Padayon nga Mag-uswag Subong Ministro
1. Ano nga mga halimbawa sang unang siglo ang nagapakita nga dapat kita mag-uswag subong mga ministro?
1 Ang mga Cristiano dapat mag-uswag subong mga ministro. Amo kon ngaa padayon nga ginhanas ni Jesus ang iya mga sumulunod sa pagbantala nga hilikuton. (Luc. 9:1-5; 10:1-11) Amo man ini ang rason kon ngaa gin-upod nanday Aquila kag Priscila si Apolos kag “ginpaathag sa iya sing sibu pa ang dalanon sang Dios.” (Binu. 18:24-26) Sa sini man nga rason ginpalig-on ni Pablo ang eksperiensiado nga ebanghelisador nga si Timoteo nga mag-ukod sa pagpanudlo agod ang iya pag-uswag “makita sang tanan nga tawo.” (1 Tim. 4:13-15) Bisan ano na kita kadugay nga nagapaulipon sa Ginuo subong mga manugbantala sang maayong balita, dapat padayon naton nga pauswagon ang aton mga ikasarang sa pagbantala.
2. Paano kita makatuon sa iban?
2 Magtuon sa Iban: Ang isa ka paagi para mapauswag ang aton mga ikasarang amo ang pagtuon sa iban. (Hulu. 27:17) Gani, mamati sing maayo kon nagahatag sing presentasyon ang aton mga masigkamanugbantala. Mangayo sing espesipiko nga mga panugda sa eksperiensiado nga mga manugbantala, kag mamati sing maayo sa ila ginasiling. (Hulu. 1:5) Nabudlayan ka bala sa pagduaw liwat, sa pag-umpisa sing pagtuon sa Biblia, ukon sa pagpakigbahin sa iban pa nga aspekto sang aton ministeryo? Magpabulig sa imo manugtatap sang grupo ukon sa eksperiensiado nga manugbantala. Dumduma man nga ang balaan nga espiritu ni Jehova makapauswag sa aton mga ikasarang, gani ipangamuyo ini pirme.—Luc. 11:13.
3. Ano dapat ang aton reaksion kon hatagan kita sing panugda nga wala naton ginpangabay?
3 Indi maglain ang imo buot kon may maghatag sa imo sing panugda para mag-uswag nga wala mo ginpangabay. (Man. 7:9) Pareho kay Apolos, batuna ini sing mapainubuson kag mapinasalamaton. Ang paghimo sini nagapakita sing kaalam.—Hulu. 12:15.
4. Suno kay Jesus, ano ang resulta kon mag-uswag kita subong ebanghelisador?
4 Ang Pag-uswag Nagahimaya sa Dios: Paagi sa paggamit sang ilustrasyon, ginpalig-on ni Jesus ang iya mga sumulunod nga mag-uswag subong mga ministro. Ginpaanggid niya ang iya kaugalingon sa puno sang ubas kag ang iya hinaplas nga mga sumulunod sa mga sanga sini. Nagsiling sia nga ang Amay nagatinlo sa tagsa ka sanga nga nagapamunga “agod magpamunga ini sing madamo pa.” (Juan 15:2) Subong nga ang tag-iya sang ulubasan nagahandum nga madamo ang bunga sang iya mga ubas, luyag ni Jehova nga padayon kita nga mag-uswag sa aton ikasarang sa pagpamunga paagi sa “bunga sang aton mga bibig.” (Heb. 13:15) Ano ang maayo nga resulta kon nagauswag kita subong ebanghelisador? Si Jesus nagsabat: “Ang akon Amay ginahimaya kon padayon kamo nga nagapamunga sing madamo.”—Juan 15:8.