbalik mo wala gid sing tawo? Mahimo ka makapadala sing sulat ukon makatawag sa telepono.
3. Ano ang mga kahigayunan nga makapanaksi ka sa publiko kag sing di-pormal?
3 Sa Publiko kag sing Di-pormal: Ginabantala sang mga Saksi ni Jehova karon ang “kaalam” sa tanan nga luyag mamati, kon kaisa sa “mga dalan” ukon sa “masangkad nga mga duug.” (Hulu. 1:20, 21) Kon nagahimo kita sang aton mga hilikuton kada adlaw, nagapangita bala kita sing kahigayunan nga magpanaksi? Masiling bala nga ‘masako gid kita sa pagbantala sing pulong’? (Binu. 18:5) Kon amo, ginatuman gid naton ang aton katungdanan nga “magpanaksi sing maid-id.”—Binu. 10:42; 17:17; 20:20, 21, 24.
4. Paano makabulig ang pangamuyo kag pagpamalandong sa aton pagpanaksi sing maid-id?
4 Pero kon kaisa, mahimo mangalag-ag kita sa pagpanaksi bangod sa aton kaluyahon ukon pagkamahuluy-on. Pat-od nga naintiendihan ini ni Jehova. (Sal. 103:14) Pero, mahimo kita mangamuyo sa iya sing kaisog. (Binu. 4:29, 31) Isa pa, kon nagatuon kita sing personal kag nagapamalandong sa Pulong sang Dios, maapresyar pa gid naton ang labaw gid nga balor sang maayong balita. (Fil. 3:8) Magapahulag ini sa aton nga ibantala sing makugi ang maayong balita!
5. Paano kita makigbahin sa katumanan sang tagna ni Joel?
5 Antes mag-abot ang daku kag makakulugmat nga adlaw ni Jehova, si Joel nagtagna nga ang katawhan sang Dios ‘padayon nga magalakat’ kag indi mag-untat sa pagbantala. (Joel 2:2, 7-9) Kabay nga makigbahin kita sing bug-os sa sining indi masulit nga hilikuton!