Ang Korte-V nga Posisyon sang Cabbage White nga Alibangbang

Ang alibangbang nagadepende sa silak sang adlaw para mag-init ang mga maskulo sini antes ini makalupad. Pero sa magal-um nga tiempo, ang cabbage white nga alibangbang makauna lupad sangsa iban nga alibangbang. Ngaa?

Binagbinaga: Antes makalupad, ang lainlain nga sahi sang alibangbang nagapainit sa adlaw nga ang ila pakpak nakasirado ukon nakahumlad. Pero, ang pakpak sang cabbage white nga alibangbang korte-V ang posisyon. Base sa research, para mainitan sing maayo ang alibangbang, ang mga pakpak sini dapat nakaplastar sa anggulo nga mga 17 degrees. Sa sini nga posisyon ang enerhiya sang adlaw makadiretso sa lawas sini, nga makahanda sini sa paglupad.

Ang mga researcher halin sa University of Exeter, England, nagtuon kon bala puede nila mahimo nga mas epektibo ang mga solar panel paagi sa pag-ilog sang korte-V nga posisyon sini nga alibangbang. Sang ginhimo nila ini, nadiskobrehan nila nga ang kadamuon sang kuryente nga nahimo nagdugang sing halos 50 porsiento.

Natalupangdan man sang mga researcher nga ang ibabaw nga bahin sang pakpak sang alibangbang nagapabanda sang silak sang adlaw. Paagi sa pagsunod sang korte-V nga posisyon sini kag sang pakpak sini nga may ikasarang sa pagpabanda sang silak sang adlaw, nakahimo ang mga researcher sing mas mamag-an kag mas epektibo nga mga solar panel. Ini nga pagtuon nagpahulag kay Professor Richard ffrench-Constant, nga isa ka miembro sang research team nga tawgon ang cabbage white nga alibangbang nga “eksperto sa pagkuha sang enerhiya sa adlaw.”

Ano sa banta mo? Ang korte-V nga posisyon sang cabbage white nga alibangbang resulta bala sang ebolusyon? Ukon gindesinyo bala ini?