Pagbantay sa Kalibutan

Ang mga Kabataan Ginpauntat sa Pag-eskwela sa Paraguay

Sang 1984, ang mga awtoridad sang mga eskwelahan sa Par­a­guay nagpauntat sa kapin sa 60 ka kabataan sang mga Saksi ni Jehova bangod ang kabataan nagdumili sa pagpakigbahin sa patriotiko nga mga seremonya sa pagsaludo sa bandera subong pagsupak sa ila nahanas sa Biblia nga mga konsiensia. Ang pagpauntat nagpadayon sang 1985. Ang iban sang Saksi nga mga estudyante wala ginbaton sang magpalista sa eskwelahan. Ang yara sa hulusayon amo ang pagkamasaligan sang garantiya sang konstitusyon sang Par­a­guay tuhoy sa “kinamatarong sa pag-angkon . . . kag pagbuhat sang relihion [sang isa] . . . tubtob wala ini nagapamatok sa maayong mga kinabatasan ukon kahim-ong sang publiko.”

Sang Abril 15, 1985, ang manubo nga korte sa Asunción nagdesisyon pabor sa pangabay sang lima ka ulo sang pamilya nga batunon liwat ang ila napulo ka kabataan sa eskwelahan. Ang abogado madinalag-on nga nagpangatarungan nga “ang paghipos sa [tion sang patriotiko nga mga seremonya] sang mga estudyante nga mga anak sang mga Saksi ni Jehova ginakabig nga MATINAHURON kag wala sing tuyo nga magtamay.” Apang sang Mayo 8, ang ­Court of Ap­peals wala magkilala sini nga desisyon. Dugang pa, sang Abril 17 ang Min­is­try of Ed­u­ca­tion and Wor­ship nagpaguwa sing Res­o­lu­tion No. 1.051, nga nagaaprobar sa pagpauntat sang kabataan nga wala nagasaludo sa emblema sang pungsod. Gindala na karon sang mga ulo sang pamilya ang ila kaso sa pinakamataas nga korte sang Par­a­guay, ang Korte Suprema sang Katarungan. Samtang, ang desisyon sang napain nga manubo nga korte—pabor sa mga Saksi ni Jehova—nga nagadalahig sa napulo ka kabataan ginahangkat sang Min­is­try. Ang palaabuton nga mga desisyon sang korte magapat-od kon bala ang pungsod magasunod sang ginagaratinya sang konstitusyon sini nga kahilwayan sa relihion ukon indi.

Bag-ong Hapones nga Biblia

Ang Watch Tow­er So­ci­e­ty nagpaguwa sing bag-o nga Ref­er­ence Bi­ble sa modernong Hapones. “Ang una gid sa sini nga sari,” report sang Asahi Eve­ning News sang Hapon. Ginatawag ini nga Biblia nga “isa ka pagpakamaayo sa tanan nga nagapangita sing pagkasibu sa pagbadbad,” nga nagadugang nga ini “mahapos basahon.” Ang artikulo nagpatalupangod man nga “ining bag-o nga binuhatan may 11,400 ka foot­note nga nagaunod sing lain nga pagbadbad sang teksto nga nagahimo sining bag-o nga Ref­er­ence Bi­ble subong madamo sing bersion nga binadbad. May yari ini 125,000 ka marhinal nga reperensya sa iban nga teksto nga nagapakita sang paghisanto sang 66 ka tolon-an.” Ang Biblia ginpaguwa sa kadam-an sang 28,564 ka Saksi ni Jehova nga nagtipon sa Yokohama Sta­di­um sang Mayo 19. Paagi sa koneksion sang telepono sa 30 ka iban pa nga duog sang kombension sa bug-os nga Hapon, 174,959 ang kabug-osan nga nagtambong.

48 Milyones ang Nagiyan

Walay sapayan sang mga panikasog sang nasyonal kag internasyonal nga mga organisasyon nga punggan ang balod sang pag-abuso sa droga, ining kalalat-an sang ika-20 nga siglo nagapadayon sa paglapta sa bug-os nga duta, siling sang komperensya batok sa droga sang Nasyones Unidas sa Vi­en­na. Ginabanta nga sa dimagkubos 48 milyones ang nagiyan sa droga. Sa sini, siling sang Italyano nga pamantalaan nga Cor­rie­re della Sera, “mga 38 milyones ang nagagamit sing can­na­bis, mga 2 milyones ang nagagamit sing opio, kag indi mapat-od apang sigurado nga ‘pila ka milyon’ ang biktima sang co­caine, samtang mga pito ka gatos ka libo ang regular nga nagagamit sing heroin.”

Mga Tumor Bangod sang Pagtughong

Ang pagtughong sing dugo mahimo ginabangdan sing mga tumor sa mga pasyente nga may kanser, amo ang ginapahangop sang bag-o apang kontrobersial nga pagtuon sang mga sientipiko. Suno sa mga report nga ginhatag sa tuigan nga sinapol sang Amer­ican As­so­ci­a­tion for the Ad­vance­ment of Sci­ence, ginapaluya sang dugo nga ginatughong ang sistema sa pagbato sang pasyente kag gani ginabangdan sang pagtubo kag pagbalik sang mga tumor sa mga pasyente nga may kanser sa baga, suso, colon kag aripotan. Si Dr. Neil Blumberg, isa ka espesyalista sa pagtughong sing dugo sa University of Roch­es­ter Med­i­cal Center sa Nueva York, nagtuon sa mga pasyente nga may kanser sa colon kag sa aripotan. Ang iya mga natukiban, nga ginbalhag sa Brit­ish Med­i­cal Jour­nal, nagapakita nga ang paglukmat sang kanser sa tapos sang pagbusbos mas posible sa mga pasyente nga gintughongan sang sa kaanggid nga mga pasyente nga wala gintughongan. “Sa amon partikular nga grupo sang mga pasyente, ginpahangop nga ang pagtughong isa sang daku nga kabangdanan sang peligro,” siling ni Dr. Blumberg sa isa ka balita sang As­so­ci­a­ted ­Press.

Mga Sinalusalo sa Kaadlawan—Cristiano?

Sa tunga sang mga pagano, suno kay ­Horst Fuhr­mann, propesor sa maragtas sang Edad Media sa University of Re­gens­burg, “ang pagsaulog sing kaadlawan para sa kadungganan sang anghel dela guardia ukon dios, nga ang iya altar ginapunihan sing mga bulak kag mga korona; ang mga halad ginahalad sa dios sang piesta, ang mga abyan nagapanginbulahan kag nagadala sing mga regalo.” Si Propesor Fuhr­mann nagpadayon sa Aleman nga pamantalaan nga Süddeutschen Zeitung: “Ginapadaku gid ang mga sinalusalo sang kaadlawan nga ginhiwat para sa emperador, nga may mga parada, publiko nga mga sinalusalo, mga sirko, kag pagpangayam sing mga sapat: mga talan-awon nga makangilidlis sa mga Cristiano.” Sa amo, siling ni Fuhr­mann, ang Cristiano “nagdumili sa pagsaulog sing kaadlawan.”

Daku nga Balod sa Pinansial

Kap-atan ka tuig sa tapos malutos sa Inaway Kalibutanon II, ang Hapon malapit na mangin nagapanguna nga manugpautang sa kalibutan, siling sang De­troit Free ­Press. Ang nagabaha nga kuwarta, nga nagarepresentar sa mga sinuptan sang mga bumalakal kag sang ganansiya sang Hapones nga industriya, nagalambas sa ekonomiya sang kalibutan sa kadasigon nga $50 bilyones tubtob $100 bilyones (U.S.) kada tuig, ang mga katunga sini nagakadto sa Estados Unidos. Suno sa report, ang kabangdanan sini amo ang ekonomiya karon sang Amerika, “ang tumalagsahon kabaskog nga dolyar sini, ang resto sini sa pederal nga badyet, ang mataas nga saka sini, kag ang daku nga utang sini.” Si Mr. C. Fred Berg­sten, direktor sang In­sti­tute for In­ter­na­tion­al Eco­nom­ics, nagabanta nga, sa karon nga lakat, sa sulod sang lima ka tuig ang Estados Unidos makautang sa Hapon kag sa nabilin nga bahin sang kalibutan sing isa ka trilyon ka dolyar (U.S.), kag ang nabilin nga bahin sang kalibutan makautang sa Hapon sing $500 bilyones (U.S.).