Ang Pagkabanhaw​—Nangin Posible Bangod sa Gawad

Ang Memoryal nagahatag sa aton sing kahigayunan nga pamalandungan ang mga pagpakamaayo sa palaabuton nga nangin posible bangod sa gawad, pareho sang pagkabanhaw. Wala gintuyo ni Jehova nga mapatay ang mga tawo. Amo kon ngaa ang isa sa pinakamasakit nga mabatyagan naton amo ang kalisod bangod sa kamatayon sang isa nga pinalangga. (1Co 15:26) Nasubuan gid si Jesus sang makita niya nga nagalalaw ang iya mga disipulo sa kamatayon ni Lazaro. (Ju 11:33-35) Bangod si Jesus ang himpit nga larawan sang iya Amay, sigurado gid kita nga nasubuan man si Jehova nga makita kita nga nagakalisod sa kamatayon sang aton mga pinalangga. (Ju 14:7) Nalangkag gid si Jehova sa pag-abot sang tion nga banhawon niya ang iya mga alagad, kag dapat amo man kita.—Job 14:14, 15.

Bangod si Jehova isa ka Dios sang kahim-ong, makapati kita nga ang pagbanhaw mahanabo sa mahim-ong nga paagi. (1Co 14:33, 40) Sa baylo sang lubong, pagaabiabihon ang mga banhawon. Ginapamalandungan mo bala ang pagkabanhaw, ilabi na sa tion sang kalisod? (2Co 4:17, 18) Ginapasalamatan mo bala si Jehova sa paghatag niya sing gawad kag sa pagsugid sa Kasulatan nga ang mga patay mabuhi?—Col 3:15.

• Sin-o sa imo mga abyan kag paryente ang ginahandum mo gid nga makita liwat?

• Sin-o sa mga karakter sa Biblia ang luyag mo gid makilala kag maistorya?