Gamita ang jw.org sa Imo Ministeryo

Daku gid ang nabulig sang aton Web site para mapalapnag naton ang maayong balita “tubtob sa ukbong sang duta.” (Binu. 1:8) Ang kalabanan nga tagbalay wala sing ideya parte sa jw.org. Nahibaluan lamang nila ini sang gintudlo sa ila sang isa ka manugbantala.

Ang isa ka nagalakbay nga manugtatap nag-download sing video nga Ngaa Dapat Tun-an ang Biblia? sa iya cell phone kag ginapakita ini kon may kahigayunan. Halimbawa kon nagapamalaybalay, nagasiling sia: “Nagaduaw ako sing makadali para ipakita sa mga tawo ang sabat sa tatlo ka importante nga pamangkot: Ngaa kadamo sang problema sa kalibutan? Paano ini solbaron sang Dios? Kag paano naton ini maatubang subong? Ang sabat makita sa sining malip-ot nga video.” Dayon gina-play niya ang video kag ginapanilagan ang reaksion sang tagbalay. Makagalanyat gid ang video amo nga interesado gid ang mga tawo sa pagtan-aw sini asta matapos. Dayon ang nagalakbay nga manugtatap nagasiling: “Nabatian mo nga puede ka magpangabay paagi sa Internet sing pagtuon sa Biblia. Pero kay ari na gid man ako, ipakita ko sa imo sing makadali kon paano ini tun-an.” Kon magpasugot ang tagbalay, ginapakita niya kon paano ini himuon nga ginagamit ang brosyur nga Maayong Balita. Kon masako ang tagbalay, nagahimo sia sing kahimusan nga magbalik para ipakita kon paano ini himuon. Kon magkadto naman sia sa mga coffee shop, amo man sini ang iya ginasiling sa mga nagapungko malapit sa iya kon makaumpisa na sia sing mainabyanon nga paghambalanay. Ginagamit mo bala ang jw.org sa imo ministeryo?