PAGKABUHI BILANG CRISTIANO

Pagbantala kag Pagtudlo—Importante sa Paghimo sing Disipulo

Ginsugo ni Jesus ang iya mga sumulunod nga kadtuan kag tudluan ang mga tawo agod mangin disipulo sila. (Mat 28:19) Lakip sa sini ang pagbantala kag pagtudlo. Gani, maayo gid nga pamangkuton naton kon kaisa ang aton kaugalingon, ‘Paano pa gid ako mag-uswag sa pagbantala kag pagtudlo para makahimo sing disipulo?’

PAGBANTALA

Imbes nga maghulat sa mga tawo nga magpalapit sa aton, dapat mapisan kita sa pagpangita sa mga “takus.” (Mat 10:11) Kon nagabantala, alisto bala kita nga panaksihan ang ‘bisan sin-o nga makita naton’? (Bin 17:17, Biblia sang Katilingban sang mga Kristiano) Si Lidia nangin disipulo bangod mapisan si apostol Pablo sa pagbantala.—Bin 16:13-15.

Si Samuel nga nagatanyag sing magasin kay Ezekiel; sanday Solomon kag Mary nga nagabantala kanday Ezekiel kag Abigail — “Isab-ug ang imo binhi sa aga tubtob sa gab-i” (Man 11:6)

TAN-AWA ANG VIDEO NGA PADAYON NGA MAGBANTALA SING ‘WALA UNTAT’—SING INDI PORMAL KAG SA PAMALAY, DAYON SABTI ANG MASUNOD NGA MGA PAMANGKOT:

Kada adlaw, paano ginpakita ni Samuel nga mapisan sia sa pagpangita sing kahigayunan nga makatanom sing binhi sang kamatuoran?
Ngaa padayon naton nga himuon ang tanan nga porma sang pagbantala?
Sa imo ginahimo kada adlaw, kay sin-o mo puede isugid ang mensahe sang Ginharian?

PAGTUDLO

Para makahimo sing disipulo, indi lang basta ihatag naton sa mga tawo ang literatura. Magauswag sila sa espirituwal kon balikbalikan naton sila kag hiwatan sing pagtuon sa Biblia. (1Co 3:6-9) Pero, ano abi kon ang isa wala nagauswag bisan pa sang aton panikasog nga tudluan sia sing kamatuoran sang Ginharian? (Mat 13:19-22) Dapat padayon kita sa pagpangita sa mga tawo nga ang tagipusuon pareho sang “maayo nga duta.”—Mat 13:23; Bin 13:48.

Sanday Solomon kag Mary nga nagadumala sing pagtuon sa Biblia kanday Ezekiel kag Abigail; sanday Ezekiel kag Abigail nga naga-public witnessing — “Ako ang nagtanom, si Apolos ang nagbunyag, apang ang Dios amo ang nagapatubo sini” (1Co 3:6)

TAN-AWA ANG VIDEO NGA PADAYON NGA MAGBANTALA SING ‘WALA UNTAT’—SA PUBLIKO KAG SA PAGHIMO SING MGA DISIPULO, DAYON SABTI ANG MASUNOD NGA MGA PAMANGKOT:

Paano ginbunyagan nanday Solomon kag Mary ang binhi sang kamatuoran sa tagipusuon nanday Ezekiel kag Abigail?
Ano dapat ang aton tulumuron kon parte sa tanan nga porma sang ministeryo, lakip ang pagpanaksi sa publiko?
Paano pa gid naton mabuligan ang iban nga mahibaluan ang kamatuoran?