Pamangkot sang mga Pamatan-on...

Daw Ano ka Importante ang Hitsura?

‘Naugot ako sa akon lawas,’ panganduhoy sang 16-anyos nga si Maria. ‘Daw kalaw-ay sa akon’

NAGASILING ka bala nga indi mo luyag ang imo hitsura? Bueno, pila lamang sa aton—kon may yara gid man—ang kontento sing bug-os sa aton pisikal nga panagway. Indi subong ni Narcissus, nga naghigugma sa iya banaag sa tubig, ang pila sa aton halos ginapung-awan kon makita naton ang aton hitsura sa espiho.

Amo sini labi na kon ikaw isa ka pamatan-on nga nagatubo pa lang kag ayhan mahunahunaon sa kaugalingon nga pamatan-on. ‘Naugot ako sa akon lawas,’ panganduhoy sang 16-anyos nga si Maria. ‘Daw kalaw-ay sa akon.’ Amo man ang ginareklamo sang 13-anyos nga si Bob: ‘Indi ko luyag ang akon buhok, labi na ang hitsura sini sa likod sang akon ulo.’

Sa pagkamatuod, kinaugali lamang ang maghandum nga mangin makagalanyat tulukon. Kag makatarunganon nga atipanon mo ang imo personal nga panagway. Walay sapayan, ang kabalaka sa imo hitsura amo bala ang nagapangibabaw sa imo hunahuna? Naugot ka bala sa imo kaugalingon bangod sang imo hitsura? Kon amo, pamangkota ang imo kaugalingon, Daw ano ka makatarunganon ang akon mga reklamo? Indi ayhan nga nasiod lamang ako sang walay katapusan nga paghandum sa mas berde nga hilamon?

Mas Berde nga Hilamon

Huo, para sa madamo, ang kabuhi subong sang walay katapusan nga kubay sang mga kural nga may berde nga hilamon sa pihak. Nakakita na kamo sing subong sini nga mga tawo. Ang niwangon nga lin-ay nga nagahunahuna maniwang sia, gani nagakaon sia todo agod magtambok. Ang bilugan nga lin-ay nga nagadumdom matambok sia, daw halos mapatay sa pagpagutom. Ukon ang mga tawo subong ni Annie, nga mas madasig magtubo sang sa iya mga kaeskwela. Nalipay bala sia sa iya adulto nga kadakuon? Sia nagsiling: “Mas mataas ako sa tanan. Nahuya ako. May yara ako katitiya nga abyan kag nahisa gid ako sa iya.”

Sa amo, nagadamo ang mga bulig kag mga gamit sa pagpatahom. Ang plastik nga mga manugbusbos nagadamo kag nagatin-ad. Kag may peligro sa lawas kag sa kalipay, ang mga pamatan-on nagakabalaka nahanungod sa indi mabag-o. May yara bala paagi paguwa sa sining walay katapusan nga pagkadinaayawan? Huo! Apang ang sekreto amo ang paghupot sing husto nga pagtamod sa imo hitsura. Paano mo ini matigayon? Magsugod kita paagi sa paghangop kon ngaa subong sina ang imo ginabatyag.

Mabaskog nga mga Impluwensia

Madamo nga puersa ang nagaimpluwensia sa aton mga pagtamod kag mga balatyagon nahanungod sa aton mga hitsura. Ang isa sina nga impluwensia nagahalin sa sulod. Ginatawag ina sang Biblia nga “mga kaligbon nga pinamatan-on.” (2 Timoteo 2:22) Ining mga kailigbon nagapadayag sang ila kaugalingon sa madamo nga paagi, kag isa sina amo ang napahabok nga kabalaka sa kon ano ang aton hitsura.

Apang, sing makawiwili, ang propesor sang sikyatriya nga si Richard M. Sarles nagapakita nga ina nga mga kailigbon masami nga ginapaayawan: “Ang paghinupang isa ka panahon sang pagbag-o nga sa diin nagakatabo ang isa ka daku nga pag-organisar liwat sang lawas. . . . Agod maatubang ang pagkabalik-awot sang bag-o kag nagabag-o nga lawas, ang kalabanan nga pamatan-on nagasandig sa kalig-onan sang ila mga katubotubo.” Sa iban nga mga pulong, kon indi matalupangdan sang aton mga abyan kon daw ano kadaku ang aton ilong, wala naton ini ginasapak. Apang kon matalupangdan gani ini sang aton mga katubotubo, matalupangdan man naton ini.

Ang isa pa ka makahalaylo nga impluwensia amo ang malalangon nga sistema nga ginatawag media. Gikan sa pagkabata, ang TV, mga libro, kag ang mga sine nagatudlo sa aton nga ang “maayo” nga mga tawo matahom kag ang “malain” nga mga tawo malaw-ay, isa ka tema nga pirme ginasambit sang media. Ginapalain sini ang huyog sang dihimpit nga mga tawo nga “tulukon ang sa atubang sang ila mga mata,” ilugon ang mga tawo sa ila mga hitsura.—2 Corinto 10:7.

Sa amo ginapapati ikaw sang media nga kon ikaw indi moderno, makabibihag, mataas sing tul-an sa guya, pino supat, ukon maskulado nga lalaki, maayo pa nga manago ka na lang sa buho—ukon sa dimagkubos indi na magtinguha pa nga mangin popular, madinalag-on, ukon malipayon. Sa pagkamatuod, sing hungod mahimo nga nahangpan mo kon ano ang sang media: wala gid sing pulos. Apang, ang kalabanan sang epekto sang media indi mamutikan. Sing malalangon ukon dayag, ang katahom ginahandum ukon ginasimba! Ang talalupangdon nga mga hitsura nagapadahog sang tanan nga butang halin sa pahumot tubtob sa mga chain saw. Subong resulta, madamo nga tawo ang wala lamang nagabakal sang mga produkto kundi sang tiko man nga ideya nga ang hitsura amo ang labing importante.

Pag-away sa ‘Matahom nga mga Tawo’ nga Pantasya

Sa wala sing duhaduha, nian, ang pantasya sang ‘matahom nga mga tawo’ nagaapektar sa madamo. Ang kabuhi nangin isa ka walay katapusan nga pagtiyog sang uso nga mga kalan-on, matahom nga mga kosmetiko, kag mahal nga mga pagpabulong. Apang, ang Biblia nagasiling: “Indi pagtuguti ang kalibutan nga ipilit ikaw sa iya mga dihonan.” (Roma 12:2, Phillips) Hunahunaa: Sin-o ang nagapauswag sang ideya nga kinahanglan mo ang katahom agod mangin popular ikaw, madinalag-on, ukon malipayon? Indi bala ang mga manugproduktor kag mga manugpasayod nga nagaganansia sa sina nga paglimbong? Ngaa tugutan mo nga dihonon nila ang imo panghunahuna? Kag kon imo mga abyan ang nagapakanubo sang imo hitsura, ­sin-o ang nagakinahanglan sing subong sina nga “mga abyan”?

Ang Biblia dugang pa nga nagalaygay sa imo nga “maghunahuna agod makatigayon sing maligdong nga hunahuna.” (Roma 12:3) Nagakahulugan ini sing pagduhaduha sa propaganda—kon bala gikan sa mga abyan ukon sa media—nga nagapauswag sang indi pagkakontento sa kaugalingon. Indi bala matuod nga pila gid lamang ka tawo ang matahom kaayo? “Ang katahom nagabukal,” siling sang Biblia. (Hulubaton 31:30, Byington) Gani bisan ang mga tawo nga ginabayaran sa ila katahom wala nagadugay—antes sila sikwayon para sa bag-o naman nga nawong. Subong man, ang mga kalatingalahan mahimo para sa nawong kag lawas paagi sa mga make up, suga, kag madyik sang potograpiya. Ang iban nakibot sang makita nila ang ila paborito nga artista nga wala makapahinar!

Isa pa ka punto nga hunahunaon: Indi bala nga kinaandan lamang ang katahom sang imo kalabanan nga abyan? Ang iban sa ila paagi sa pila ka talaksan mahimo kabigon nga indi makagalanyat. Kag kamusta ang imo mga ginikanan? Magamit bala sila nga panghapin sa isa ka magasin sang moda? Ayhan indi. Apang ginabag-o bala sina ang imo balatyagon sa ila? Sa kamatuoran, sa tion nga maapresyar mo kon ano sila kag kon ano ang ila hitsura, ayhan talagsa mo lang gani ginapamensar ang ila mga hitsura.

Subong katapusan, indi bala matuod nga subong isa ka nagatubo nga pamatan-on, ang imo panagway nagabag-o? Ang mga tin-edyer nagahamtong sa lainlain nga kadasigon. Gani kon mataas ukon ikaw manubo, ukon indi husto ang kolor sang imo panit, magmapailubon. Mahimo nga bulngon sang tion ang pila sining ginatawag nga mga diperensya.

Sa amo ang pagtamod sa mga bagay upod ang maligdong nga hunahuna makahilway sa imo gikan sa makapalaslaw nga pagtinguha nga tupungan ang indi kinaugali nga mga hitsura sa mga telon kag mahining nga mga magasin ukon sa pagpaanggid sang imo kaugalingon sa iban. May yara ikaw mga abilidad nga labaw pa sa pisikal nga mga kakulangan—ginahanduraw ukon matuod. Apang, may isa pa ka importante nga butang nga dapat mo binagbinagon.

Ang Panghunahuna sang Dios sa Butang

Natalupangdan mo bala kon daw ano ka diutay nga nagahambal ang Biblia nahanungod sa hitsura sang mga tawo? Ngaa wala kita ginsugiran kon ano ang hitsura ni Abraham, ni Maria—ukon ni Jesus? Maathag nga wala ini ginakabig sang Dios nga importante.

Sa kamatuoran, ginsikway anay sang Dios para sa pagkahari ang isa ka pamatan-on nga nagahingalan kay Eliab, nga isa ka mabukod nga lalaki! Si Jehova nga Dios nagpaathag kay manalagna Samuel: “Dili ka magtulok sa iya nawong ukon sa iya kataason. . . . Kay ang Dios nagatan-aw indi subong sang pagtan-aw sang tawo, bangod ang makita sang tawo amo lamang ang makita sang mga mata; apang makita ni Jehova kon ano ang tagipusuon.” (1 Samuel 16:6, 7) Sa baylo ginpili sang Dios ang pamatan-on nga nagahingalan kay David.

Makatarunganon, kon amo, nga ginapalig-on kita sang Biblia nga isentro ang aton igtalupangod, indi sa naguwa nga pagpamuni, kundi sa “tago nga tawo sang tagipusuon.” (1 Pedro 3:3, 4) Sa pagkamatuod, wala ini nagakahulugan nga pabay-an naton ang aton naguwa nga panagway. Ginapalig-on kita sang Biblia nga maghupot sing mataas nga talaksan sang pagpanapot kag pagpamustora. (Ipaanggid ang 1 Timoteo 2:9.) Sa gihapon, mahimo nga matublag kita kon kaisa sa aton naguwa nga panagway. Apang daw ano nga paumpaw ang mahibaloan nga ang importante sa Dios indi ang aton mga hitsura! “Makita niya kon ano ang tagipusuon.” Busa indi bala maalamon nga mag-untat sa pagkabalaka sing daku nahanungod sa aton mga hitsura kag magpangabudlay sa baylo sa pagpatahom sang aton tagipusuon sa atubangan niya?

[Laragway sa pahina 14]

Ang imo indi naluyagan sa imo kaugalingon mahimo nga ginakaibogan sang iban

[Laragway sa pahina 15]

May yara ikaw mga ikasarang nga labaw pa sa pisikal nga mga kakulangan