Bag-o nga mga Ambahanon sa Pagsimba!
1 Sa bag-o lang natapos nga annual meeting sang Watch Tower Bible and Tract Society of Pennsylvania, nga ginhiwat sang Oktubre 4, 2014, ginpahibalo nga irebisar ang aton subong nga libro sang ambahanon. Makalilipay gid ini nga balita! Napahanumdom sini ang tanan nga tumalambong nga importante gid sa aton pagsimba ang aton mga ambahanon sang Ginharian.—Sal. 96:2.
2 Mahimo ka mamangkot, ‘Ngaa kinahanglan rebisahon ang libro sang ambahanon?’ May pila ka rason. Una sa tanan, ang aton paghangop sa Kasulatan padayon nga nagasanag, gani makaapekto ini sa mga liriko sang aton mga ambahanon. (Hulu. 4:18) Ang isa pa ka rason: Madamo nga ekspresyon kag mga prase sa aton libro sang ambahanon ang ginkuha sa daan nga edisyon sang New World Translation. Ang mga liriko kinahanglan bag-uhon para magsibu sa mga tinaga sa ginrebisar nga edisyon. Bangod daku nga trabaho ang nadalahig sa sini, gindesisyunan nga may idugang nga pila ka bag-o nga ambahanon.
3 Hulaton pa bala naton nga maimprinta ang bag-o nga libro sang ambahanon antes gamiton ang bag-o nga mga ambahanon? Indi. Nalipay kami sa pagpahibalo sa inyo nga sa masunod nga pila ka bulan, ang bag-o nga mga ambahanon ipagua sa aton jw.org nga Web site. Dayon, gamiton ini subong nagatakop nga ambahanon sa Miting sa Serbisyo nga may nakabutang nga “bag-o nga ambahanon.”
4 Kon Paano Matun-an ang Bag-o nga mga Ambahanon: Indi mahapos ang pagtuon sing bag-o nga ambahanon. Pero, pareho sang salmista, luyag naton nga mag-amba sa mga miting sang kongregasyon kag “indi lang maghipos.” (Sal. 30:12) Para matun-an ang bag-o nga ambahanon, sunda ining simple nga mga tikang.
Pamatii sing pila ka beses ang piano nga rekording sang ambahanon nga ibutang sa aton Web site. Kon pirme mo ini pamatian, mangin pamilyar ka sa tono.
Mangin pamilyar sa mga liriko, kag tinguhai nga masaulo ini.
Kantaha ang mga liriko nga ginasundan ang tono. Sulitsulita ini asta nga makabisado mo ang ambahanon.
Kantaha sing pila ka beses ang bag-o nga mga ambahanon sa inyo Pangpamilya nga Pagsimba asta nga makabisado na ninyo ini.
5 Sa masunod nga mga bulan kon ang bag-o nga ambahanon amo ang gamiton subong nagatakop nga ambahanon sa Miting sa Serbisyo, pamatian anay sang mga kauturan ang piano nga rekording. Dayon makanta ang tumalambong nga nagadungan sa rekording, pareho sang ginahimo naton sa iban nga ambahanon.
6 Ang pag-amba sa aton mga miting nagahatag sa aton sing kalipay kag kahigayunan nga mahiusa ang aton mga tingog sa pagdayaw kay Jehova. Gani kon indi man lang kinahanglanon, likawan naton nga maghalin sa aton mga pulungkuan sa tion sang pag-amba sa aton mga miting.
7 May isa pa ka paagi nga mapakita naton ang aton apresasyon sa sagrado nga ambahanon. Sa mga asembleya kag kombension, ginapatokar ang musika antes magsugod ang kada sesyon. Duha ka beses kada tuig, may mga kauturan halin sa lainlain nga bahin sang kalibutan nga nagagasto para magbiyahe pakadto sa Patterson, New York, agod maghimo sing matahom nga mga musika nga gamiton sa aton pagsimba. Gani, kon pangabayon kita sang tsirman nga magpungko na kag pamatian ang musika nga ginhanda, dapat magtuman kita. Paagi sini, mahanda naton ang aton tagipusuon sa mga impormasyon nga aton mabatian.—Esd. 7:10.
8 Bilang nagatakop nga ambahanon sa aton miting karon, ambahon naton ang bag-o nga ambahanon nga natig-uluhan “The Kingdom Is in Place—Let It Come!” Ini nga ambahanon, nga ginpatokar sa annual meeting, ginkomposo para sa ika-100 nga anibersaryo sang pagtukod sang Ginharian.
9 Pat-od gid nga ang bag-o nga mga ambahanon “maayo nga mga butang” halin kay Jehova. (Mat. 12:35a) Kabay nga tinguhaan gid naton nga mahibaluan ining bag-o nga mga ambahanon kag ambahon ini sing tinagipusuon agod madayaw naton kag mapadunggan ang aton Dios!—Sal. 147:1.