Kon Paano Mangin Mapisan nga Estudyante sang Kasulatan

Gusto mo bala mangin matutom kon may pagtilaw pareho kay Daniel? Mapisan nga gintun-an ni Daniel ang Pulong sang Dios, lakip ang madalom nga tagna. (Dan 9:2) Ang pagtuon sing maayo sa Biblia makabulig sa imo nga mangin matutom. Paano? Makapabakod pa gid ini sang imo pagtuo nga tumanon ni Jehova ang iya mga promisa. (Jos 23:14) Makabulig man ini sa imo nga magdalom ang imo gugma sa iya, kag amo ini ang magapahulag sa imo nga himuon ang husto. (Sa 97:10) Pero ano ang tun-an mo? Binagbinaga ang masunod nga mga panugda:

• Ano ang tun-an ko? Lakip sa maayo nga rutina sang pagtuon ang paghanda para sa mga miting sang kongregasyon. Mangin mapuslanon ang naiskedyul nga pagbasa sa Biblia kada semana kon hatagan mo sing tion ang pag-research sang mga punto nga indi mo maintiendihan. Ginatun-an sang iban ang mga tagna sa Biblia, ang sarisari nga aspekto sang bunga sang espiritu sang Dios, ang mga paglakbay ni Pablo bilang misyonero, kag bisan ang mga tinuga ni Jehova. Kon may nahunahuna ka nga pamangkot parte sa Biblia, isulat ini kag amo ini ang tun-i sa masunod mo nga iskedyul sang pagtuon.

• Diin ako makakita sing impormasyon? Tan-awa ang video nga Mga Bulig Para Masapwan ang Espirituwal nga mga Bahandi agod mabal-an mo ang pila ka opsyon. Halimbawa, i-research kon ano ang mga kagamhanan sang kalibutan nga ginarepresentar sang mga sapat sa Daniel kapitulo 7.

• Daw ano kalawig ako dapat magtuon? Importante ang regular nga pagtuon para mangin mapagros sa espirituwal. Sa umpisa, puede nga malip-ot lang anay. Dayon amat-amat nga dugangi ang imo tion sa pagtuon. Ang pagtuon sa Pulong sang Dios pareho sa pagkutkot sing natago nga bahandi; kon madamo ka sing nakita, maganahan ka pa gid sa pagkutkot! (Hul 2:3-6) Magadugang ang imo handum sa Pulong sang Dios, kag mangin batasan mo na ang regular nga pagtuon sa Biblia.—1Pe 2:2.

ANO ANG GINAREPRESENTAR SANG MGA SAPAT SA DANIEL KAPITULO 7?

• 

  Dan 7:4

• 

  Dan 7:5

• 

  Dan 7:6

• 

  Dan 7:7

DUGANG NGA PAMANGKOT:

Paano natuman ang Daniel 7:8, 24?

SUNOD NGA TUN-AN:

Ano ang ginarepresentar sang mga sapat sa Bugna kapitulo 13?