Wala sing Puluy-an—Apang Buhi!

Sang koresponsal sang “Magmata!” sa Hapon

ANG una nga mga barko nga nagadala sang mga nag-ibakwit nag-abot sa pantalan sa Izu Peninsula sang gab-i sang Nobiembre 21. Sang ulihi ginpamat-uran nga ining mga tawo dalhon sa Tokyo, kay ang Oshi­ma sakop sang metropolitan nga pangulohan sang Tokyo. Upod sa nasyonal nga pangulohan, ang metropolitan nga pangulohan nag-organisar sing mga bulig. Ang mga Saksi ni Jehova sa Izu kag sa Tokyo subong man sa mga sanga talatapan sa Siudad sang Ebina, nga mga 50 milya lamang (80 km) gikan sa ­Mount Mihara, nag-organisar man sing bulig.

Samtang ang mga balita tuhoy sa hitabo nagasal-ot sa regular nga mga programa sang telebisyon, ang mga Saksi ni Jehova nga nagapuyo sa malapit nabalaka gid nahanungod sa ila espirituwal nga kauturan nga lalaki kag babayi sa isla. Si Nobumasa Obata sang Kongregasyon sang Ito kag ang iban pa nakig-angot sa mga Saksi sa Izu kag nag-organisar sing hilikuton sa pagbaton sa mga nag-ibakwit. Sang alas 6:30 s.g. sadto nga adlaw, ang mga Saksi nagahulat sa pantalan sa Izu Peninsula kag sa Atami, agod batunon ang ila kauturan gikan sa Oshi­ma.

Sang mag-abot si Jiro Nishimura kag ang apat pa sa Atami sang mga alas dies sadto nga gab-i, ginsugat sila sang mga Saksi sa Atami nga nagauyat sing Lalantawan kag Magmata! nga mga magasin. Sanglit wala pa makapamat-od ang awtoridad sang pangulohan kon ano ang himuon, gintugutan ang mga nag-ibakwit sa pagdayon sa bisan kay sin-o nga maluyagan nila. Nagkadto sila sa Yuga­wara, nga sa diin ang anak nga lalaki ni Nishimura nagaalagad subong isa ka gulang sa lokal nga kongregasyon. Ang apart­ment nga ila gindayunan nangin sentro para sa mga nag-ibakwit sang Kongregasyon sang Oshi­ma.

Sang alas 8:00 pagkaaga, ang Komite sang Sanga sa sanga talatapan sang Watch Tower Society sa Ebina namat-od nga magpadala sa gilayon sing duha ka tiglawas sang sanga sa Izu kag duha sa Tokyo agod mag-organisar sing bulig.

Samtang ginahambalan sang mga tiglawas sang sanga ang bulig upod kay Nishimura, si Mitsuo Shiozaki nag-abot nga may dala nga bulig gikan sa iya kongregasyon sa Numazu. Gin-apresyar gid sang mga nag-ibakwit ang mga panapton nga ginpanagtag niya sa ila, kay kadamo sa ila ang wala makadala sing panapton luwas sa ila ginasul-ob sang magbiya sila sa isla. Mapinasalamaton nga ginbaton man nila ang kalan-on nga gindala niya.

May mga komite para sa bulig nga gintangdo sa Izu kag sa Tokyo agod managtag sing kinahanglanon nga mga pundo sa mga katapo sang Kongregasyon sang Oshi­ma. Ining mga komite nag-atipan man sang espirituwal nga mga kinahanglanon sang mga nag-ibakwit.

Bulig sa Tokyo

Sang alas 9:55 s.g. sang Nobiembre 21, sa tapos makahalin ang pila ka barko nga may dala nga mga nag-ibakwit para sa mga siudad sa Izu Peninsula, ang gobernador sang Tokyo nagmando nga ang tanan nga nag-ibakwit dalhon sa Tokyo. Si ­Yoshio Nakamura, isa ka gulang sa Kongregasyon sang Mita sang mga Saksi ni Jehova sa Tokyo, ginpangabay sa pag-organisar sing bulig didto. Ang apart­ment ni Nakamura amo ang nangin ulong-talatapan sang bulig sa Tokyo.

Nagpaupod sia sa pila gikan sa iya kongregasyon kag gikan sa Kongregasyon sang Shinagawa. Napulo sa ila sini ang nagbiya kay Nakamura sang mga alas dos sang Sabado sang aga kag nagkadto sa mga pantalan nga sa diin naiskedyul nga magaabot didto ang mga barko gikan sa Oshi­ma. May karatula ang mga kauturan nga nagasiling: “Mga katapo sang Oshi­ma Con­gre­ga­tion of Je­ho­vah’s Wit­ness­es, palihog makigkita sa amon.”

Tubtob wala mag-abot ang katapusan nga barko, nagpakadto-pakari sila sa duha ka pantalan nga gindungkaan sang mga barko. Pasado na sadto sa alas dies sang Sabado sang aga. Ang mga Saksi ni Jehova sa Kongregasyon sang Chuo nagkadto man sa isa pa ka pantalan nga gindungkaan sang mga barko halin sa Oshi­ma. Bangod wala sila makahibalo kon sa diin nga mga barko nagsakay ang mga masigkatumuluo, ginkadtuan sang mga Saksi sa Tokyo ang tanan nga barko nga nagdungka sa Tokyo.

“Ang mga Saksi ni Jehova,” siling ni Kazu­yuki Kawashima, “amo lamang ang mga tiglawas sang isa ka relihioso nga grupo nga nag-abot agod sugaton ang ila mga masigkatumuluo sa pantalan. Ang lamang nga grupo nga nagsugat sa mga nag-ibakwit amo ang gikan sa unyon sang mga manunudlo.”

Sang Sabado sang gab-i, ang mga katapo sang Kongregasyon sang Mita kag Shinagawa boluntaryo nga nagtipon sing mga panapton kag sing iban pa nga mga bulig agod ipanghatag gilayon sa ila espirituwal nga kauturan gikan sa Oshi­ma. Ginkarga sang mga Saksi ining mga suplay sa van kag ginduaw ang mga dalangpan nga gindayunan sang mga Saksi nga nag-ibakwit. Ang mga Saksi gikan sa Oshi­ma subong man ang mga di-Saksi didto nakabenepisyo gikan sa bulig nga mga suplay.

Napalig-on sang Kabalaka sang Iban

Ang isa ka Saksi nga nag-ibakwit nagsiling: “Sang maghalin kami sa Oshi­ma, wala kami makahibalo kon sa diin kami makadto. Apang sang manaug kami sa barko, nakita namon ang karatula nga nagasiling, ‘Mga Saksi ni Jehova.’ Daku gid ang amon kakibot kag kahamuot! Nagtulo ang mga luha sa mga mata sang akon asawa sang makita niya ang mga kauturan nga nagsugat sa amon sa pantalan.

“Wala lamang madugay sa tapos kami mag-abot sa amon dalayunan sa ­Sports Hall sa Koto Ward kag gintawgan namon si Broth­er Nakamura, ang mga tiglawas sang sanga nag-abot agod palig-unon kami. Nahamuot gid kami sa sini kag indi namon mapabutyag ang amon apresasyon sa pulong.”

Sa sulod sang semana, ang mga katapo sang komite sa pagbulig nagduaw sa tanan nga dalangpan nga ginadayunan sang mga Saksi kag gin-usisa ang mga kinahanglanon sang ila mga masigkatumuluo. Nasapwan nila nga ang nag-ibakwit nga mga Saksi ginaatipan sing maayo sang lokal nga mga kongregasyon. Ang iban nga mga estudyante sang Biblia gin-agda sa mga puluy-an sang lokal nga mga Saksi agod magkaon kada adlaw, kag gin-apresyar nila ini nga mga buhat sang kaluoy nga ginpakita sa ila sang mga Saksi nga indi nila kilala antes sini nga kalamidad.

Madinalag-on ini nga pag-ibakwit bangod nahatag ang nagakaigo nga mga paandam kag ang mga tawo namati sa sini. Apang ang tanan nga katawhan nagaatubang sing daku pa nga katalagman nga nagapakari sing madasig. Ginahatag na karon ang paandam, kag ginapakita sa mga tawo kon paano sila maluwas sa sining katalagman kag maamligan ang ila kabuhi. Pamatian mo bala ining paandam?

[Laragway sa pahina 7]

Si Jiro Nishimura nga nagausisa kon diin ang mga masigkatumuluo*

[Footnotes]

Ining ginahigugma gid nga saksi ni Jehova napatay sang Pebrero 1987.

[Mga Laragway sa pahina 8]

Si Mitsuo Shiozaki nanagtag sing bulig

Madamo nga mga nag-ibakwit ang nagtulog sa mabugnaw nga salog sang gymnasium