Ang Lawas—Ginhimo sing Makatilingala Agod Mangin Makalilipay ang Kabuhi!
GINABATON sang mga sientipiko nga ang lawas sang tawo ginhimo sing makatilingala, isa gid ka makadalayaw nga desinyo kag pag-inhinyero. Kon ang tanan nga bahin sang aton lawas nagapanghikot sing normal, makahimo kita kag makakalipay sa mga butang nga makadalayaw gid.
Halimbawa, tan-awa ang imo mga kamot. Matahom gid ang pagdesinyo sa ila agod makahimo sing madamo nga butang sa trabaho ukon sa hampang. Sa karon gid, ginauyatan bala sang imo mga kamot ining magasin nga imo ginabasa? Kon amo, nian ang imo mga butkon nagapilo sa husto gid nga anggulo agod mauyatan ang magasin sa husto nga kalayuon gikan sa imo mga mata. Ang imo mga tudlo nagapangusog agod indi ini mahulog. Kag ina nga mga tudlo ginakontrol sang utok agod himuon ang eksakto nga imo ipahimo sa ila kon buksan mo ang masunod nga pahina. Daw ano nga disbentaha kon wala ka sing kamot!
Ang imo mga mata nadalahig man sa pagbasa sining mga pahina. Ang makatilingala nga network sang mga nerbios kag ang iban pa nga mga bahin sang lawas nagabulig agod kuhaon ang laragway sang mga tinaga kag mga laragway gikan sa pahina padulong sa imo mata kag dayon sa imo utok. Ang electrical impulses nga ginapatubas sang mata ginadal dayon sa utok, nga sa diin ginagamit sila sa pagporma sing impresyon nga nahisanto sa mga laragway sa pahina. Daw ano ka importante ang aton panulok, kag daw ano ka makapasubo kon madula ini!
Ang utok sang tawo nagabug-at lamang sing tres libra kag tama kadiutay nga makaigo ini sa imo kamot. Apang makatilingala ini, isa sang labing masibod nga mga tinuga sa uniberso. Paagi sa sini makahunahuna kita, makakita, makabatyag, makahambal, makapahituhog sang aton mga hulag. Bangod sining masibod nga utok, makakalipay kita sa matahom nga mga kasisidmon, sa manamit nga pagkaon, sa dapya sang hangin sa aton nawong, sa matahom nga mga danyag sang makapulunaw nga kabukiran, sa kadlaw sang bata, sa kahumot sang bulak, sa tandog sang isa nga ginahigugma naton—kag ang kalabanan sini ginahimo naton nga wala sing panikasog. Kon wala ining makapulunaw nga utok, wala kita sing mahimo.
Daw ano ka nagakaigo ang mga tinaga sang salmista: “Ginhimo ako sing makahalangawa”!—Salmo 139:14.
Apang, walay sapayan sining matahom nga kasangkapan, ang tion nagaabot nga ang lawas nagaluya sa ulihi. Nagamasakit kita kag nagatigulang, kag dayon nagakapatay. Daku gid ang kalautan sa palibot naton nga bisan pa maayo ang aton lawas, ang aton kalipay sa kabuhi nagabuhin. Magaluntad bala pirme ining ginakangil-aran nga mga kahimtangan? Ukon gindesinyo gid bala ang aton lawas nga magpadayon sing dayon—nga wala sing halit sang balatian, katigulangon, kag kamatayon—agod magkalipay sa kabuhi sing dayon sa duta sa isa ka bug-os nga kahulugan sang sa maeksperiensiahan naton karon?
Usisaon sang Magmata! ining mga butang sa tatlo ka guwa sa maabot nga mga binulan. Sa sining nahauna nga bahin, ipaathag namon ang pila lamang sang aton makatilingala nga mga bahin sang lawas: ang kamot, ang mata, kag ang utok.