Ang Pagtamod sang Biblia

May Ginsuguran Bala ang Dios?

ANG maduhaduhaon nga Pranses, nga nagatindog sa atubangan sang iya balay, nagtulok sa isa sang mga Saksi ni Jehova sing diretso sa mata kag nagsiling: “Kon masugiran mo ako kon sa diin naghalin ang Dios, mamati ako sa imo.” Ang Saksi kalma nga nagsabat: “Ang pila ka makatarunganon gid nga mga tawo nakadangat sa konklusion nga pareho sa konklusion sang Pranses nga pilosopo nga si Vol­taire sang ika-18 nga siglo, nga nagsiling: ‘Kon wala nagaluntad ang Dios, kinahanglan nga imbentuhon sia.’ Nabinagbinag mo bala kon ngaa ang isa ka intelihente nga tawo kaangay ni Vol­taire naghambal sina?”

Ginbaton sang lalaki nga wala niya ini mabinagbinag kag ginpasulod niya sa iya balay ang Saksi. Ginpasangkad sang Saksi ang iya pangatarungan paagi sa masunod nga mga punto.

Mangin Makatarunganon Kita

Kaangay ni Vol­taire, madamo nga tawo ang may opinyon nga ang kabuhi kag ang uniberso may kabangdanan. Agod mangin sampat sa pagpatubas sang mga butang nga aton makita, kinahanglan nga ining kabangdanan may mga gahom kag mga kinaiya, subong sang enerhiya, ikasarang sa pag-organisar, pagkaartistiko, gugma, kag kaalam. Ngaa? Bangod ang mga butang nga makita sa uniberso, labi na sa aton planeta nga Duta, nagapakita sining mga kinaiya. Karon, indi ini mga kinaiya sang mga butang, kundi sang mga tawo. Gani ang aton mahinakop amo ang ideya nga may isa ka Supremo nga Persona—ang Dios.

“Maayo gid,” sabat sang madali magpati nga Pranses, “apang sa diin maghalin ang Dios?”

Wala sing Ginsuguran

Ginaatubang kita sang makita nga kamatuoran sang isa ka materyal nga uniberso kag sang madamo nanuhaytuhay nga mga porma sang kabuhi sa duta. Sa diin sila maghalin? Ang iban nga mga sientipiko, bisan pa indi tanan, nagasiling nga ining mga porma sang kabuhi nataboan lamang nga nagtuhaw. Apang ang nanuhaytuhay nga mga teoriya sang mga sientipiko pirme nagapati nga nagluntad ang isa ka butang, ano man ang itawag nila sa sini. Nagasiling sila, kag husto gid, nga ang materya isa ka porma sang enerhiya. Pasad sa sina, nagapati sila nga ang materyal nga uniberso aksidente nga nagluntad. Apang wala nila ginapaathag kon paano nagluntad ang umpisa nga hugpong sang mga kahimtangan. May yara pirme nauna nga isa ka butang nga indi nila mapaathag kon sa diin maghalin.

Gani ginahaumhaum sang mga ateista ang pagluntad sang isa ka butang, samtang ginahaumhaum sang mga nagapati sa Dios ang pagluntad sang isa ka persona. Bangod sang tanan nga kinaugali nga kasugoan, pagkasibu sa matematika, organisasyon, kag kaalam nga makita sa duta kag sa bug-os nga uniberso, nakita sang mga Saksi ni Jehova nga mas makatarunganon ang maghinakop nga ang Unang Kabangdanan isa ka Persona sa baylo nga isa ka butang, isa ka intelihente nga Manunuga sa baylo nga isa ka bulag nga puersa. Sa baylo sang sadsaran sang ateismo, ‘Sa ginsuguran isa ka butang,’ ginapasulabi nila ang nagabukas nga mga pulong sang Biblia, “Sa ginsuguran ang Dios.”—Genesis 1:1.

“Nahibaloan ko nga balikwaton mo ang Biblia,” siling sang nagapamangkot nga Pranses.

Ang kamatuoran amo nga nasapwan sang mga Saksi ni Jehova nga makatarunganon ang pagtamod sang Biblia tuhoy sa sadsaran nga mga kamatuoran kag nahisanto sa makita nga mga katunayan. Usisaon naton ang pila.

Ang Isa ka Butang Indi Mahimo Maghalin sa Wala. Wala sing sientipiko nga nakapatubas sing isa ka butang gikan sa wala. Mabag-o lamang ukon mapauswag sang tawo ang nagaluntad na nga mga materyales. Sing kaanggid, wala sing isa nga maligdong sing hunahuna ang magasiling nga ang ginpatubas nga artikulo nagtuhaw lamang. Ang Biblia nagahambal subong isa ka maathag nga kamatuoran: “Sa pagkamatuod, ang tagsa ka balay gintukod sang isa.” Nian nagapadayon ini nga may makatarunganon nga konklusion: “Apang ang nagtukod sang tanan nga butang amo ang Dios.” (Hebreo 3:4) Ang pagkilala nga ang balay nagkinahanglan sing arkitekto kag manunukod kag, sa amo man nga tion, magsiling nga ang isa ka komplikado nga atomo, molekula, ukon selula naghalin sa wala indi makatarunganon gikan sa pagtamod sang Biblia. Ang Biblia makatarunganon nga nagapamangkot: “Magasiling bala ang butang nga nahuman sa naghuman sa iya: ‘Wala niya ako paghimua’?”—Isaias 29:16.

Ang Kabuhi Nagahalin sa Kabuhi. Bisan pa ang iban nga mga tawo nagapadayon sa pagpati nga ang kabuhi naghalin sa indi buhi nga materya, wala pa kita makakita sing mga pabrika nga nagabag-o sang madamo nga kemikal kag ginahimo nga buhi nga mga selula. Kon ang kabuhi nataboan lamang, ngaa indi masulit sang tawo ang propeso kag mapauswag pa? Bangod ginapakita sang mga kamatuoran nga ang tanan buhi nga butang naghalin sa nagaluntad na nga daan nga buhi nga mga butang. Ginakilala sang Biblia nga ang Unang Kabangdanan isa ka buhi nga Persona, nga nagasiling: “Kutob sa tion nga indi pat-od tubtob sa tion nga indi pat-od ikaw ang Dios.” “Ikaw ang tuburan sang kabuhi.”—Salmo 90:2; 36:9.

Ang Materya Isa ka Porma sang Enerhiya. Ang Biblia bug-os nga nagaugyon sa kamatuoran nga napamatod-an sang siensya nga ang materya isa ka porma sang enerhiya. Natukiban sang tawo kon paano pagguwaon ang enerhiya gikan sa materya sa iya mga bomba atomika kag sa iya mga estasyon sang nuklear nga gahom. Ginapakita sang Biblia nga ang Dios amo ang tuburan sang enerhiya nga yara sa materyal nga uniberso. Aton mabasa: “Itangla ang inyo mga mata sa hitaas kag tan-awa [mga grupo sang sistema solar, mga bituon, mga galaksiya]. Sin-o ang nagtuga sining mga butang? Sia nga nagapaguwa sang ila kasoldadosan sa isip. . . . Bangod sang bugana nga dinamikong enerhiya, kag bangod nga makusog sia sa gahom, wala sing isa sa ila nga nakulang.” (Isaias 40:26) “Sia ang Magbubuhat sang duta paagi sa iya gahom.”—Jeremias 10:12.

Ang Uniberso Nagahatag sing Pamatuod sa Katuyoan. Sa eksperiensia sang tawo, ang kagumon wala gid nagabunga sing kahim-ong. Busa, makatarunganon bala ang magpati nga ang kahim-ong nga kitaon sa duta, upod ang mga panahon kag mga siklo sini nga kinahanglanon gid sang mga tanum, mga sapat kag mga tawo, nataboan lamang? Sa baylo, wala bala ining mga butang nagahatag sing pamatuod sa desinyo kag katuyoan? Ang Biblia nagasiling: “Amo ini ang ginsiling ni Jehova, ang Manunuga sang mga langit, Sia amo ang matuod nga Dios, ang Taghuman sang duta kag ang Magbubuhat sini, Sia nga nagpalig-on sini, nga wala magtuga sini sa walay pulos, nga naghuman sini agod puy-an.”—Isaias 45:18.

Ang Dalayawon nga Katuyoan Para sa Duta

Ang nagaduhaduha nga Pranses nagsiling: “Gintuga man ukon wala, daw matabo gid nga ang duta sa ulihi indi na mapuy-an.”

May rason sia sa iya ginakahadlokan. Gani ang pililian karon amo ang wala sing paglaum nga indi pagpati kag ang makatarunganon nga pagkilala sa dayon nga Manughatag-Kabuhi, nga ang iya nasulat nga Pulong nagatanyag sing paglaum nga magkabuhi sing dayon sa duta sa isa ka tugob-globo nga paraiso. (Mateo 6:10; Salmo 37:9, 11, 29) Sa pagkamatuod takus gid usisaon ina nga paglaum.

[Laragway sa pahina 17]

“Kon wala nagaluntad ang Dios, kinahanglan nga imbentuhon sia.”—Pranses nga pilosopo Voltaire