Mga Panganod—May Ginasugid Sila

ANG mga mamalaybay, sang una kag karon, nagahimo sang langit kag mga panganod nga ila inspirasyon. Bisan ang mga taga-siudad nagatangla sa langit agod tan-awon kon ano nga tiempo ang nagahulat sa ila. Ang maalamon nga taga-uma makadumdom sang dumaan nga hulubaton, “Ang mapula nga langit sa gab-i amo ang kalipay sang manugpahalab, ang mapula nga langit sa aga amo ang paandam sang manugpahalab.” Isa lamang bala ini ka ginhimohimo nga sugilanon? Indi, ginpasad ini sa sahi sang mga panganod nga makasugid sing maayo ukon malain nga tiempo sa banaag sang adlaw.

Lainlain ang korte kag desinyo sang mga panganod. May ginasugid sila. Sila ang daw nagahinantal sing pataas kag pataas sa langit. Sa masami ginatawag sila nga cumulus nga panganod, gikan sa Latin nga tinaga para sa “hantal,” ukon “tumpok.” Kon sila cumulus nga panganod nga nagadala sing ulan, mahimo gid nga mangin itom sila ukon abuabuhon kag sa amo sina ginatawag sila nga cumulo­nimbus, ang nimbo amo ang Latin nga termino para sa “ulan.”

Ano naman ang mga panganod sa mataas nga bahin sang langit nga kon tulukon daw kulong kag manipis nga mga pakpak? Sa baylo nga ginahuman sang mga tulo sang tubig, subong amo ang kalabanan nga mga panganod, bangod sang ila kataason, ini nga panganod ginahuman sang yelo nga mga kristal kag ginatawag nga cir­rus, gikan sa Latin nga tinaga para sa “kulong.” Ang manubo nga mga panganod nga nagatabon sa bug-os nga langit kag nagadala sing yelo ukon ulan ginatawag nga stra­tus (daw anib) nga mga panganod bangod nagakabit sila kaangay sang habol ukon anib sa bug-os nga langit.

May pila ka pagkatuhaytuhay sa sining sadsaran nga mga sahi, apang walay sapayan kon ano nga panganod ang makita naton sa aton bahin sang kalibutan, makapasalamat gid kita nga may yara kita sina nga pagkananuhaytuhay sa langit. Ipaanggid lamang ang isa ka matahom nga retrato nga nagapakita sang mga panganod sa langit sa isa nga wala sini. Sa masami, makita mo sa madali kon diin nga laragway ang may karakter.

Apang paano ginaporma ang mga panganod? Isa ina ka teme para sa masunod naman nga tion. Apang, sa masunod nga tion nga magtangla ka sa mga panganod, dumduma ang mga pulong ni Elihu: “Tulok ka sa langit kag tan-awa, kag toloka ang mga kahawaan, nga mataas pa sa imo.” (Job 35:5) Nian dumduma ang ila Manunuga, si Jehova nga Dios.

[Mga Laragway sa pahina 25]

Tuo: Cirrus nga panganod

Ubos: Stratocumulus nga panganod sa pagsilak sang adlaw

Ibabaw: Cumulus nga panganod

Wala: Cumulonimbus nga nagaporma sing thunderhead