Ang Pagtamod sang Biblia Tuhoy sa Sekso
PARA sa madamo sang sinsero nga Katoliko, indi sila makapati kag nagakakibot sila sa ideya nga si Maria seksuwal nga naghiusa sa iya bana nga si Jose. Amo sini bangod ang bug-os nga panimuot sang ila iglesia sa sekso naghatag sa kinaandan nga Katoliko sing impresyon nga ang isa ka tawo indi mahimo nga mangin balaan kon sia may seksuwal nga paghiusa, bisan pa kasal sia. Apang indi bala magkabagay ang pag-asawahay kag pagkabalaan? Ano ang ginapakita sang Biblia?
Sa dumaan nga Israel, ginpatuman sang Dios nga ang mga pari dapat mangin balaan, apang nagakaigo sa ila ang pagminyo. (Levitico 21:6, 7, 13) Sa Cristianong kongregasyon, si Pedro—nga ginakilala sang Iglesia Katolika subong amo ang una nga papa—isa ka minyo nga tawo, subong man ang kalabanan sang mga apostoles. (Mateo 8:14; 1 Corinto 9:5) Sa sulod sang Cristianong kongregasyon, ang isa ka “manugtatap” (“obispo,” sa Katoliko nga Douay Version) mahimo mangin “bana sang isa ka asawa.” (1 Timoteo 3:2) Kag ang “mga gulang” (“mga pari,” sa Douay) mahimo nga minyo. (Tito 1:5-8) Sa kamatuoran, ang tanan sang matutom nga Cristiano sang unang siglo “mga pinili sang Dios, balaan kag hinigugma,” kag madamo sa ila ang minyo. (Colosas 3:12, 18-21) Indi makatarunganon isiling nga ining pag-asawahay wala sing sekso, kay talangkod nga nagasumpakil ini sa laygay sang apostol sa 1 Corinto 7:2-5.
Sa amo, suno sa Biblia, ang pag-asawahay kag pagkabalaan wala nagasumpakilay. Tawgon bala sang Dios ang iya kaugalingon subong ‘bana’ sang Israel, kag tawgon bala sang Biblia si Cristo subong “bana” sang Cristianong kongregasyon, kon may butang nga mahigko sa pag-asawahay?—Isaias 54:5; 62:4, 5; Efeso 5:23-32; Bugna 19:7; 21:2, 9.
Busa, indi kita dapat hilasan sa pagbaton sang maathag nga pamatuod sang Biblia nga, sa tapos sang ulay nga pagkabun-ag ni Jesus, si Jose kag si Maria normal nga nagkabuhi subong mag-asawa, kag nanganak si Maria sing iban pa nga mga anak nga lalaki kag mga anak nga babayi. Ini sila mga utod nga lalaki kag babayi ni Jesus sa iloy, ang kada isa sa ila ginbun-ag ni Maria. (Mateo 1:24, 25; Marcos 3:31) Wala ini nagapugong sa aton sa paghigugma kag pagtahod kay Maria subong isa ka balaan nga babayi, subong nga ang pagbun-ag ni Sara kay Isaac wala magpugong kay Pedro sa pagsambit sa iya lakip sa “balaan nga mga babayi” sang una.—1 Pedro 3:5-7; Hebreo 11:11, 12.
Diborsio kag Pagpugong sang Pagpamata
Husto ang Iglesia Katolika sa pagpaluya sang buot batok sa diborsio kag pagtagudili sa aborsion. Apang may pagsakdag bala ini sang Biblia sa pagsikway sa diborsio sa bisan ano man nga rason kag sa pagsiling nga ang “tagsa ka buhat sang pag-asawahay dapat magpabilin nga bukas sa pagpaliton sing kabuhi”?—Humanae Vitae.
Sang ginsuguran, ginpatok ni Jehova nga Dios ang pag-asawahay subong isa ka permanente nga wagkus sa ulot sang isa ka lalaki kag isa ka babayi. (Genesis 2:22-24) Ginpasag-uli ni Jesus ini nga talaksan sa sulod sang Cristianong kongregasyon, nga nagasiling, “Ang gintingob sang Dios dili pagbulagon sang tawo.” Apang, sia nagdugang, “Ang bisan sin-o nga magbulag sa iya asawa, kon indi bangod sa pagpakighilawas, kag magpangasawa sing iban nagapanglahi.”—Mateo 19:4-6, 9; 5:32.
Busa, ang Biblia nagasiling nga ang seksuwal nga pagkadimatutom isa ka balido nga sadsaran sang diborsio, sa kamatuoran, amo lamang ini ang balido nga sadsaran. Ang Iglesia Katolika wala sing maayo nga nahimo para sa iya kaugalingon, ukon para sa minilyon ka katapo sini, paagi sa pagkaestrikto sing labi pa sa Kasulatan tuhoy sa sini nga butang. Nagakomento tuhoy sa mga resulta sining pagsulundan sa bug-os nga maragtas, ang The New Encyclopædia Britannica nagasiling: “Ang estrikto nga monogamiya may kaangtanan sa kinaandan kag lapnag na nga buhat sang pagpanglahi, nga ginapabay-an lamang sang Iglesia Katolika Romana sang sa diborsio.”
Tuhoy sa pagkontrol sang pagpamata, ang nagapanguna nga Katoliko nga teologo, si Augustine (354-430 C.E.) nagkabig sang seksuwal nga paghiusa, bisan sa sulod sang pag-asawahay, nga sala kon ini may ginhimo agod punggan ang pagmabdos. Sa pila ka kasangkaron isa ini ka pagtamod sang Iglesia Katolika, subong ginbalay ni Papa Paulo VI sa iya ensiklikal sang 1968 nga Humanae Vitae kag ginpalig-on liwat ni Papa Juan Paulo II. Isa ini ka pagsulundan nga nagtublag sing daku sa sinsero nga mga Katoliko. Apang wala ginadumilian sang Biblia ang pagpugong sang pagpamata; wala ini sing ginasiling tuhoy sa sini nga butang.
Sa pihak nga bahin, wala ginaugyunan sang Biblia ang aborsion, subong ginpakita sang rekord sa Exodo 20:13 kag 21:22, 23. Nagalakip ini sa mga metodo sa pagpugong sang pagpamata nga nagapanghikot sa tapos makasugod na ang pagpanamkon, bangod kaangay lamang ini sa pagpatay sa isa ka indibiduwal nga nagtubo na. Luwas sa sini, ginabilin sang Biblia ang butang tuhoy sa pagplano sang pamilya sa konsiensia sang tagsa ka Cristianong mag-asawa. Sa pagpatuman gihapon sang iya tindog tuhoy sa pagpugong sang pagpamata, ang Roma “naglabang sa ginpahamtang” sa Pulong sang Dios.—1 Corinto 4:6, The New American Bible, isa ka Katoliko nga badbad.
Ang Biblia kag ang Panaad nga Indi Magminyo
Bisan pa, subong nahangpan na naton kaina, ang pilit nga panaad nga indi magminyo wala ginapatuman sang Biblia, ang Biblia nagahambal tuhoy sa kinabubut-on nga pagkadiminyo. Si Jesus nagpaathag: “May mga tawo nga wala sing ikasarang sa sekso sa ila pagkatawo; ang iban hungod nga naghimo sini; kag may mga tawo nga sing kinabubut-on nagsikway sa sekso bangod sa paggahom sang Dios. Pabayai sia sa pagbaton sini nga panudlo.” (Mateo 19:12, NAB) Sa amo wala magsiling si Jesus nga dapat ipatuman ang panaad nga indi magminyo; sa kamatuoran, subong ginpakita na namon, ang iban sang iya mga apostoles minyo nga mga tawo.—Marcos 1:29, 30; 1 Corinto 9:5)
Si apostol Pablo naghambal man tuhoy sa kinabubut-on nga indi pagminyo para sa Cristianong mga lalaki kag Cristianong mga babayi, kag nagapaathag: “Wala ako sing tuyo nga dumilian kamo, kundi luyag ko nga pauswagon ninyo ang maayo, ang butang nga magabulig sa inyo sa paghugod sang inyo kaugalingon sing bug-os sa Ginuo.” (1 Corinto 7:8, 35, 38, 40, NAB) Maathag nga gikan sa pagtamod sang Biblia, ang pagkadiminyo isa ka dulot nga sarang mapalambo sang pila ka Cristiano, lalaki man ukon babayi, agod mahugod nila ang ila kaugalingon sing bug-os pa kag sing hilway sa pag-alagad sa Dios. Indi kinahanglan ang panaad, kag wala dapat sing piliton.—1 Corinto 7:28, 36.
Sa kabaliskaran, ang ginapatuman nga panaad nga indi magminyo isa ka tanda sang apostasya, subong mabasa naton sa 1 Timoteo 4:1-3: “Ang Espiritu nagasiling sing hayag nga sa ulihi nga mga tion ang iban magatalikod sa pagtuo kag magapamati sa malalangon nga mga espiritu kag sa mga butang nga gintudlo sang mga demonyo paagi sa mga butigon—mga tawo nga ginhirohan ang ila mga konsiensia nga nagadumili sang pagpangasawa.”—NAB.
Sunda ang Pagtamod sang Biblia
Ang pagpanalawsaw sa Katoliko nga mga reperensya nagapakita nga ang Katoliko nga doktrina kag pagsulundan tuhoy sa sekso nanggamut sing tudok sa paganong misteryo nga mga relihion. Ang resulta nagtamay sa pagpangasawa, nagtuga sing natublag nga konsiensia tuhoy sa sekso, kag nagpabudlay sa madamo sang sinsero nga Katoliko.
Sa pihak nga bahin, ginapakita sang Biblia nga ang pag-asawahay dungganon kag nga ang seksuwal nga paghiusa sa sulod sang pag-asawahay nga kahimusan wala nagapugong sa isa ka Cristianong lalaki ukon Cristianong babayi nga mangin balaan sa panulok sang Dios. Ginapakita man sini nga ang kinabubut-on nga pagkadiminyo mahimo nga makapaladya sa espirituwal kon ang tion kag kusog sang isa ginagamit sa pag-alagad sa Dios.
Ginalauman nga ining malip-ot nga pagrepaso sa mga butang may kaangtanan sa sekso makabulig sa nagapamensar nga mga Katoliko kag sa iban nga natublag, kag nagaantos pa gani, bangod sang estrikto nga mga panudlo nga naghalin sa Babilonianhon nga mga misteryo sang dumaan nga tion. Subong ginapamatod-an sang madamo nga awtoridad, wala ini ginatudlo sang Biblia. Kon ang doktrina sang bisan anong relihioso nga hubon wala nahisanto sa Kasulatan, indi dapat matublag ang mahinadlukon sa Dios nga mga tawo sa indi pag-ugyon sa sini. Ina sila tanan nga mga tawo ginapalig-on nga usisaon ang doktrina sang iglesia sa kapawa sang Pulong sang Dios, nga ginadumdom ang pasalig ni Jesus: “Kon magkabuhi kamo suno sa akon panudlo, kamo matuod gid nga mga disipulo ko; nian mahibaloan ninyo ang kamatuoran, kag ang kamatuoran magahilway sa inyo.”—Juan 8:31, 32, NAB.
[Larawan sa pahina 11]
Indi kinahanglan nga dingotan sang isa ang iya kaugalingon nga indi magminyo agod makabantala sang Pulong sang Dios. Si apostol Pedro indi subong sini