2013 Tuigan nga Teksto

Sang 1473 B.C.E., manugsulod na ang mga Israelinhon sa Ginsaad nga Duta, pero ginpunggan sila sang gamhanan nga mga kaaway. “Magpakaisog ka kag magpakabakod,” siling sang Dios kay Josue. Kon magpabilin nga matutom si Josue, mangin madinalag-on sia. Ang Dios nagsiling: “Indi ka mahadlok, kay kaupod mo si Jehova nga imo Dios bisan diin ka magkadto.” Wala gid sia ginpabay-an sang Dios, kay nagdaug ang mga Israelinhon batok sa ila mga kaaway sa sulod lang sang anom ka tuig.—Jos. 1:7-9, NW.

Ang matuod nga mga Cristiano manugsulod man sa ginsaad nga bag-ong kalibutan gani dapat sila magpakaisog kag magpakabakod. Kaangay ni Josue, nagaatubang man kita sing gamhanan nga mga kaaway nga nagatinguha sa pagguba sang aton integridad. Wala kita nagagamit sing mga bangkaw kag espada sa aton pagpakig-away, kundi sing espirituwal nga mga hinganib, kag ginahanas kita ni Jehova kon paano ini gamiton sing malantipon. Bisan ano man ang aton kahimtangan, makasalig kita nga kon magpakaisog kita, magpakabakod, kag mangin matutom, buligan kita ni Jehova nga mangin madinalag-on.