Ang Aton mga Gamit sa Pagpanudlo
1. Sa ano magkaanggid ang Cristianong mga ebanghelisador kag ang mga panday?
1 Ang mga panday madamo sing gamit. Ang pila sa sini mahimo nga ginagamit lang sa pinasahi nga mga ulubrahon, pero ang iban, pirme ginagamit. Ginadala pirme sang eksperiensiado nga mga panday ini nga mga gamit kag sampaton sila sa sini. Ginapalig-on sang Biblia ang mga Cristiano nga magpakigbahin sa ministeryo kag mangin “isa ka manugpangabudlay nga wala sing ginakahuya.” (2 Tim. 2:15) Ano ang aton pinakaimportante nga gamit? Ini amo ang Pulong sang Dios—ang aton panguna nga gamit sa ‘pagtudlo sa mga tawo nga mangin disipulo.’ (Mat. 28:19, 20) Gani, dapat kita manikasog nga mangin sampaton nga ‘maggamit sing husto ang pulong sang kamatuoran.’ Pero, may iban pa kita nga gamit sa pagpanudlo nga dapat mangin sampaton man ang tanan nga Cristiano agod epektibo nga matudlo sa mga tawo ang kamatuoran.—Hulu. 22:29.
2. Ano ang aton mga gamit sa pagpanudlo?
2 Ang Aton mga Gamit: Luwas sa Biblia, ano pa ang iban naton nga gamit? Ang aton panguna nga gamit sa pagtudlo sang kamatuoran sa Biblia amo ang Ano Gid ang Ginatudlo sang Biblia? Pagkatapos matun-an sang estudyante ini nga libro, gamiton naton ang “Magpabilin Kamo sa Gugma sang Dios” para tudluan sia nga iaplikar ang mga prinsipio sang Biblia. Gani, dapat mangin sampaton kita sa paggamit sining duha ka publikasyon. Ang pila ka brosyur dapat nalakip man sa aton mga gamit. Ang Maayong Balita Halin sa Dios! amo ang isa sa panguna nga ginagamit naton sa pagsugod sang mga pagtuon sa Biblia. Kon sa aton teritoryo may mga tawo nga indi maayo magbasa ukon nagahambal sing iban nga lenguahe nga diutay lang ukon wala kita sing publikasyon, mahimo naton gamiton ang Listen to God ukon Pamatii ang Dios Agod Magkabuhi Ka sing Walay Katapusan. Ang gamit naman para mabuligan ang estudyante nga mangin pamilyar sa organisasyon amo ang Sin-o ang Nagahimo sang Kabubut-on ni Jehova Subong? Dapat man kita mangin sampaton sa paggamit sang mga video nga makabulig sa pagtudlo sa mga tawo nga mangin disipulo, pareho sang Ngaa Dapat Tun-an ang Biblia?, Ano ang Ginahimo sa Kingdom Hall?, kag May Ngalan Bala ang Dios?
3. Buligan kita sang palaabuton nga mga isyu sang Ang Aton Ministeryo sa Ginharian nga himuon ang ano?
3 Ang palaabuton nga mga isyu sang Ang Aton Ministeryo sa Ginharian magabulig sa aton nga mangin sampaton sa aton madamo nga publikasyon nga ginagamit sa pagpanudlo. Samtang ginapanikasugan naton nga mangin sampaton sa sini nga mga gamit, ginasunod naton ang inspirado nga laygay: “Hatagi sang dalayon nga igtalupangod ang imo kaugalingon kag ang imo panudlo. Himua sing padayon ini nga mga butang, kay sa paghimo sini maluwas mo ang imo kaugalingon kag ang mga nagapamati sa imo.”—1 Tim. 4:16.