Makighidait Ka Anay sa Imo Utod—Paano?

Imadyina nga nagaistar ka sa Galilea sang panahon ni Jesus. Nagpa-Jerusalem ka para magsaulog sang Kapiestahan sang mga Payagpayag. Ang siudad puno sing imo mga masigkasumilimba halin sa sarisari nga lugar. Gusto mo maghalad kay Jehova. Gani nagdala ka sing kanding kag nagpanagil-ot sa kadam-an pakadto sa templo. Pag-abot mo sa templo, puno man ini sing mga tawo nga gusto maghalad. Sang ulihi, imo na turno nga ihatag sa saserdote ang dala mo nga kanding. Pero gulpi lang, nadumduman mo ang imo utod nga may lain nga buot sa imo kag mahimo ara sia sa kadam-an ukon sa siudad. Ginpaathag ni Jesus ang dapat mo himuon. (Basaha ang Mateo 5:24.) Ano ang himuon mo kag sang nasandad nga utod para magbalik ang paghidait sa tunga ninyo suno sa ginsugo ni Jesus? Sa kada listahan sa ubos, butangi sing tsek ang insakto nga sabat.

ANG DAPAT MO HIMUON . . .

• Istoryahon mo lang ang imo utod kon sa banta mo may rason gid man nga maglain ang iya buot

• Tadlungon mo ang imo utod kon sa banta mo tam-an sia kasensitibo ukon balasulon man sa natabo

• Pamatian sing maayo ang imo utod samtang nagapautwas sang iya kalain sing buot. Bisan pa indi mo maintiendihan ang tanan nga detalye, mangayo ka sing pasaylo kay naglain ang iya buot ukon para sa mga butang nga indi mo man hungod pero may indi maayo nga epekto

ANG DAPAT HIMUON SANG IMO UTOD . . .

• Mangita sing apin sa kongregasyon paagi sa pagpanugidsugid sang imo sala sa iban

• Basulon ka, isaisahon ang imo mga sala, kag piliton ka nga akuon ini

• Apresyahon ang imo pagpaubos kag kaisog sa pagpalapit sa iya, kag patawaron ka niya sing kinabubut-on

Bisan pa wala na kita nagahalad sing mga sapat sa aton pagsimba subong, ano ang ginatudlo ni Jesus parte sa koneksion sang pagpakighidait sa aton utod kag sa pagsimba nga ginabaton sang Dios?