“Pagdumdom Ko ang Pagpatughong sing Dugo Kabuhi, Indi Kamatayon”

INA nga mga pulong ginhambal ni Sal Cirella, amay sang isa ka biktima sang hepatitis, sa programa sa telebisyon sang E.U. nga 20/20 sang Disiembre 11, 1986. Ang iya anak nga babayi nga si ­Tracy gintughungan sing dugo subong “pagsulundan sang ospital,” bisan pa batok ini sa luyag sang mga ginikanan. (Natabuan nga sila indi mga Saksi ni Jehova, nga nagadumili sa pagpatughong bangod sa relihioso nga mga rason.) Nagmasakit sia sing hep­a­ti­tis, kag ang iya kabuhi naluwas lamang paagi sa pag-ilis sang iya atay.

Si Tracy gin-atake sang isa ka porma sang hep­a­ti­tis nga ginatawag non-A/non-B hep­a­ti­tis. Ini gihapon nga programa sa TV nagreport: “Kapin sa 190,000 ka Amerikano ang nagamasakit sini kada tuig bangod sa pagpatughong sing dugo. Nagatuga ini sing permanente nga halit sa atay ukon nagapatay sing halos 10,000 ka tawo kada tuig. Diutayan lang sini mapatay si ­Tracy.”

Ang isa ka manugbusbos nga nakaopera nga wala sing dugo sa 14,000 ka kaso nagsiling man: “Nakita ko ang mga tawo nga nagatughong sing dugo sa mga tawo nga wala gid nagakinahanglan sini, kag agod tabunan ang ila mga sala nga pagpatumbaya, ginagamit nila ang pagtughong sing dugo. Kag sa banta ko indi gid ini mabaton.” Ang isa pa ka doktor, opisyal anay sang Food and Drug Ad­min­is­tra­tion sa E.U., nagsiling: “Nagapati ako nga ginapasobrahan ang paggamit sa mga produkto sang dugo. Sa banta ko may yara nagakaigo nga pamatuod sa sina. Ang panimuot nga dapat bag-uhon amo ang panimuot sang mga manugbulong, ang ila ginaorder para sa isa ka pasyente. Kag nagaorder sila sing tuman kadamo nga dugo.”