Paglaum Para sa mga Patay, Lugpay Para sa mga Nagabakho

SI JESS Romero sa amon nagabukas nga artikulo, nagpangasawa liwat sang ulihi. Tuhoy kay Agustín kag kay Valentina Ca­ra­ba­lloso, ang pagkapatay ni Jon­a­than masakit gihapon, apang kalma na sila. Si Ramón kag si María Ser­rano nga taga-Espanya nagahibi gihapon pagligad sang 24 ka tuig nga napatay si Paquito. Apang sa sini tanan nga kaso, ano ang nagsakdag sa ila? Sila nagasabat: “Ang paglaum nga pagkabanhaw!”

Apang ano gid ang buot silingon naton sa “pagkabanhaw”? Sin-o ang pagabanhawon? San-o? Kag paano naton masigurado?

Paglaum Para sa mga Patay—Subong Gintudlo ni Jesus

Sa tion sang iya ministeryo sa duta, may ginbanhaw si Jesus nga pila ka tawo. (Marcos 5:35-42) Tanda ini sang daku nga pagkabanhaw nga mahanabo kon ang duta sa liwat bug-os nga mangin sa idalom sang paggahom sang Dios, subong amo ang ginapangabay sang minilyon kon sila nagapangamuyo: “Magkari ang imo ginharian. Paghimuon ang imo kabubut-on, subong sang sa langit, amo man sa duta.”—Mateo 6:9, 10.

Ang isa ka halimbawa sang gahom sang Dios sa sini nga bahin amo sang ginbanhaw ni Jesus ang iya abyan nga si Lazaro. Sa amo man nga tion, maathag nga ginapakita sang rekord ang kahimtangan sang patay. Si Jesus nagsiling sa iya mga disipulo: “Ang aton abyan nga si Lazaro natulugan, apang makadto ako agod nga pukawon sia gikan sa katulugon.” Wala makahangop sang kahulugan, ang mga disipulo nagsiling: “Ginuo, kon sia natulugan, maumpawan sia.” Pagdumdom nila sia nagasiling nga si Lazaro natulugan lamang apang, ang matuod, napatay sia. Sa amo, si Jesus maathag nga nagsiling: “Si Lazaro napatay.”

Talupangda, palihog, nga si Jesus wala magpatuhoy sa dimamalatyon nga kalag nga nagasaylo sa lain nga kahimtangan ukon duog. Wala sia maimpluwensiahan sang Griegong pilosopiya kundi sang maathag nga panudlo sang Biblia sa Hebreong Kasulatan. Si Lazaro nagtulog sa kamatayon kag sang mag-abot si Jesus apat ka adlaw na sia nga nalubong sa lulubngan. Gani, ano ang paglaum niya?

Sang magpakighambal si Jesus sa utod ni Lazaro nga si Marta, ginsingganan niya sia: “Ang imo utod mabanhaw.” Ano ang iya ginsabat? Nagsiling bala sia nga ang iya kalag nagkadto na sa langit ukon sa iban nga duog? Ang iya sabat amo: “Nakahibalo ako nga mabanhaw sia sa pagkabanhaw sa katapusan nga adlaw.” Nagtuo man sia sa panudlo sang Biblia tuhoy sa pagkabanhaw pa kabuhi sa duta. Si Jesus naghatag sa iya sing daku pa nga rason nga magtuo sa pagsiling: “Ako ang pagkabanhaw kag ang kabuhi. Ang nagatuo sa akon, bisan mapatay sia, magakabuhi.” Nian, agod pamatud-an ang buot niya silingon, nagkadto sia sa lulubngan ni Lazaro kag mabaskog nga nagsinggit: “Lazaro, guwa ka!” Ano ang natabo?

Ang maragtason nga rekord nagasiling: “Ang tawo nga napatay nagguwa nga nasamburan sa mga kamot kag mga tiil sang mga isalambod nga sa lubong, kag ang iya nawong naputos sang panyo. Si Jesus nagsiling sa ila: ‘Hubari sia kag palakta.’”—Juan 11:1-44.

Amo ini ang paglaum nga nakabulig sa madamo sang namatyan nga mga tawo nga gin-interbyu sang Magmata! Ina man nga paglaum nagapapagsik sa ila nga maglaum sa malapit nga palaabuton kon ang duta mangin isa ka napasag-uli nga paraiso kag ang makainspirar sing paglaum nga mga pulong ni Jesus matuman: “Dili kamo matingala sini, kay ang takna magaabot nga ang tanan nga yara sa mga lulubngan magapamati sang iya tingog kag magaguwa, ang mga nakahimo sing maayo sa pagkabanhaw nga sa kabuhi, kag ang mga nakahimo sing malaut sa pagkabanhaw nga sa paghukom.”—Juan 5:28, 29.

“Ang Akon Paborito nga Teksto Amo . . . ”

Gin-interbyu sang Magmata! ang mga ginikanan kag ang mga pamatan-on nahanungod sa pagkapatay sang isa ka bata sa pamilya.a Sa liwat kag liwat, sa pagpaathag kon paano nila nalandas ang ila pagbakho, sila nagsiling: “Isugid ko sa imo ang akon paborito nga teksto.” Kon nagabakho ikaw, mahimo nga makabulig man sa imo ining mga teksto.

Ang katorse-anyos nga si Yunhee, nga ­taga-Seoul, Republika sang Korea, napatay sa leukemia sang 1985. Ang iya amay, si Chun Kwang-­kook, nagpaathag sa Magmata! kon paano niya ginlugpayan si Yunhee sa tion sang iya katapusan nga mga semana sang kabuhi: “Ginsugiran ko sia sang nahanungod kay Lazaro. Si Jesus nagsiling nga si Lazaro nagakatulog, kag subong sang natabo sa iya, kon si Jesus magtawag, ‘Yunhee! Magmata ka!’ magabugtaw man sia gikan sa katulugon.”

Si Janet Hercock, nga taga-Inglaterra, 13-anyos sang mapatay sia sa kanser sang 1966. Ginbiyaan niya ang iya mga ginikanan kag duha ka utod nga lalaki nga si David kag si Tim­o­thy. Ginsugid ni David sa Magmata! kon ano nga teksto ang nakabulig gid sa iya: “Amo ang Binuhatan 17:31, nga nagasiling: ‘Bangod nga nagtangdo sia [Dios] sing isa ka adlaw nga hukman niya ang napuy-an nga duta sa pagkamatarong paagi sa isa ka tawo nga iya gintangduan, kag nahanungod sini nakahatag sia sing kalig-onan sa tanan nga tawo paagi sa pagbanhaw niya sa iya.’ Sa lubong, ginpadaku sang humalambal nga ang pagkabanhaw ni Jesus amo ang aton kalig-onan sa palaabuton nga pagkabanhaw. Nangin isa ina ka daku nga tuburan sang kusog para sa akon.”

Sang Disiembre 1975 ginkuha sang pamatan-on nga si ­George, nga 14 anyos lamang, ang riple sang iya amay kag ginluthang ang iya kaugalingon. Paano gintamod sang amay ni ­George nga si Rus­sell ining pagkapatay sang iya anak paagi sa paghikog?b

“Ang pila ka kasulatan nangin angkla para sa akon. Halimbawa, ang mga pulong sa Hulubaton 3:5: ‘Salig kay Jehova sa bug-os mo nga tagipusuon kag dili magsandig sa imo kaugalingon nga paghangop.’ Sa pila ka kasangkaron nagsalig ako sa akon kaugalingon nga paghangop sa pagtinguha nga hangpon kon ano ang natabo.”

Ang pamilya nga Morgan, nga taga-Inglaterra, didto sa Sweden sang ang ila anak nga lalaki nga si Dar­rall hinali nga nagmasakit. Ang emerhensya nga operasyon ginhimo sa Stock­holm. Sang ulihi gindala sia sang eroplano pabalik sa Inglaterra, nga sa diin napatay sia sa wala pa ang iya ika-24 nga kaadlawan. Ang iya iloy nga si Nell nagsiling: “Ang isa ka kasulatan nga nagapangibabaw sa akon hunahuna amo ang Mateo 22:32, nga sa diin ginbalikwat ni Jesus ang Dios subong nagasiling: ‘Ako amo ang Dios ni Abraham kag ang Dios ni Isaac kag ang Dios ni Jacob.’ Nian nagpadayon sia: ‘Sia Dios, indi sang mga patay, kundi sang mga buhi.’ Nahibaluan ko nga ining mga pulong nagakahulugan nga si Dar­rall yara sa handumanan sang Dios kag magabalik sa pagkabanhaw.”

Paglaum Para sa mga Patay—Mangin Matuod sa Dili Madugay

Ang tagna sa Biblia nagapakita nga malapit na kita sa tion nga ang Dios magahikot agod ipasag-uli ang paghidait kag kabuhi nga walay katapusan sa matinumanon nga katawhan. Ang Dios nanaad: “Bayluhan ko ang ila paglalaw sa kalipay, kag lipayon ko sila kag pasadyahon sila gikan sa ila kasubo.” “‘Punggi ang imo tingog sa paghibi, kag ang imo mga mata sa mga luha, kay may padya ang imo binuhatan,’ siling ni Jehova, ‘kag magabalik sila gikan sa duta sang kaaway [kamatayon].’”—Jeremias 31:13-17.

Sa sadto nga tion progresibo nga ipasag-uli ni Jehova sa kabuhi paagi sa pagkabanhaw ang mga napatay sa bug-os nga maragtas sang tawo. Sa idalom sang langitnon nga pangulohan sang bag-ong sistema sang Dios, hatagan sila sing kahigayunan sa pagpili sing kabuhi nga walay katapusan paagi sa pagtuman sa mga sugo sang Dios para sa kabuhi sa sadto nga tion. Sa amo, kon magliso kita sa Biblia, masapwan naton nga may yara matuod nga paglaum para sa mga patay kag lugpay para sa mga buhi.—Binuhatan 24:15; Bugna 20:12-14; 21:1-4.

[Footnotes]

[Kahon sa pahina 14]

Si Diane Krych, nga nagaasoy sang pagkapatay sang iya anak nga si David sa amon ikaduha nga artikulo, nakaeksperiensia sing daku nga pagbakho kag mga reaksion nga ginapanghiwala ini. Ginpamatud-an ini sang mga sulat nga iya ginpadala kay David, kag gintago, sa sulod sang 13 ka tuig. Nag-untat sia sa pagsulat sang gin-atubang niya ang kamatuoran sang pagkapatay sang iya mismo amay, nga iya gin-atipan. (Ang Magmata! wala nagarekomendar sang paghimo sing sulat subong isa ka porma sang paumpaw. Apang, ginbalikwat namon ang una nga sulat sa pag-ilustrar kon paano ang pagkabanhaw nga paglaum amo ang iya angkla kag nagsakdag sa iya kutob sadto.)

Mahal nga David,

Ikaw nagakatulog sa 46 ka adlaw na karon. Daw subong bala nga tinuig na ang nagligad sang ulihi ko ikaw nga makita kag mahakos. Apang limitado lamang ang inadlaw sang imo pagtulog. Kuntani nahibaluan ko kon tubtob san-o bangod ginatandaan ko ang tagsa ka adlaw. Para sa amon, isa ini ka malawig, mabudlay, kag masubo nga paghulat, apang para sa imo daw pila lamang ini ka minutos. Ginapasalamatan ko ina. Ginapaabot namon ang adlaw nga pukawon ka ni Jehova gikan sa imo pagtulog sa bag-ong kahimusan. Mahimos kita sing pinakadaku nga sinalusalo nga wala mo pa makita. Sa dimagkubos magadugay ini sing tatlo ka adlaw. Imbitahon naton ang tanan nga kilala naton. Mangin sinalusalo mo ini. Kabay nga indi kita maghulat sing malawig. Daw indi na ako makahulat sa paghakos sa imo, David. Ginamingaw gid kami sa imo. Ang balay masubo nga wala ikaw. Ang amon kahimtangan karon indi gid mangin pareho sang una tubtob wala ikaw.

Gani, palangga ko nga anak, tinguhaan namon nga mangin mapailubon kag maghulat kay Jehova sa imo pagbalik, kag samtang sa wala pa ina, padalhan ka namon sing diutay-diutay nga mga sulat agod mahibaluan mo kon ano ang nagakatabo samtang nagakatulog ka.

Nagapalangga gid sa imo,

Mommy

[Mga Laragway sa pahina 15]

Ang Biblia nagasaad nga ang mga patay, kaangay ni Maria kag ni David, pagabanhawon