Pagbantay sa Kalibutan

Masubo nga mga Tagipusuon

Ang pagpangita sing nobya sa Hapon kapin nga nagabudlay. Ang rason? Mas madamo ang pamatan-on nga mga lalaki sang sa pamatan-on nga mga babayi. Dugang pa, ang “nahilway” nga mga kadalagahan sa Hapon wala nagadali sa pagpamana, ukon nagakabalaka sa pagsunod sa tradisyon kon magpamana sila. Ang naapektuhan sing daku amo ang mga lalaki sa kaumahan. Bangod indi makakita sing mga Haponesa nga handa sa pagpangabudlay upod sa ila, ang mga anak nga lalaki sang mga mangunguma nakatukib kasan-o lang nga ang mga dalaga gikan sa iban nga pungsod sang Asia makalilipay nga mga kaupod. Apang, ang mga taga-siudad nga mga lalaki nagatilaw sang lain nga tikang agod mabihag ang tagipusuon sang mga dalaga. Suno sa Asahi Evening News, ang mahuyugon sa uso nga mga soltero nagagasto sing promedyo nga isa ka gatos ka dolyar (14,200 yen) kada bulan sa personal nga mga kosmetik agod dayawon sila sang ila mga nobya. Apang, ina nga mga panikasog, mahimo nga indi pirme magmadinalag-on. Ang 22-anyos nga estudyante sa isa ka unibersidad sang Tokyo nagreklamo nga sia kag ang iya mga abyan naugot kon “kinahanglan pa sila maghulat . . . sa mga lalaki, kay nagagamit pa sila sing mga paninlo sa guya, daw gatas nga mga losyon, kag hair ­mousses.”

Pinakamadamo nga Paghikog

Pilo nga kadamuon sang mga tawo ang nagakapatay kada tuig sa Fin­land bangod sa paghikog sang sa mga aksidente sa trapiko. Suno sa pinakaulihi nga estadistika nga matigayon, ang 1984 amo ang tuig nga may pinakamadamo nga paghikog, nga may kabug-osan nga 1,231 ka tawo ang nagkutol sang ila kabuhi. Sa sina nga numero, mga 80 porsiento ang mga lalaki. Ang mas serioso pa amo ang pagdugang sang kadamuon sang mga pamatan-on nga nagahikog. Mga 45 porsiento sang tanan nga kamatayon nga yara sa ulot sang edad nga 20 kag 24 ang nasapwan nga paghikog. Ang dies-anyos ginreport nga amo ang pinakabata nga biktima sang paghikog sa Fin­land sang 1984.

Ginbuyagyag ang mga Manugpamakot

Ang mga astrologo nga nagapangangkon nga may ikasarang sila sa pag-analisar sang kinaiya sang isa ka tawo kag makapakot sang mangin kabuhi sina nga tawo paagi lamang sa pagbasa sang mga bituon nagadaya sa publiko kag sa ila kaugalingon, siling ni ­Shawn Carl­son, isa ka mananalawsaw sa Law­rence Ber­keley Lab­o­ra­to­ry sang University of Cal­i­for­nia. Sa isa ka ginkontrol sing mahalungon nga pagtuon, nga gintuyo sing ispisipiko agod tilawan kon ano ang masarangan nga himuon sang mga astrologo, nasapwan sang mga sientipiko nga ang mga astrologo wala sing pinasahi nga ikasarang sa pagpatpat sang personalidad paagi lamang sa astrolohiko nga mga pagbasa. “Mahimo gid nga kon nagapungko nga nagaatubang sa isa ka kliyente, ginabasa sang mga astrologo ang mga kinahanglanon, mga paglaum kag mga pagduhaduha sang mga kliyente pasad sa hulag sang ila lawas,” siling ni Carl­son.

Paggamit sa Mataas nga Teknolohiya sa Pagkodigo

Ang pagkodigo sa mga eksamin indi bag-o, apang ang paggamit sa mataas nga teknolohiya sa pagkodigo posible karon bangod sang isa ka bag-o nga relo nga may ikasarang sa pagtago sa memorya sini sing tubtob sa 500 ka tinaga. Suno sa pamantalaan nga The Australian, ang isa ka manunudlo nagsiling: “Ang relo makapabalaka gid. Kon ang mga manunudlo wala nakahibalo sini ukon kon ang mga nagabantay [mga superbisor sa eksamin] indi estrikto ang resulta sang eksamin indi mangin makatarunganon.” Ang bili sang hinimo sa Hapon nga mga relo $320 (Aus­tralian) kag gindesinyo sa pagbulig sa masako nga mga tawo nga madumduman ang importante nga mga hilimuon, kag iban pa. Ano ang ginabatyag sang mga estudyante sa sini? Ang isa ka 16-anyos nagsiling: “Maayo kuntani kon ang mga manunudlo wala makahibalo nahanungod sini.”

Sobra nga Paglaragway

Si Brandon Brooks, isa ka manugbalita sa TV, nagtugot sa polisiya nga gamiton ang iya balay agod makita sang mga tumalan-aw ang batok sa kawatan nga mga kasangkapan. Sang madason nga semana, samtang nagabalita sia sa gab-i nga balita, ginsulod sang mga kawatan ang iya balay kag ginkuha ang madamo nga butang, lakip ang mga kasangkapan, TV, kag video tape re­cord­er. Ang mga imbestigador nagpati nga gingamit sang mga kawatan ang ginpaguwa sa TV sa paghimo sing mapa sang iya balay kag likawan ang mga kasangkapan.